سىر بويى ءۇشىن جاڭالىق سانالاتىن جاۋىنقۇرت ءوسىرىپ, تىڭايتقىش ساۋدالاۋدى باستاپ كەتكەن سەرىكتەس جىگىتتەر بۇل بيزنەستىڭ بولاشاعىنا سەنەدى. جۋىردا اۋدان اكىمى مۇحتار ورازباەۆ وسى كاسىپتى قولعا العان ازاماتتارمەن كەزدەسىپ, ولاردىڭ بولاشاقتاعى جوبا-جوسپارىمەن تانىستى.
كاسىپكەر ءسابيت ارالباەۆتىڭ ايتۋىنشا, ولار ءوسىرىپ جاتقان كاليفورنيالىق قىزىل قۇرتتىڭ قورشاعان ورتاعا زارەدەي دا زالالى جوق, كەرىسىنشە توپىراعىن سور باسىپ تۇراتىن سىر ءوڭىرى ءۇشىن اسا قاجەت باستاما.
– كاليفورنيالىق قىزىل قۇرتتاردىڭ «تاماعى» – ورگانيكالىق قالدىقتار. جاپىراقتىڭ ءشىرىندىسىن, مالدىڭ تەزەگىن تالعاماي جەي بەرەدى. ونى وڭدەپ, بيولوگيالىق تىڭايتقىش جاسايدى. سوندىقتان دا ونىڭ قورەگىنەن كوپ قينالا قويمايمىز. جەر سورلانۋدان بولەك قۇرعاپ كەتكەندە دە وسى بيوتىڭايتقىشتىڭ كومەگى كوپ, – دەيدى كاسىپكەر.
بۇل جاندىك 1959 جىلى اقش-تىڭ كاليفورنيا شتاتىندا جاۋىنقۇرتتاردىڭ ءار ءتۇرىن بۋدانداستىرۋ ارقىلى پايدا بولعان. ءبىزدىڭ ەلىمىزگە 2004 جىلدان باستاپ كەلە باستادى. كادۋىلگى شىلاۋشىننان 5-6 ەسە تەز كوبەيەدى. جەرگىلىكتى جاۋىنقۇرتتار 3-4 جىل, ال كاليفورنيالىق ءتۇرى 16 جىل ءومىر سۇرەدى. قۇرت ءوسىرۋدى قولعا العان ازاماتتار الداعى ۋاقىتتا 15 گەكتار اۋماققا جىلىجاي سالۋعا بەل بۋىپ وتىر. تەك بۇل ءۇشىن ينفراقۇرىلىم قاجەت. كاسىپكەرلەر اۋدان اكىمى مۇحتار ورازباەۆقا وسى جاعىنان كومەك بەرىپ, قولداۋ كورسەتۋىن سۇرادى. اۋدان باسشىسى تىڭ ءىس باستاعان تالاپتى جىگىتتەرگە كومەك كورسەتۋگە ۋادە بەردى.
