ءبىر تاپسىرما عانا ورىندالمادى

بۇگىندە تاپسىرمانىڭ ءتۇرى كوپ قوي. تاپسىرمانى تاس قىلىپ, ورىندالۋى ءتيىس دۇنيەنىڭ ءبارىن جاپىرىپ تاستايتىن جانداردى باسشىلار, ارينە, جوعارى باعالايدى. تاۋ قويناۋىندا جاتقان تولەبي اۋدانىندا وتكەن جىلى ءبىر تاپسىرما ورىندالمادى. «وتكەن جىلى وبلىس اكىمدىگى تاراپىنان اۋدانعا 213 تاپسىرما بەرىلسە, سونىڭ 188-ءى تولىق ورىندالدى. 24-ءى قاتاڭ باقىلاۋدا, ياعني ءالى ورىندالۋ ۇستىندە. تەك ءبىر تاپسىرما عانا ورىندالماي قالدى», دەيدى بۇل جونىندە تولەبي اۋدانىنىڭ اكىمى اۋەلحان تۇرعىمبەكوۆ. تولەبي اۋدانى سوڭعى جىلدارى اكىمدەردىڭ جۇمىسىنا رەڭ بەرەتىن رەيتينگتىك كورسەتكىشتە تومەن تۇسكەن ەمەس. ءارى كەتكەندە ءتىزىمنىڭ جۋان ورتاسىنا جۇرەدى. كورسەتكىشتەرى دە جاقسى. وتكەن جىلى اۋدانعا 27 ملرد. 340 ملن. تەڭگە ينۆەستيتسيا قۇيىلدى. كىرىس جوسپارى 1 ملرد. 190 ملن.-عا جەتىپ, 102,2 پايىزدى قۇرادى. ۇدەمەلى يندۋستريالىق-يننوۆاتسيالىق دامۋ باعدارلاماسى بويىنشا قۇنى 1 ملرد. 104 ملن. تەڭگەنى قۇرايتىن 1 جوبا ەنگىزىلگەن. بۇعان دەيىن وسى باعدارلاما بويىنشا 2 جوبا ءوز جۇمىسىن باستاعان ەدى. ال, «بيزنەستىڭ جول كارتاسى-2020» باعدارلاماسى بويىنشا 7 جوبا سۋبسيديالانىپ, ينفراقۇرىلىم باعىتىندا تاعى 2 جوبا ماقۇلداندى. تۋريزم سالاسىن دامىتۋ جونىندە دە 4 جوبا ىسكە اسىرىلۋدا. ءبارى جاقسى عوي, بىراق تالاس الاتاۋىنىڭ قويناۋىندا جاتقان اۋداندا تامشىلاتىپ سۋارۋ تاپسىرماسى تولىق ورىندالماي-اق قويدى. الدە تولەبيلىكتەر «تاۋدان ارقىراپ اعىپ جاتقان وزەن تۇرعاندا سۋدى تامشىلاتىپ نە قۇداي ۇرىپتى؟» دەپ ارقانى كەڭگە سالا ما, ايتەۋىر, اۋداندا 970 گەكتار جەرگە وسى ءادىستى ەنگىزۋ جوسپارلانسا, بۇل كورسەتكىش 674 گەكتاردى ازەر قۇراپ تۇر. «تامشىلاتىپ سۋارۋ ءادىسىن ەنگىزۋگە شارۋالاردىڭ ىقىلاسى بار, بىراق, قارجىنى الۋ ءۇشىن كەپىلدىككە قوياتىن دۇنيەلەرى جوق. وسى تاپسىرما تولىق ورىندالماعانى ءۇشىن الاتاۋ, قاراتوبە اۋىلدىق وكرۋگتەرىنىڭ اكىمدەرىنە, اۋداندىق اكىمدىكتىڭ جەر جونىندەگى ماماندارىنا تارتىپتىك شارا كورىلگەن», دەيدى تولەبي اۋدانىنىڭ اكىمى اۋەلحان تۇرعىمبەكوۆ. وسى اۋداننىڭ زەرتاس اۋىلدىق وكرۋگىنە قاراستى «جاڭا كۇش» شارۋا قوجالىعى تامشىلاتىپ سۋارۋ ءادىسىن بۇگىندە كەڭىنەن قولدانىپ وتىر. بىراق, بۇل تىرلىكتىڭ ءبارى ءبىر كۇندە قۇرالا سالماعانى انىق. العاشىندا بۇل شارۋاشىلىق مال باسىن كوبەيتۋمەن اينالىسىپتى. بىراق, ەكى-ءۇش جىلدا ەشقانداي تابىس تاپپاعان. ءتىپتى, مالدىڭ جەمشوبىنە جۇمسالعان شىعىن ءوزىن-ءوزى اقتامادى. سودان 2009 جىلدان باس­تاپ نەگىزگى باعىتتى بيە باسىن كوبەيتۋگە بۇرىپ, قىمىز ءوندىرۋ ىسىنە دەن قويادى. الايدا, مۇندا دا قيىندىقتار