بۇگىنگى ۇرپاقتىڭ ءۇش ءتىلدى مەڭگەرۋى, قاي جاعىنان العاندا دا, ءتيىمدى باستاما. بۇل – ءبىر جاعى زامان تالابى. نەگىزگى ماقساتىنا كەلسەك, بىرنەشە ءتىلدى مەڭگەرگەن, الەۋمەتتىك جانە كاسىپتىك باعدارعا قابىلەتتى, مادەنيەتتى تۇلعانى دامىتۋ جانە قالىپتاستىرۋ. ەلباسى نۇرسۇلتان نازارباەۆ: «قازاقستان بۇكىل الەمدە حالقى ءۇش ءتىلدى پايدالاناتىن مادەنيەتتى ەل رەتىندە تانىلۋعا ءتيىس. بۇلار: قازاق ءتىلى – مەملەكەتتىك ءتىل, ورىس ءتىلى – ۇلتارالىق قاتىناس ءتىلى جانە اعىلشىن ءتىلى – جاھاندىق ەكونوميكاعا ويداعىداي كىرىگۋ ءتىلى» دەگەن بولاتىن. بۇل ەلىمىزدىڭ بولاشاق ۇرپاعىن ءتاربيەلەپ وتىرعان ءبىلىم سالاسى قىزمەتكەرلەرىنە دە سىن بولماق.
ارينە, ەل اراسىندا قازاق ءتىلى باسقا ەكى ءتىلدىڭ قالقاسىندا قالىپ كەتپەي مە دەگەندە قورقىنىش جوق ەمەس. «بالانىڭ بويىنا ۇلتىنىڭ ۇلىلىعى انانىڭ سۇتىمەن, تىلىمەن داريدى. سوندىقتان بۇل جۇيە ەڭ الدىمەن قازاق ءتىلىن جەتىك مەڭگەرتۋدى كوزدەيدى. قازاق ءتىلى – ۇلتىمىزدىڭ رۋحى, رۋحاني بايلىعى, ونى ءبىلۋ ءاربىر قازاقستان ازاماتىنىڭ بورىشى. عىلىمعا, يننوۆاتسياعا, تەحنولوگيا مەن بيزنەسكە جول اشاتىن ورىس جانە اعىلشىن تىلدەرىن دە ءبىلىپ ۇيرەنۋىمىز قاجەت», دەيدى بۇل جونىندە پەداگوگيكا عىلىمدارىنىڭ دوكتورى, پروفەسسور اسما قالىبەكوۆا.
سارىاعاش قالاسىنداعى №4 دارىندى بالالارعا ارنالعان مامانداندىرىلعان مەكتەپ-ينتەرناتى جاس ۇرپاققا ءۇش ءتىلدى ۇيرەتۋدى كەڭىنەن قولعا الۋدى ماقسات تۇتقان ءبىلىم وشاقتارىنىڭ ءبىرى. 2007 جىلى ەسىگىن ايقارا اشقان بۇل مەكتەپتە بۇگىندە 350-گە جۋىق
وقۋشى ءبىلىم الىپ ءجۇر. ولارعا 40-قا جۋىق ۇستازدار ساباق بەرەدى. مەكتەپ باسشىلىعى ناعىز بىلىكتى, تاجىريبەلى ۇستازداردى جيناي ءبىلىپتى. مۇعالىمدەردىڭ اراسىندا عىلىم كانديداتتارى مەن پروفەسسورلار دا بار. مەكتەپ ديرەكتورى راۋشان دجەرەنوۆانىڭ ءوزى پەداگوگيكا عىلىمدارىنىڭ كانديداتى, 70-تەن استام ەڭبەكتىڭ اۆتورى. عالىم باسقارىپ وتىرعان ءبىلىم وشاعىنىڭ جەتىستىكتەرى جەتەرلىك. بيىل وبلىستىق وليمپيادادا وسى مەكتەپتىڭ ءۇش وقۋشىسى ءبىرىنشى ورىندى يەلەندى. ەكى وقۋشى ەكىنشى ورىن, بىرەۋى ءۇشىنشى