تاسىمال العا باسىپ تۇر

«استىق-ترانس» قازاقستان-رەسەي بىرلەسكەن كاسىپورنى 2014-2015 جىلدىڭ استىق تاسىمالداۋ ماۋسىمىندا IT-اقپاراتتىق قولداۋ بىرىڭعاي پورتالى ءتۇرىن پايدالانۋدى كوزدەپ وتىر. پورتالدا تاپسىرىس اۆتوماتتى تۇردە بەرىلەدى. كەزەڭ-كەزەڭىمەن تاپسىرىستىڭ ورىندالۋى باقىلانادى. باستىسى, وندا تاريف جايى اشىق كورسەتىلەدى. تاريفتىك ەسەپ جۇرگىزۋ, تاريفتىك كالكۋلياتورمەن جۇزەگە اسىرىلادى. «بۇل قىزمەت ءتۇرى قازاقستان نارىعىنداعى جاڭا باس­تاما. ءتاريفتىڭ اشىقتىعى, ۆاگوننىڭ قوزعالىسىن باقىلاپ وتىرۋ, قۇجاتتاردى بارىنشا ازايتۋ مۇنىڭ بارلىعى تاپسىرىس بەرۋشىنىڭ قىسقا مەرزىمدە جۇمىسىن اتقارىپ بولۋىنا كومەكتەسەدى. جاڭا استىق تاسىمالداۋ كەزەڭىنە دەيىن بىرىككەن كاسىپورىن بۇل تەحنولوگيالىق ماسەلەلەردى تولىعىمەن شەشە الادى», دەيدى «استىق-ترانس» اق ديرەكتورلار كەڭەسىنىڭ توراعاسى ولەگ روگاچەۆ. بىلتىرعى قىركۇيەكتە قۇرىلعالى بەرى بك رەسپۋبليكا ءىشى مەن شەتەلدىك باعىتتارعا استىق ونىمدەرىن تولاسسىز جونەلتۋدە. وتكەن جىلدىڭ ءتورتىنشى توقسانىندا 1,3 ميلليون توننا استىق تاسىمالداسا, ونىڭ 993 مىڭ تونناسى ەكسپورتقا شىعارىلىپتى. ال ەل اۋماعىندا 334 مىڭ تونناسى ءتيىستى جەرگە جەتكىزىلگەن. بيىلعى جىل باسىنان بەرى ءبىر ميلليون توننا استىق تاسىمالدانعان. بولاشاقتا بىرلەسكەن كاسىپورىن ۆاگون پاركىن 10 مىڭ داناعا جەتكىزۋدى كوزدەپ وتىر ەكەن. بۇل ۆاگوندارمەن استىق مول شىققان جىلدارى 12 ميلليون تونناعا دەيىن استىق تاسىمالداۋعا بولادى. ايتا كەتۋ كەرەك, «رۋساگروترانس» جاق رەسەيدىڭ كەدەن وداعى ەلدەرى اياسىنداعى قارا تەڭىز استىق بىرىڭعاي ءپۋلتىنىڭ ءىرى وپەراتورى بولىپ تابىلادى. كومپانيانىڭ الدىندا تۇرعان باستى مىندەت – قارقىندى دامىپ كەلە جاتقان قازاق ەلىنىڭ اگرارلىق سەكتورىن ارنايى مامانداندىرىلعان جىلجىمالى قۇراممەن تولىققاندى قامتاماسىز ەتۋ جانە تەمىرجولمەن استىق تاسىمالداۋ تەحنولوگيالارىن جەتىلدىرۋ. ەل ىشىندە استىق تاسىمالداۋ سولتۇستىك وڭىرلەردەن وڭتۇستىك, باتىس وبلىستارعا قاراي جۇرگىزىلەدى. قازاقستاندىق استىق نەگىزىنەن ەكسپورتقا تمد ەلدەرى مەن ەۋرووداققا, تاياۋ شىعىس, ورتالىق ازيا ەلدەرىنە جىبەرىلەدى. كاۆكاز, ازەربايجان, گرۋزيا دا تۇراقتى تۇتىنۋشىسى. «ەگەمەن-اقپارات».