تۇماندى البيون ەلىندە ۇيىمداستىرىلعالى وتىرعان جارىستىڭ باستى باسەكەلەرىنىڭ بىرىندە ءبىزدىڭ فيرۋزا ءشارىپوۆا ونەر كورسەتەدى. 27 جاستاعى جامبىل بوكس مەكتەبىنىڭ تۇلەگى كەزىندە اۋەسقويلار اراسىندا ءبىراز تابىسقا قول جەتكىزدى. سولاردىڭ اراسىنداعى ەڭ ءىرىسى – 2012 جىلى ۇلان-باتىردا وتكەن ازيا چەمپيوناتىنىڭ قولا مەدالى. ءشارىپوۆا 2016 جىلدان بەرى كاسىپقوي رينگتە باق سىناۋدا. ءوزىنىڭ تۇساۋكەسەر كەزدەسۋىندە ول وليمپيا ويىندارىنىڭ كۇمىس جۇلدەگەرى, الەمنىڭ ەكى جانە ەۋروپانىڭ ءۇش دۇركىن چەمپيونى, رەسەيلىك سوفيا وچيگاۆاعا قارسى وتكىزىپ, ۇپاي سانىمەن ەسە جىبەردى. ەسەسىنە سودان كەيىن قاتارىنان 14 جەكپە-جەكتە جەڭىسكە جەتتى. سەگىز كەزدەسۋدى مەرزىمىنەن بۇرىن اياقتادى. تانىمال باپكەر ەرىك العابەكتىڭ شاكىرتى بۇل كۇندەرى ءتۇرلى نۇسقالار بويىنشا التىن بەلبەۋدى يەلەنۋدە.
ليۆەرپۋلدە فيرۋزا ءشارىپوۆا ايگىلى كەتي تەيلورمەن كۇش سىناسادى. بۇل باسەكەدە جەڭىل سالماق دارەجەسى بويىنشا WBC, WBA, WBO جانە IBF نۇسقالارىنىڭ چەمپيوندىق بەلبەۋى ساراپقا سالىنادى. بىردەن ايتا كەتەيىك, بۇل جەكپە-جەكتىڭ ءفاۆوريتى – تەيلور. 35 جاستاعى يرلانديانىڭ برەي قالاسىنىڭ تۋماسى كەزىندە اۋەسقوي رينگتى ارمانسىز شايقاعان ەدى. 60 كيلو سالماق دارەجەسىندە سىنعا تۇسكەن ول 2006-2016 جىلدار ارالىعىندا لوندون وليمپياداسىنىڭ جەڭىمپازى, بەس دۇركىن الەم جانە التى دۇركىن ەۋروپا چەمپيونى اتاندى.
2012 جىلى لوندوندا الاۋى تۇتانعان وليمپيا ويىندارىنىڭ اشىلۋ سالتاناتىندا ءدال وسى كەتي يرلانديانىڭ تۋىن ۇستاپ شىققانى ەسىمىزدە. وزىنە ارتىلعان سەنىمدى تولىعىمەن اقتاعان ول تۇماندى البيوندا التىننان القا تاقتى. فينالدا تەيلور رەسەيلىك سوفيا وچيگاۆانى ۇتتى. كەزىندە ايتۋلى بوكسشى قارسىلاس شاق كەلتىرمەي, قاتارىنان بەس رەت الەم چەمپيوناتىندا توپ جارعانى جايىندا ءبىز جوعارىدا ايتتىق. سودان 2016 جىلى التىنشى رەت التىن الامىن دەپ استاناعا جۇلقىنىپ كەلگەن ەدى. بىراق قازاقستاننىڭ باس شاھارىندا كەتيدىڭ جولى بولمادى. جارتىلاي فينالدا ول بولاشاق الەم جانە وليمپيادا چەمپيونى, فرانتسيالىق ەستەل موسسەليگە ەسە جىبەردى.
جالپى, 2016 جىل كەتي تەيلور ءۇشىن اسا تابىستى بولمادى. استانادا قولا مەدالدى قاناعات تۇتقاننان كەيىن ول سول ولقىلىقتىڭ ورنىن ريو وليمپياداسىندا تولتىرامىن دەپ ويلادى. بىراق برازيليادا دا ونىڭ باعى جانبادى. شيرەك فينالدىق سايىستا تەيلور ويدا-جوقتا فينليانديالىق ميرا پاتكوننەنەن جەڭىلىپ قالدى. وسى ساتسىزدىكتەن كەيىن يرلانديانىڭ داڭقتى بوكسشىسى كاسىپقويلار اراسىندا كۇش سىناسۋعا بەل بۋدى. سول كەزدەن بەرى شارشى الاڭعا التى رەت كوتەرىلگەن كەتي بارلىق باسەكەنى ءوز پايداسىنا شەشىپ, ءتورت قارسىلاسىن نوكاۋتقا جىبەردى. مىنە, ليۆەرپۋلدەگى جارىستا ءبىزدىڭ فيرۋزا ءشارىپوۆانى وسىنداي مىقتى قارسىلاس كۇتىپ تۇر.
