اتامىز قازاق «جەل سوقپاسا, ءشوپتىڭ باسى قيمىلدامايدى» دەپ تەككە ايتپاعان بولار. جىلقى جىلى بوساعانى اتتاماي جاتىپ, وسكەمەندە شىعاتىن «موي گورود» دەگەن قالالىق گازەتتە «ساۋلەتىمىز ارتا تۇسپەك نەمەسە وسكەمەندە جاڭا ەسكەرتكىشتەر كوبەيە تۇسە مە؟» دەگەن شاعىن ماقالا جارىق كوردى. وسىعان وراي شىعىس قازاقستان وبلىستىق مادەنيەت جانە مۇراعات باسقارماسىنىڭ باستىعى نۇربولات احمەتجانوۆ اقپارات قۇرالدارى وكىلدەرىمەن بريفينگ وتكىزدى.
اتامىز قازاق «جەل سوقپاسا, ءشوپتىڭ باسى قيمىلدامايدى» دەپ تەككە ايتپاعان بولار. جىلقى جىلى بوساعانى اتتاماي جاتىپ, وسكەمەندە شىعاتىن «موي گورود» دەگەن قالالىق گازەتتە «ساۋلەتىمىز ارتا تۇسپەك نەمەسە وسكەمەندە جاڭا ەسكەرتكىشتەر كوبەيە تۇسە مە؟» دەگەن شاعىن ماقالا جارىق كوردى. وسىعان وراي شىعىس قازاقستان وبلىستىق مادەنيەت جانە مۇراعات باسقارماسىنىڭ باستىعى نۇربولات احمەتجانوۆ اقپارات قۇرالدارى وكىلدەرىمەن بريفينگ وتكىزدى.
– بىرقاتار باق-تا وسكەمەن قالاسىنىڭ 300 جىلدىق مەرەيتويىنا وراي قالادا ءى پەتردىڭ ەسكەرتكىشىن ورناتۋ جوسپارى تۋرالى اقپارات جاريالانعانى بەلگىلى. بۇل ماسەلەنى تالقىلاپ, ۋشىقتىرۋعا ەش نەگىز جوق. سانكت-پەتەربۋرگ پەن وسكەمەن قالاسى باسشىلىعى اراسىندا ەسكەرتكىش ورناتۋ تۋرالى رەسمي كەلىسىم بولعان ەمەس, بولمايدى دا. مەملەكەتتىك كوميسسياعا ءى پەترگە ەسكەرتكىش ورناتۋ تۋرالى ۇسىنىس جاسالعان جوق. بۇل اقپارات قاۋەسەت, ەل اۋزىنداعى قاڭقۋ ءسوز عانا, – دەپ نۇربولات احمەتجانوۆ كەسىپ ايتتى.
قوعام وكىلدەرىمەن كەزدەسۋدە وبلىس باسشىلىعى تاراپىنان قالانىڭ دامۋىنا سۇبەلى ۇلەس قوسقان تۇلعالاردىڭ ەسىمدەرىن تاريحي جادىدا ماڭگىلىك ساقتاۋدىڭ قۇپتارلىق ءىس ەكەندىگى جايلى ايتىلعان بولاتىن. وسىلايشا, 2013 جىلى وبلىس ورتالىعىندا بەلگىلى قوعام قايراتكەرى ا.پروتوزانوۆتىڭ, ەڭبەك سىڭىرگەن مەتاللۋرگ ءارى حالىق قاھارمانى احات كۇلەنوۆتىڭ كەۋدە مۇسىندەرى جانە اتاقتى جازۋشى, دراماتۋرگ ورالحان بوكەيدىڭ ەسكەرتكىشتەرى ورناتىلدى.
ءبىز وسكەمەن قالاسىنىڭ اكىمى تەمىربەك قاسىمجانوۆقا جولىعىپ, ماقالا اۆتورى ا.كۋپريانوۆانىڭ پەتر ءبىرىنشىنىڭ ەسكەرتكىشىن ورناتۋعا قالا باسشىلىعىنىڭ كەلىسىم بەردى دەپ جازعانى راس پا دەپ سۇراعانىمىزدا, بۇل سوزدەر شىندىققا جاناسپايدى, ونداي اڭگىمە بولعان جوق, دەپ جاۋاپ بەردى. ەندەشە, ويعا كەلگەنىن جازىپ, تىنىش جاتقان حالىقتى ءدۇرلىكتىرەتىندەي گازەتكە نە كورىندى ەكەن؟!
وڭداسىن ەلۋباي,
«ەگەمەن قازاقستان».
وسكەمەن.
