كيىك اۋلاعاندارعا كەشىرىم جوق

كەشە, 27 اقپان كۇنى قىزىلوردا وبلىسىنىڭ پروكۋراتۋراسىندا وبلىس پروكۋرورى ساپاربەك نۇرپەيىسوۆتىڭ توراعالىعىمەن القا ءماجىلىسى وتكىزىلدى. وندا اۋلاۋعا تىيىم سالىنعان كيىكتى قورعاۋعا باعىتتالعان شارالار جانە بروكونەرلىك قىلمىستارمەن كۇرەسۋ, ونىڭ الدىن الۋ بارىسىندا اتقارىلىپ جاتقان جۇمىستار ماسەلەسى قارالدى.  بۇل تۋرالى وبلىستىق پروكۋراتۋرانىڭ ءباسپاسوز قىزمەتى حابارلادى. قازاقستان رەسپۋبليكاسى ۇكىمەتىنىڭ 2012 جىلعى 25 شىلدەدەگى №969 قاۋلىسىنىڭ 1-تارماعىمەن عىلىمي ماقساتتاردا پايدالانۋدان باسقا, رەسپۋبليكانىڭ بۇكىل اۋماعىندا كيىكتەردى, ولاردىڭ بولىكتەرى مەن دەريۆاتتارىن پايدالانۋعا 2020 جىلعا دەيىن تىيىم سالىنعان. سوندا دا بولسا, مەملەكەت تاراپىنان قولدانىلىپ جاتقان شارالارعا قاراماستان, اۋلاۋعا ارنايى تىيىم سالىنعان كيىكتەردى زاڭسىز اۋلاۋ, براكونەرلىك فاكتىلەرى جىلدان-جىلعا كوبەيۋدە. بۇعان 2013 جىلى براكونەرلىك فاكتىلەرىنىڭ 2012 جىلمەن سالىستىرعاندا 2 ەسەگە كوبەيگەنى ايعاق بولادى. جالپى, 2012 جىلى وبلىس كولەمىندە كيىكتەردى زاڭسىز اۋلاۋدىڭ 9 فاكتىسى تىركەلسە, وندا 59 باس كيىك زاڭسىز اۋلانىپ, وسى بويىنشا قورشاعان ورتاعا 15 ملن. 977 مىڭ تەڭگەنىڭ زالالى كەلگەن. اتالعان زالالدىڭ تەك 1 ملن. 496 مىڭ تەڭگەسى عانا ءوندىرىلىپ, زالالدىڭ ءوندىرىلۋ كورسەتكىشى نەبارى 10 پايىزدى عانا قۇراپ وتىر. ال 2013 جىلى وبلىس بويىنشا 22 فاكتى بويىنشا 44 باس كيىك زاڭسىز اۋلانىپ, 250 دانا كيىك ءمۇيىزى اينالىمنان الىنعان.  2014 جىلدىڭ تەك قاڭتار ايىنىڭ وزىندە عانا وسىنداي 10 فاكتىنىڭ سالدارىنان 35 باس كيىك ىسىراپقا ۇشىراعان. وسى ارقىلى قورشاعان ورتاعا 3 ملن. 518 مىڭ تەڭگە زالال كەلگەن. 2013 جىلى براكونەرلىكپەن اينالىسقان تۇلعالارعا قاتىستى قىلمىستىق كودەكستىڭ 290-بابى بويىنشا 22 قىلمىستىق ءىس قوزعالىپ, 18 قىلمىستىق ءىس سوتقا جولداندى. مىسالى, 2013 جىلى ارال اۋداندىق پروكۋراتۋراسىنىڭ ۇيىمداستىرۋىمەن جۇرگىزىلگەن رەيدتىك تەكسەرۋ بارىسىندا, «حوندا» ماركالى موتوكولىگى ۇستالعان. تەكسەرۋ جۇرگىزۋ بارىسىندا, قاپقا سالىنعان 1 باس كيىك اڭى, 6 دانا كيىك اڭىنىڭ ءمۇيىزى, 1 دانا قولدان جاسالعان پىشاق, 1 دانا قولاراسى ايعاق زات رەتىندە تاركىلەنىپ الىنعان. ورىن العان فاكتى بويىنشا اۋدان پروكۋراتۋراسى سەزىكتى رەتىندە ۇستالعان ن.ج.-عا قارسى قىلمىستىق ءىس قوزعالىپ, اۋداندىق سوتتىڭ ۇكىمىمەن 3 جىلعا باس بوستاندىعىن شەكتەۋ جازاسىنا سوتتى بولدى. القا شەشىمىمەن جوعارىداعىلاردىڭ نەگىزىندە كيىكتەردىڭ ءوسىپ-ءونۋىن ساقتاپ قالۋ, براكونەرلىككە قارسى كۇرەس پەن ونىڭ الدىن-الۋ, توسقاۋىل قويۋ, اشكەرەلەۋ جانە وسى باعىتتا قۇقىق بۇزۋشىلىقتىڭ پروفيلاكتيكاسىن جۇرگىزۋ ماقساتىندا ءاربىر مەملەكەتتىك ورگاندارعا اتقارىلاتىن شارالار بەلگىلەنىپ بەرۋ ۇسىنىلدى. قۇرىش نۇرىمبەت. دەرەككوز: قىزىلوردا وبلىستىق پروكۋراتۋراسىنىڭ ءباسپاسوز قىزمەتى.