اتىراۋداعى ەڭ ءىرى اۋداننىڭ ءبىرى – جىلىوي. وسى اۋداننىڭ اۋماعىنداعى «قاراشۇڭگىل» كەن ورنىنان بۇدان 115 جىل بۇرىن قازاق مۇنايىنىڭ العاشقى تامشىسى الىنعان. سودان بەرى جىلىويلىقتار «قارا التىن» سەلىن ءالى تاسىتىپ كەلەدى. ەلىمىز ءتاۋەلسىزدىك العان تۇستا وسىنداعى «تەڭىز» كەن ورنىن يگەرۋ ءۇشىن العاشقى ينۆەستور – «شەۆرون» كورپوراتسياسىنىڭ بىرلەسكەن كاسىپورىنى قۇرىلدى. قازىر اتالعان كەن ورنىندا وسى اۋداننىڭ تۇرعىندارى دا جۇمىس جاسايدى. ەلۋ بەس مىڭ تۇرعىنى بار اۋدان ورتالىعى – قۇلسارىعا شاعىن قالا مارتەبەسى بەرىلدى. مىنە, وسىنىڭ ءبارى جىلىويلىقتاردىڭ تاۋەلسىز ەل ەرتەڭىنە دەگەن سەنىمىن نىعايتا تۇسكەنى داۋسىز.
اتىراۋداعى ەڭ ءىرى اۋداننىڭ ءبىرى – جىلىوي. وسى اۋداننىڭ اۋماعىنداعى «قاراشۇڭگىل» كەن ورنىنان بۇدان 115 جىل بۇرىن قازاق مۇنايىنىڭ العاشقى تامشىسى الىنعان. سودان بەرى جىلىويلىقتار «قارا التىن» سەلىن ءالى تاسىتىپ كەلەدى. ەلىمىز ءتاۋەلسىزدىك العان تۇستا وسىنداعى «تەڭىز» كەن ورنىن يگەرۋ ءۇشىن العاشقى ينۆەستور – «شەۆرون» كورپوراتسياسىنىڭ بىرلەسكەن كاسىپورىنى قۇرىلدى. قازىر اتالعان كەن ورنىندا وسى اۋداننىڭ تۇرعىندارى دا جۇمىس جاسايدى. ەلۋ بەس مىڭ تۇرعىنى بار اۋدان ورتالىعى – قۇلسارىعا شاعىن قالا مارتەبەسى بەرىلدى. مىنە, وسىنىڭ ءبارى جىلىويلىقتاردىڭ تاۋەلسىز ەل ەرتەڭىنە دەگەن سەنىمىن نىعايتا تۇسكەنى داۋسىز.
ال وتكەن اپتادا جىلىوي اۋدانىنىڭ تۇرعىندارىن, اسىرەسە, مەكتەپ وقۋشىلارىن ۇلكەن قۋانىشقا كەنەلتكەن جاڭا مەكتەپتىڭ تۇساۋى كەسىلدى. ولاي دەيتىنىمىز, وسى كەزگە دەيىن قويناۋىنان «قارا التىن» ۇزدىكسىز توننالاپ الىنسا دا, بۇل اۋداندا مەكتەپتىڭ ازدىعى الاڭداتاتىن. سول سەبەپتەن, وسى كەزگە دەيىن قۇلسارى قالاسىنىڭ وقۋشىلارى وسىنداعى مەكتەپتەردە ءۇش اۋىسىممەن وقۋعا ءماجبۇر ەدى. ەندى قۇلسارى قالاسىنىڭ وقۋشىلارى سول قيىندىقتان قۇتىلدى. جەرگىلىكتى بيۋدجەتتەن قارجىلاندىرىلعان جاڭا مەكتەپتىڭ قۇرىلىسىن «مۇناي قۇرىلىس سەرۆيس لتد» جشس جۇرگىزىپتى.
جاڭا مەكتەپتىڭ اشىلۋى وسىنداعى ءۇش اۋىسىممەن وقىتاتىن №9 ورتا مەكتەپتىڭ جۇمىسىن جەڭىلدەتتى, دەيدى ءبىلىم ورداسىنىڭ ديرەكتورى دوسمۇحان ءىلياسوۆ. بۇدان بىلاي بۇل مەكتەپتە №20 ورتا مەكتەپتىڭ وقۋشىلارى وقيتىن بولدى. وسىلايشا, جاڭا مەكتەپتە 466 وقۋشىنى 36 مۇعالىم ءىلىم-بىلىمگە باۋليدى. مۇنداعى سىنىپ كابينەتتەرى زامان تالابىنا ساي, ءۇش سىنىپتا ينتەراكتيۆتى تاقتا ورناتىلىپتى. ەكى لينگوفوندىق-مۋلتيمەديالىق, سونىمەن ءبىرگە, 48 جاڭا كومپيۋتەرمەن جابدىقتالعان كابينەتتەر بار. باستاۋىش سىنىپتاردىڭ 217 وقۋشىسى تەگىن ىستىق تاماقپەن قامتىلعالى وتىر.
– ەلباسى نۇرسۇلتان نازارباەۆ حالىققا جىل سايىنعى جولداۋلارىندا ءبىلىم سالاسى مەن ونىڭ ساپاسىنا ۇلكەن كوڭىل ءبولىپ كەلەدى, – دەدى مەكتەپتىڭ اشىلۋ سالتاناتىندا وبلىس اكىمىنىڭ ورىنباسارى شىڭعىس مۇقان. – جاڭا مەكتەپتىڭ اشىلۋى ەلدىڭ بولاشاعىنا قالانعان مىقتى ىرگەتاس. جاڭا ءبىلىم ورداسى «№8 ورتا مەكتەپ» دەپ اتالادى. سەگىز سانى – ماڭگىلىكتىڭ, شەكسىزدىكتىڭ, كەڭدىكتىڭ بەلگىسى. مەكتەپتىڭ ماقساتى – ماڭگى, جاس ۇرپاقتىڭ الار ءبىلىمى شەكسىز بولسىن!
جىلىوي اۋدانىنىڭ اكىمى ماقسىم ءىزباسوۆتىڭ ايتۋىنشا, بۇرىنعى №20 ورتا مەكتەپتىڭ ەسكى عيماراتىن 140 ورىندىق بالاباقشاعا اينالدىرۋ كوزدەلىپ وتىر. الداعى كوكتەمدە ىسكە قوسىلاتىن بالاباقشاعا «اينالايىن» اتاۋى بەرىلمەك.
جولداسبەك شوپەعۇل,
«ەگەمەن قازاقستان».
اتىراۋ وبلىسى,
جىلىوي اۋدانى.
–––––––––––––––––
سۋرەتتى تۇسىرگەن
راحىم قويلىباەۆ.