ورىندى الدى. تاعى ءبىر قۋانىشتى جاعداي, جاقىندا سانكت-پەتەربۋرگ قالاسىندا فيزيكا ءپانى بويىنشا وتكەن بايقاۋدا تاعى ءبىر وقۋشى ءۇشىنشى دارەجەلى ديپلومعا يە بولدى. وسى ءبىلىم وشاعىنىڭ 7 وقۋشىسى نازارباەۆ زياكتەرلىك مەكتەبىنە قابىلدانۋى مۇندا ءبىلىم ساپاسىنىڭ جوعارى دەڭگەيدە ەكەنىن بايقاتسا كەرەك. «ءبىز ءال-فارابي اتىنداعى قازاق ۇلتتىق ۋنيۆەرسيتەتىمەن تىعىز بايلانىستا جۇمىس جاسايمىز. سونداي-اق, الماتى قالاسىنداعى ى.التىنسارين اتىنداعى №159 مەكتەپپەن كەلىسىمشارت جاساستىق. ەندى ءبىزدىڭ مۇعالىمدەر مەن وقۋشىلار الماتىعا بارىپ, وسى ءبىلىم وشاقتارىمەن تاجىريبە الماسادى. ءبىز قازىر سوڭعى تەحنولوگيالاردى ەنگىزۋدىڭ ارقاسىندا بالالاردىڭ ءبىلىم ساپاسىن كوتەرۋىمىز قاجەت. ول ءۇشىن عالىمداردى ءدارىس بەرۋگە كوپ تارتۋىمىز كەرەك. وقۋشىلار اراسىندا ساۋالناما جۇرگىزگەندە كوبىسى حالىقارالىق قاتىناستار ماماندىعىن قالايتىنىن ايتتى. وسى ماقساتتا, الداعى ۋاقىتتا استاناداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى سياقتى بەدەلدى وقۋ ورىندارىنىڭ عالىمدارىمەن بايلانىس ورناتساق دەيمىز», دەيدى مەكتەپ ديرەكتورى راۋشان ومارحانقىزى.
قايبىر كۇنى پەداگوگيكا عىلىمدارىنىڭ دوكتورى اسما قالىبەكوۆا وسى مەكتەپتىڭ وقۋشىلارىمەن ءۇش تىلدە ءبىلىم الۋ ماسەلەسى تۋراسىندا كەڭىنەن اڭگىمە قىلدى. جاس ۇرپاقتىڭ بۇل جۇيەگە دەگەن قىزىعۋشىلىعى مول. ەڭ قۋانىشتىسى, جاستاردىڭ بويىنان ەلىنە, جەرىنە, وتانىنا دەگەن مول سۇيىسپەنشىلىكتى كوردىك. تاۋەلسىز ەلىمىزدىڭ ءاربىر ابىرويلى ءىسىن ماقتان تۇتادى. بىلىمگە ىنتاسى ەرەكشە, ىقىلاسى مول 10-سىنىپ وقۋشىسى جۇلدىز قايىپجان ءتىل ءبىلۋدىڭ ارقاسىندا ءبىلىم كەڭىستىگىندە كوپ بيىكتەرگە قول جەتكىزۋگە بولاتىنىن, انا ءتىلىن ارداقتاۋمەن قاتار, ەل تاريحىن, ۇلتىمىزدىڭ سالت-ءداستۇرىن تەرەڭىرەك بىلگىسى جانە ونى الەمگە كەڭىنەن ناسيحاتتاعىسى كەلەتىنىن ايتىپ, اعىنان جارىلدى. لايىم, جاستارىمىز تىلەگىنە جەتە بەرسىن.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
سۋرەتتەردە: مەكتەپ ديرەكتورى ر.دجەرەنوۆا جانە مەكتەپ وقۋشىلارى.
سۋرەتتەردى تۇسىرگەن
ارمان ابدىراش ۇلى.
