ۇلتتىق ونەرىمىزگە كورسەتىلگەن بۇل قۇرمەت شىن مانىندە قازاق كينەماتوگرافىنىڭ مەرەيى ەكەنى ءسوزسىز. قاراشانىڭ 8-12-ءى ارالىعىندا تۇركيادا العاش رەت وتكىزىلگەلى وتىرعان Korkut Ata كينوفەستيۆالىنە بيىل 13 ەلدەن بارلىعى 42 كينوتۋىندى قاتىسادى. فەستيۆال شەڭبەرىندە قازاقستان, ازەربايجان, قىرعىزستان, وزبەكستان, تاتارستان سىندى تۇركى الەمى ەلدەرىنىڭ كينوگەرلەرى ءتۇرلى باعىتتا, سونىڭ ىشىندە تاريحي, فانتاستيكا, دەرەكتى جانە انيماتسيا جانرىندا تۇسىرىلگەن ۇزدىك تۋىندىلارىن ۇسىناتىن بولادى.
قازاقستاننىڭ اتىنان اتالعان فيلم-شەرۋگە بىرنەشە كوركەمتۋىندى قاتىسادى. فەستيۆالدىڭ باستى بايقاۋلارىنىڭ ءبىرى – كوركەم فيلمدەر باعدارلاماسىندا رۇستەم ابدىراشەۆتىڭ «قازاق حاندىعى. التىن تاق» كوركەم ءفيلمى, دەرەكتى فيلمدەر بايقاۋىندا رەجيسسەر باقىت قايىربەكوۆتىڭ «قۇتىدا جانعان الاۋ» تۋىندىسى باق سىنايدى. ال انيماتسيالىق فيلمدەر بايقاۋىندا اداي ابەلدينوۆتىڭ «كۇلتەگىن» تاريحي تولىقمەترلى انيماتسيالىق ءفيلمى كورسەتىلەدى.
سونىمەن قاتار, فەستيۆالدىڭ تاريحي تۋىندىلارىنا ارنالعان باعدارلاماسىندا ساتىبالدى نارىمبەتوۆتىڭ «امانات» ءفيلمى كورسەتىلسە, ال «زاماناۋي فانتاستيكا» بايقاۋىندا كورەرمەندەرگە بەكارىس ەلۋبايدىڭ «وازيس» ءفيلمى ۇسىنىلاتىن بولادى.
Korkut Ata Turkic World Film Festival كينوفەستيۆالىنىڭ تۇساۋىن كەسۋ مارتەبەسى بۇيىرعان «توميريس» ءفيلمى تۇرىك جۇرتشىلىعىنا تاڭسىق ەمەس, از ۋاقىت ىشىندە تۇركيا ەلىنە كەڭىنەن تانىلىپ, كورەرمەننىڭ سۇيىسپەنشىلىگىنە بولەنىپ ۇلگەرگەن ۇزدىك تۋىندىلاردىڭ ءبىرى. ولاي دەيتىنىمىز, وسىدان تۋرا ءۇش جىل بۇرىن – 2019 جىلى مادەنيەت جانە سپورت مينيسترلىگىنىڭ تاپسىرىسى بويىنشا Sataifilm كومپانياسىنىڭ قاتىسۋىمەن «قازاقفيلم» كينوستۋدياسى تۇسىرگەن قازاقستاندىق تۋىندى بيىل قىركۇيەك ايىندا تۇركيادا پروكاتقا شىعىپ, 200-دەن استام كينوتەاتردا كورسەتىلگەن بولاتىن. ەندى مىنە, سول «توميريسكە» تۇركى الەمىنە ورتاق فەستيۆالدىڭ شىمىلدىعىن ءتۇرۋ باقىتى بۇيىردى.
تۇركيادا وتەتىن كينوفەستيۆالگە قازاقستاننىڭ اتىنان كسرو حالىق ءارتىسى, ەڭبەك ەرى ءاسانالى ءاشىموۆ, «قازاقفيلم» كينوستۋدياسىنىڭ پرەزيدەنتى اقان ساتاەۆ, كينوستۋديانىڭ ءوندىرىس بويىنشا ۆيتسە-پرەزيدەنتى ايدار باتالوۆ, «ۇلتتىق كينونى قولداۋ مەملەكەتتىك ورتالىعى» كەاق باس پروديۋسەرى اداي ءابىلدينوۆ, قازاقستاننىڭ ەڭبەك سىڭىرگەن قايراتكەرى بەرىك ايتجانوۆ, اكتريسالار – ءالميرا تۇرسىن مەن ارۋجان جازىلبەكوۆا, رەجيسسەر نۇرعيسا ءالمۇرات, پروديۋسەر نۇرلان قويانباەۆ باستاعان كينو ونەرىنىڭ مايتالماندارى قاتىستى.
