قوستانايدا بۇرىنعى سۋديالار سوتتالدى

قوستاناي وبلىسىندا قالالىق سوتتىڭ بۇرىنعى توراعاسى سامالبەك مۇحتاروۆ پەن ەكس-سۋديا سەرىك قاشقىنباەۆتىڭ ارەكەتتەرىنە قاتىستى ۇكىم شىعارىلدى. بۇل تۋرالى «حابار» تەلەارناسى حابارلادى. سوت پروتسەسى كەزىندە پروكۋراتۋرا قىزمەتكەرى ولاردىڭ كىناسى تولىق دالەلدەنگەنىن ايتتى.وعان ايعاق رەتىندە بەينەجازبالار بار. جالپى, قىلمىستىق ىستە ەكەۋىنىڭ سوت ءىسىن جەكە ادامنىڭ پايداسىنا شەشىپ بەرمەكشى بولىپ, تاراپتاردىڭ بىرىنەن پارا العانى جازىلعان. بۇل ماسەلەگە قاتىستى بۇعان دەيىن دە بۇقارالىق اقپارات قۇرالىندا بىرنەشە دايەكتەمە ايتىلدى. سول وتكەن جىلدان باستاۋ العان كەلەڭسىزدىك ارەكەتكە بيىل نۇكتە قويىلىپ وتىر. №2 قوستاناي قالالىق سوتىنىڭ سۋدياسى ەرجان شىڭعىسوۆتىڭ شىعارعان ۇكىمى بويىنشا ايىپكەردىڭ بىرىنە مىناداي جازا تاعايىندالدى:  «سوت سامالبەك مۇحتاروۆتى قىلمىستىق كودەكستىڭ 24 بابىنىڭ 3-ءشى تارماعى, 311 باپتىڭ 3-ءشى تارماعى جانە 311 باپتىڭ 4-ءشى تارماعى بويىنشا كىنالى دەپ تانىدى. سونداي-اق, قىلمىستىق كودەكستىڭ 58 بابىنىڭ 3-ءشى تارماعى نەگىزىندە س.مۇحتاروۆقا دۇنيە-مۇلكىن تاركىلەۋ جانە 7 جىلعا باس بوستاندىعىنان ايىرۋ جازاسى تاعايىندالسىن». كەلەسى ايىپكەر س. قاشقىنباەۆ سوت ۇكىمىمەن جالپى رەجيمدەگى كولونيادا 5 جىل جازاسىن وتەيتىن بولدى. ءامىرحان الماعانبەتوۆ. دەرەككوز: «حابار» تەلەارناسى. فوتو: «حابار» تەلەارناسى.