قازاقستان رەسپۋبليكاسى پرەزيدەنتىنىڭ جارلىعى № 757

قازاقستان رەسپۋبليكاسىندا كاسىپكەرلىك قىزمەت ءۇشىن جاعدايدى جاقسارتۋ جونىندەگى تۇبەگەيلى شارالار تۋرالى قازاقستان رەسپۋبليكاسىندا كاسىپكەرلىك قىزمەت ءۇشىن جاعدايدى تۇبەگەيلى جاقسارتۋ ماقساتىندا قاۋلى ەتەمىن: 1. ورتالىق مەملەكەتتىك جانە جەرگىلىكتى اتقارۋشى ورگاندار 2014 جىلعى 2 ساۋىردەن باستاپ 2015 جىلعى 1 قاڭتارعا دەيىن: 1) شاعىن جانە ورتا بيزنەس سۋبەكتىسىنىڭ ءوزىنىڭ قىزمەتىنە قاتىستى ءوتىنىشى ولاردى جۇرگىزۋگە نەگىز بولىپ تابىلاتىن تەكسەرۋلەردى, وسى وتىنىشپەن بايلانىستى قارسى تەكسەرۋلەردى; 2) قارجىلىق ۇيىمداردى; 3) اتوم ەنەرگەتيكاسى, راديواكتيۆتىك زاتتار سالاسىن; 4) ۋلاردىڭ, قارۋ-جاراقتىڭ, اسكەري تەحنيكانىڭ جانە جەكەلەگەن قارۋ تۇرلەرىنىڭ, ونىڭ ىشىندە ازاماتتىق جانە قىزمەتتىك, جارىلعىش جانە پيروتەحنيكالىق زاتتار مەن ولاردى قولدانا وتىرىپ جاسالعان بۇيىمداردىڭ اينالىمى سالاسىنداعى جەكە جانە زاڭدى تۇلعالاردىڭ قىزمەتىن; 5) كونستيتۋتسيالىق قۇرىلىسقا, ۇلتتىق قاۋىپسىزدىككە, زاڭدىلىققا جانە قوعامدىق تارتىپكە تۋرا جانە تىكەلەي قاۋىپ-قاتەر توندىرەتىن ءىس-ارەكەتتىڭ الدىن الۋ نەمەسە جويۋ ماقساتىندا جۇرگىزىلەتىن تەكسەرۋلەردى قوسپاعاندا, شاعىن جانە ورتا كاسىپكەرلىك سۋبەكتىلەرىن تەكسەرۋلەردى توقتاتسىن. وسى تارماقتىڭ 3)-5) تارماقشالارىندا كورسەتىلگەن تەكسەرۋلەر قازاقستان رەسپۋبليكاسىنىڭ باس پروكۋراتۋراسىمەن كەلىسىلگەن, ورتالىق مەملەكەتتىك نەمەسە جەرگىلىكتى اتقارۋشى ورگاننىڭ ءبىرىنشى باسشىسىنىڭ شەشىمى نەگىزىندە جۇرگىزىلەدى دەپ بەلگىلەنسىن. 2. كاسىپكەرلىك سۋبەكتىلەرىن جوسپارلى تەكسەرۋلەر 2015 جىلعى 1 قاڭتاردان باستاپ بولماسىن. 3. قازاقستان رەسپۋبليكاسىنىڭ ۇكىمەتى: 1) مىناداي زاڭ جوبالارىن: 2014 جىلعى 1 ساۋىرگە دەيىن – رۇقساتتار مەن حابارلامالاردىڭ ناقتىلى تىزبەسىن, ولاردى بەرۋ ءتارتىبىن رەگلامەنتتەۋ, ونىڭ ىشىندە كاسىپكەرلىك سۋبەكتىلەرىنە رۇقساتتار جۇيەسى سالاسىندا زاڭناماعا رەتتەۋشىلىك ىقپالىن تالداۋ قاعيداتىن ەنگىزۋدى كوزدەيتىن ماسەلەلەر بويىنشا; 2014 جىلعى 1 قىركۇيەككە دەيىن – قازاقستان