جاڭادان بوي كوتەرەتىن گەولوگيالىق زەرتتەۋ ورتالىعى ءۇشىن بار قاجەتتى شارالار جاسالۋدا. بۇل تۋرالى «24 kz» حابارلادى.
جوعارىدا اتالعان نىسانعا نازارباەۆ ۋنيۆەرسيتەتى اۋماعىنداعى عىلىمي پاركتىڭ ماڭىنان 50 گەكتار جەر ءبولىندى. قۇرىلىس جۇمىستارى وسى جىلى باستالادى. ال بۇگىن «قازگەولوگيا» ۇلتتىق گەولوگيالىق بارلاۋ كومپانياسى مەن نازارباەۆ ۋنيۆەرسيتەتى جانىنداعى يننوۆاتسيالىق زياتكەرلىك كلاستەرى اراسىندا گەولوگيالىق زەرتتەۋ ورتالىعىن قۇرۋ تۋرالى مەموراندۋمعا قول قويىلدى. ونىڭ باستى ماقساتى – زاماناۋي تەحنولوگيالاردى قولدانا بىلەتىن گەولوگ ماماندار دايارلاۋ. ءارى عىلىمدى دامىتۋ ارقىلى تابيعات بايلىعىن ءتيىمدى يگەرۋ كۇن تارتىبىندە تۇر.
«قازىر بىزدەگى كەن ساقتاۋ ورىندارى دۇنيەجۇزىلىك ساپاعا سايكەس ەمەس. سوندىقتان گەولوگيالىق كلاستەردى وڭتايلاندىرۋ قاجەت»,-دەدى «قازگەولوگيا» ۇلتتىق گەولوگيالىق بارلاۋ كومپانياسى اق باسقارما توراعاسى عالىم نۇرجانوۆ.
ع. نۇرجانوۆ وسىنىڭ الدىندا بۇقارالىق اقپارات قۇرالى وكىلىنە بەرگەن سۇحباتىندا كەزىندە گەولوگيا سالاسىنا زەرتتەۋ جۇرگىزۋدە جەكەلەگەن مەملەكەتتەرگە تاۋەلدى بولعانىمىزدى جاسىرمادى. كەي كەزدەرى سىنامالاردىڭ قورىتىندىسىن الۋ دا وڭاي بولماعان.
جالپى, بەيرەسمي دەرەككە جۇگىنسەك, قازىرگى كەزدە ەلىمىزدە نەبارى گەولوگ ماماندارىن دايارلايتىن ەكى جوعارى وقۋ ورنى بار ەكەن. ەندى جاڭادان اشىلاتىن زەرتتەۋ ورتالىعى بۇل سالانىڭ تىنىسىن كەڭەيتۋدى, ءتۇيىندى تۇيتكىلدەر ءتىنىن تارقاتۋدى كوزدەپ وتىر.
ءامىرحان الماعانبەتوۆ.
دەرەككوز: «24 kz».
فوتو: lussian.people.com.cn.
