كودەكستى جەتىلدىرۋ – ۋاقىت تالابى

كەشە الماتىدا «جاڭا قىلمىستىق ءىس جۇرگىزۋ كودەكسى جانە قىلمىستىق سوت ءىسىن جۇرگىزۋدى جاڭعىرتۋدىڭ نەگىزگى باعىتتارى» دەگەن تاقىرىپتا عىلىمي-پراكتيكالىق كونفەرەنتسيا ءوز جۇمىسىن باستادى. دوڭگەلەك ۇستەلدى كىرىسپە سوزبەن اشقان قازاقستان رەسپۋبليكاسى كونستيتۋتسيالىق كەڭەسىنىڭ توراعاسى يگور روگوۆ اتالمىش كونفەرەنتسيا تاقىرىبىنىڭ ماڭىزدىلىعىن ەسكەرە وتىرىپ, وعان قاتىسۋشىلاردىڭ جۇمىسىنا ساتتىلىك تىلەدى. ودان كەيىن ءسوز العان قازاقستان رەسپۋبليكاسى جوعارعى سوتىنىڭ توراعاسى قايرات ءمامي ەلباسى تاپسىرماسىمەن دايىندالعان جاڭا قىلمىستىق ءىس جۇرگىزۋ كودەكسىنىڭ جوباسى تەك قانا زاڭگەرلەر مەن ساراپشىلار تاراپىنان عانا ەمەس, سونداي-اق جالپى قوعام تاراپىنان دا كەڭىنەن تالقىلاۋعا ۇشىراعان قۇجات ەكەنىن تىلگە تيەك ەتتى. سونداي-اق, كونفەرەنتسيادا ءسوز العان قازاقستان رەسپۋبليكاسى پرەزيدەنت اكىمشىلىگىنىڭ قۇقىق قورعاۋ جۇيەلەرى ءبولىمىنىڭ مەڭگەرۋشىسى اليك شپەكباەۆ, ەۋروپالىق كەڭەستىڭ ۆەنەتسياندىق كوميسسياسىنىڭ ازاماتتىق ءبولىمىنىڭ باسشىسى سەرگەي كۋزنەتسوۆ, ەقىۇ-نىڭ استاناداعى ورتالىعىنىڭ باسشىسى ناتاليا زارۋدنايا, «ادام قۇقىقتارى حارتياسى» قوعامدىق قورىنىڭ اتقارۋشى ديرەكتورى جەمىس تۇرماعامبەتوۆا كونفەرەنتسيا بارىسىندا قۇقىقتىق تەتىكتەردى جەتىلدىرۋ ماسەلەلەرى بويىنشا بەلسەندى پىكىر-تالاستار بولاتىنىنا سەنىم ءبىلدىردى. – وزدەرىڭىز بىلەسىزدەر سوڭعى ءۇش جىل بويى ءبىزدىڭ مەم­لە­كەتى­مىزدە قىلمىستىق ءىس جۇرگىزۋ كودەكسىنىڭ جاڭا جوباسىن جاساۋ بويىنشا ءبىراز جۇمىستار اتقارىلدى, – دەدى قازاقستان رەسپۋبليكاسى باس پروكۋرورىنىڭ ءبىرىنشى ورىنباسارى يوگان مەركەل, – وتكەن جىلى بۇل زاڭ جوباسى پارلامەنتكە ۇسىنىلىپ, حالىق قالاۋلىلارى ونى ءبىرىنشى وقىلىمدا ماقۇلدادى. دەگەنمەن, كەيبىر ماسەلەلەر بويىنشا ەكىنشى وقىلىمنىڭ تالقىلاۋلارى ءجۇرىپ جاتىر. ال بۇگىن ءوز جۇمىسىن باستاعان كونفەرەنتسياعا ءبىز زاڭگەرلەردى, دەپۋتاتتاردى, ۇكىمەتتىك ەمەس ۇيىمدار مۇشەلەرى مەن بىرگە حالىقارالىق ساراپشىلاردى دا شاقىرىپ وتىرمىز. تالقىلانىپ وتىرعان ماسەلەدە شەتەل ساراپشىلارىنىڭ دا وي-پىكىرلەرىن بىلسەك دەگەن نيەتىمىز بار... شارافاددين ءامىروۆ, «ەگەمەن قازاقستان». الماتى.