رەسپۋبليكاسىندا كاسىپكەرلىك قىزمەت ءۇشىن جاعدايدى تۇبەگەيلى جاقسارتۋ ماسەلەلەرى بويىنشا مىنالاردى: تاۋەكەلدەردى باعالاۋ نەگىزىندە تەكسەرۋلەردى ۇيىمداستىرۋعا كوشۋدى, سونداي-اق كاسىپكەرلىك سۋبەكتىلەرىنىڭ جاۋاپكەرشىلىگىن ساقتاندىرۋ مۇمكىندىگىن كاسىپكەرلىك سۋبەكتىلەرىن تەكسەرۋدىڭ بالاماسى رەتىندە ەنگىزۋدى; كاسىپكەرلىك سۋبەكتىلەرىنە قويىلاتىن مەملەكەتتىك باقىلاۋ مەن قاداعالاۋدى جۇزەگە اسىرۋ بارىسىندا تەكسەرۋگە جاتاتىن تالاپتاردى قىسقارتۋدى; شاعىن جانە ورتا كاسىپكەرلىك سۋبەكتىلەرىن تاراتۋ رەسىمدەرىن جەڭىلدەتۋدى; ۇلتتىق كاسىپكەرلەر پالاتاسىنىڭ ءرولىن كۇشەيتۋدى, ونىڭ ىشىندە كاسىپكەرلەر قۇقىقتارى جونىندەگى ۋاكىل ينستيتۋتىن ەنگىزۋدى; قازاقستان رەسپۋبليكاسىندا كاسىپكەرلىك قىزمەت ءۇشىن جاعدايدى تۇبەگەيلى جاقسارتۋعا باعىتتالعان وزگە دە شارالاردى كوزدەيتىن; 2015 جىلعى 1 قاڭتارعا دەيىن – ءوزىن ءوزى رەتتەيتىن ۇيىمدار قىز­مەتىنىڭ ماسەلەلەرى بويىنشا زاڭ جوبالارىن ازىرلەسىن جانە قازاقستان رەسپۋبليكاسىنىڭ پارلامەنتى ءماجىلىسىنىڭ قاراۋىنا ەنگىزسىن; 2) قازاقستان رەسپۋبليكاسىنىڭ پرەزيدەنتى اكىمشىلىگىمەن كەلىسىم بويىنشا 2015 جىلعى 1 قاڭتارعا دەيىن مەملەكەتتىك ورگانداردىڭ تاۋەكەلدەردى باعالاۋ جۇيەسىن قالىپتاستىرۋ ادىستەمەسىن (قازاقستان رەسپۋبليكاسىنىڭ ۇلتتىق بانكىن قوسپاعاندا) بەكىتسىن; 3) قازاقستان رەسپۋبليكاسىنىڭ كاسىپكەرلىك كودەكسى جوباسىندا كاسىپكەرلىك قىزمەتتى مەملەكەتتىك رەتتەۋ تۋرالى زاڭنامالىق اكتىلەردىڭ نورمالارىن توپتاستىرسىن; 4) 2015 جىلعى 1 قاڭتارعا دەيىن رۇقساتتار بەرۋدى اۆتوماتتاندىرۋدى اياقتاسىن; 5) وسى جارلىقتى ىسكە اسىرۋ جونىندەگى وزگە دە شارالاردى قابىلداسىن. 4. قازاقستان رەسپۋبليكاسىنىڭ باس پروكۋراتۋراسى وسى جارلىقتىڭ 1-تارماعىن ىسكە اسىرۋ بارىسىندا زاڭدىلىقتىڭ مۇلتىكسىز ساقتالۋىن قاداعالاۋدى قامتاماسىز ەتسىن. 5. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن. 6. وسى جارلىق قول قويىلعان كۇنىنەن باستاپ قولدانىسقا ەنگىزىلەدى. قازاقستان رەسپۋبليكاسىنىڭ پرەزيدەنتى ن.نازارباەۆ. استانا, اقوردا, 2014 جىلعى 27 اقپان. № 757