كەزدەستى. قىمىزدى ساۋداعا شىعارعاندا تابىستى اراداعى «دەلدالدار» يەمدەنىپ كەتىپ جاتتى. ءسويتىپ, 2011 جىلدان باستاپ شىمكەنت قالاسىنىڭ قاق ورتاسىنا كيىز ۇيلەر ورناتىپ, قىمىزدى تۇتىنۋشىعا تىكەلەي ساتۋ ءىسىن جولعا قويادى. بۇگىندە شىمكەنت قالاسى اكىمىنىڭ «قالا اۋماعىندا ۇلتتىق سۋسىنداردى ساتۋعا مەرزىمدىك ورىندار بەلگىلەۋ تۋرالى» قاۋلىسىنا ساي شىرايلى شاھاردا شارۋاشىلىقتىڭ 4 كيىز ءۇيى بار. ەلباسى ن. نازارباەۆتىڭ «فەرمەرلەر ءوز ونىمدەرىن تۇتىنۋشىعا ءوزى ساتاتىن جاعدايعا جەتكىزۋ كەرەك» دەگەن تاپسىرماسىنىڭ تيىمدىلىگىن وسى «جاڭا كۇش» كورىپ وتىر. وتكەن جىلى ولارعا قىمىز ءوندىرۋ بويىنشا 2 ميلليون تەڭگەگە جۋىق قايتارىمسىز قارجى ءبولىندى. – شارۋاشىلىعىمىزدىڭ تاعى ءبىر سالاسى – جاڭا تەحنولوگيانى پايدالانىپ, تامشىلاتىپ سۋارۋ ادىسىمەن باۋ-باقشا ەگۋ, – دەيدى «جاڭا كۇش» شارۋا قوجالىعىنىڭ توراعاسى وڭعار ءابدىرايىموۆ. – 2012 جىلى وسى ادىسپەن 5 گەكتار جەرگە باۋ ەگىپ, بۇگىندە 22 گەكتارعا جەتكىزدىك. بۇل سالاعا 2 جىلدىڭ ىشىندە مەملەكەتتەن 15 ملن. تەڭگە قايتارىمسىز قارجى الدىق. بۇل شىعىننىڭ 40-50 پايىزىن جاۋىپ وتىر. ودان بولەك «تولەبي نەسيە» سەرىكتەستىگى ارقىلى العان 13 ملن. تەڭگە نەسيەمىز دە تىرلىگىمىزگە ۇلكەن دەم بەردى. قازىر شارۋاشىلىقتا 12 ادام تۇراقتى جۇمىس ىستەيدى. وتكەن جىلى 20-25 ادام ماۋسىمدىق جۇمىسقا تارتىلدى. «جۇمىسپەن قامتۋ-2020» باعدارلاماسى بويىنشا ەكى جۇمىسكەردى تامشىلاتىپ سۋارۋ ءادىسىن تەرەڭىرەك مەڭگەرۋ ءۇشىن كۋرستارعا جىبەرگەلى وتىرمىز. جالپى العاندا, شارۋاشىلىقتىڭ مەنشىگىندە 26 گەكتار جەر بار ەدى. وتكەن جىل سوڭىندا اۋدان اكىمدىگىنىڭ كومەگىمەن تاعى 10 گەكتار جەر ءبولىندى. جۇمىسىمىزدىڭ العا باسىپ, شارۋاشىلىقتىڭ كەڭەيىپ جاتقانىن كورگەن ەكى جەكە شارۋا قوجالىعى بىزگە 6 گەكتار جەرىمەن قوسىلدى. سوندىقتان بيىل تاعى دا 10 گەكتارعا تامشىلاتىپ سۋارۋ ادىسىمەن باۋ ەگىلەدى. قىمىز ءوندىرۋ كاسىبىن جالعاستىرا بەرەمىز. سونداي-اق, اۋدان اكىمدىگىمەن كەلىسىپ, توعىس وزەنى, سايرامسۋ كانالى بويىنداعى 1 گەكتار جەردى شارۋاشىلىق قاراجاتىمەن كوگالداندىرۋدى كوزدەپ وتىرمىز». ءيا, «جاڭا كۇشكە» باسقا دا شارۋا قوجالىقتارى قوسىلىپ, ىرىلەنىپ, كۇشەيىپ جاتىر ەكەن. شىنىندا شارۋاسىن ۇقساتا الماي جۇرگەن ۇساق قوجالىقتار وسىنداي ىرىلەرگە قوسىلسا, قولى ۇزارادى ەمەس پە؟ بالكىم سول كەزدە تولەبيلىك شارۋالار تامشىلاتىپ سۋارۋ ءادىسىن توبەلەرىنە كوتەرەر. قالاي ايتساق تا, تولەبي اۋدانىنىڭ باسشىلىعى بيىل بۇل تاپسىرمانى تاس قىلامىز دەپ وتىر. ءبارىن ۋاقىت كورسەتەدى. ورالحان ءداۋىت, «ەگەمەن قازاقستان».  وڭتۇستىك قازاقستان وبلىسى. Cۋرەتتى تۇسىرگەن قايسار شەرىم.