مەموراندۋمنىڭ ماقساتى – ۋنيۆەرسيتەت ستۋدەنتتەرىنە كاسىبي داعدىلاردى دامىتۋعا, ءبىلىم الۋشىلاردىڭ تاعىلىمدامادان ءوتۋى مەن تۇلەكتەردىڭ جۇمىسقا ورنالاسۋىنا كومەك كورسەتۋ, جاستار ساياساتى سالاسىنداعى ءتيىمدى ىنتىماقتاستىق ەسەبىنەن زياتكەرلىك ەليتانى قالىپتاستىرۋعا باعىتتالعان باسىمدىقتاردى, بىرلەسكەن مادەني-ءبىلىم بەرۋ باعدارلامالارى مەن جوبالارىن جۇزەگە اسىرۋ, جوعارى وقۋ ورىندارى مەن جالپى ءبىلىم بەرەتىن مەكتەپ وقىتۋشىلارىنىڭ بىلىكتىلىگىن ارتتىرۋ.
مەموراندۋم اياسىندا وسكەلەڭ ۇرپاقتىڭ ازاماتتىق ساناسىن قالىپتاستىرۋ ءۇردىسىن عىلىمي-تالدامالىق جانە ساراپتامالىق قامتاماسىز ەتۋ جانە جالپى جانە قوسىمشا ءبىلىم بەرۋدىڭ قۇرىلىمى مەن مازمۇنىن جەتىلدىرۋدى عىلىمي-ادىستەمەلىك قامتاماسىز ەتۋ, نىسانالى الەۋمەتتىك ماڭىزى بار جوبالار مەن ءىس-شارالاردى بىرلەسىپ ۇيىمداستىرۋ, تاراپتاردىڭ قىزمەتىن جاقسارتۋعا باعىتتالعان بىرلەسكەن يننوۆاتسيالىق جوبالاردى دايىنداۋ جانە ءجۇزەگە اسىرۋ, سونىمەن بىرگە ءبىلىم, عىلىم جانە مادەنيەت سالالارىندا تاجىريبە مەن بىلىممەن, سونداي-اق ءوزارا قىزىعۋشىلىق تۋدىراتىن اقپاراتپەن الماسۋ كوزدەلگەن.
دارحان ءبىلالوۆ اباي ۋنيۆەرسيتەتى ەءلىمىزدىڭ پەداگوگيكالىق ءبىلىمىنىڭ فلاگمانى رەتىندە مەكتەپتەرمەن ءوزارا ىنتىماقتاستىقتىڭ باسىمدىعىنا توقتالدى. «قالانىڭ 9 مەكتەبىندە كافەدرا وكىلدىكتەرى بار, ءبىزدىڭ وقىتۋشىلارىمىز جىل سايىن فورۋمدار مەن سەمينارلار وتكىزەدى جانە بۇل جۇمىس جالعاسا بەرەرى ءسوزسىز. سوڭعى ەكى جىلدا ءبىزدىڭ پەداگوگتار مەكتەپتەرگە ارنالعان 800-دەن استام وقۋلىق دايىندادى. پەداگوگ كادرلاردى دايارلاۋ يننوۆاتسيالىق نىساندا دۋالدى ءبىلىم بەرۋ ەلەمەنتتەرىن پايدالانا وتىرىپ جۇزەگە اسىرىلادى, ونىڭ اياسىندا 4-ءشى كۋرستا ۇزدىكسىز پراكتيكا جۇرگىزىلەدى. بىزدە ءبىلىم بەرۋدى دامىتۋعا جانە ءبىلىم بەرۋ ۇيىمدارىن بىرىكتىرەتىن پەداگوگيكالىق قولداۋعا باعىتتالعان بىرقاتار يدەيالار بار. ءبىزدىڭ ءوزارا ءتيىمدى ىنتىماقتاستىعىمىز وسى باعىتتا جالعاسادى دەپ سەنەمىن», دەپ اتاپ ءوتتى دارحان ءبىلالوۆ.
الماتى قالالىق ءبىلىم باسقارماسىنىڭ باسشىسى ءلاززات جىلقىباەۆا تاراپتار دۋالدى تاجىريبەنى كەڭەيتەتىنىن ايتىپ, «ينفورماتيكا-روبوتوتەحنيكا» ءبىلىم بەرۋ باعدارلاماسى ماماندارىنىڭ قاجەتتىگىن اتاپ ءوتتى.
وسى مەموراندۋم اياسىندا قازاقستان رەسپۋبليكاسىندا ءبىلىم بەرۋدى جانە عىلىمدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىنداعى «قازاقستاندىق ءبىلىم مەن عىلىمنىڭ جاھاندىق باسەكەگە قابىلەتتىلىگىن ارتتىرۋ جانە جالپىادامزاتتىق قۇندىلىقتار نەگىزىندە تۇلعانى تاربيەلەۋ جانە وقىتۋ» ماقساتىنا سايكەس ۋنيۆەرسيتەتتىڭ جان-جاقتى پراكتيكالىق دامۋىن جاقسارتۋ ءۇشىن «جوو + مەكتەپ = جوعارى ساپالى مامان» جانە «بولاشاق پەداگوگ» جوبالارىن ىسكە اسىرۋ ۇسىنىلدى. بۇل جوبالار ورتا ءبىلىم بەرۋدى دامىتۋعا باعىتتالعان. وسى ورايدا ۆەدومستۆولىق باعىنىستاعى مەكتەپتەردەن 3 باعىتتاعى مەكتەپتەر انىقتالىپ, انىقتالعان مەكتەپتەردىڭ ءالسىز تۇستارى تالدانادى. ۋنيۆەرسيتەت تاراپىنان جۇمىس توبى قۇرىلىپ, مەكتەپتىڭ ءار باعىتى بويىنشا دامىتۋ جۇمىستارى جۇرگىزىلەتىن بولادى.
