بۇگىن, 20 قاڭتاردا وڭتۇستىك قازاقستان وبلىسىنىڭ اكىمدىگىندە پرەزيدەنت نۇرسۇلتان نازارباەۆتىڭ «قازاقستان-2050: ءبىر ماقسات, ءبىر مۇددە, ءبىر بولاشاق» اتتى جولداۋىندا ايتىلعان مىندەتتەردى جەرگىلىكتى جەرلەردە ىسكە اسىرۋ جولدارىن ناقتىلاۋ ماقساتىندا اكتيۆ جيىنى ءوتتى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
جيىندا وبلىس اكىمى اسقار مىرزاحمەتوۆ (1-سۋرەتتە) كۇن تارتىبىندەگى ماسەلە وراي بايانداما جاسادى. ول ءوز سوزىندە: «جاڭا جولداۋ قازاقستاننىڭ جاڭا بەلەستەردى باعىندىرۋىنا, جوعارى ەكونوميكالىق كورسەتكىشتەرگە قول جەتكىزىپ, قارقىندى دامىعان مەملەكەتكە اينالۋىنا جول اشادى... جەرلەستەرىمىز ەجەلدەن ەڭبەكقورلىعىمەن, تاتۋلىعىمەن, باسەكەگە قابىلەتتىلىگىمەن تانىمال. بۇل جۇكتەلگەن جاڭا مىندەتتەردىڭ ورىندالۋىنا ۇلكەن نەگىز بولادى», - دەپ اتاپ كورسەتتى.
ايماق باسشىسى ەلباسىنىڭ جولداۋدا شاعىن جانە ورتا بيزنەس كولەمىن 2050 جىلعا قاراي ەزىمىزدىڭ جالپى ىشكى ءونىمىنىڭ 50 پايىزىن قامتاماسىز ەتەتىن دەڭگەيگە جەتكىزۋ قاجەتتىگىن ايتقانىن مىسالعا كەلتىردى. وبلىستىڭ بۇل سالاداعى تابىستارى جىل ساناپ ارتىپ كەلەدى. بيىل وبلىس نارىعىندا بەلسەندى جۇمىس ىستەيتىن شاعىن بيزنەس سۋبەكتىلەرىنىڭ سانى 125,8 مىڭ بىرلىكتى قۇرادى. ال ولار وندىرگەن ءونىم − 534,1 ملرد. قۇراپ, جۇمىسپەن قامتىلعاندار 279,6 مىڭ ادامعا جەتتى.
«بيزنەستىڭ جول كارتاسى-2020» باعدارلاماسى اياسىندا كاسىپكەرلىكتى قولداۋ ءۇشىن قازىنادان 6,9 ملرد. تەڭگە قاراستىرىلدى. بۇل تۇرعىدا وبلىسىمىزدىڭ ەلباسى تاپسىرماسىن ورىنداۋدا مۇمكىندىگى مول.
جولداۋدا ايتىلعان الەۋمەتتىك سالاعا قاتىستى مىندەتتەر وڭىردە جوسپارعا ساي جۇزەگە اسادى. وسى جىلى 107 ءبىلىم نىسانىنىڭ قۇرىلىسىنا 32,4 ملرد. قارجى ءبولىندى. جىل سوڭىنا دەيىن 50 نىسان ەل يگىلىگىنە بەرىلەدى. وسىلايشا 28 اپاتتى, 3 ءۇش اۋىسىمدى مەكتەپتىڭ ماسەلەسىن شەشىلەدى. دەنساۋلىق ساقتاۋ سالاسىندا جاڭا 42 نىسان سالىنادى.
2014 جىلى وبلىس اۋماعىنداعى مۇگەدەكتەرگە كورسەتىلەتىن الەۋمەتتىك قولداۋدى جاقسارتۋ ءۇشىن 1,2 ملرد. تەڭگە قارجى قاراستىرىلدى. سونداي-اق, سارىاعاش, ماقتارال, سايرام, تۇلكىباس اۋداندارىندا مۇگەدەكتەرگە الەۋمەتتىك قىزمەت كورسەتۋ ورتالىقتارى اشىلادى.
جولداۋداعى شىمكەنتتىڭ ءىرى قالالار اگلومەراتسياسىنا ەنگىزىلىپ, زاماناۋي ۋربانيستىك ورتالىققا اينالۋى وڭتۇستىكقازاقستاندىقتارعا زور مىندەت جۇكتەيدى. بۇل باعىتتا ناقتى جۇمىستار جاسالۋدا, وبلىس ورتالىعىنا 40 ەلدى مەكەن قوسىلىپ, حالىق سانى 145 مىڭعا ارتىپ وتىر.
حالقى ەڭبەكشىل ەلدىڭ ەكونوميكاسى ءورىستى, قوعامى تۇراقتى, تۇرمىسى ءتۇزۋ بولاتىنى بەلگىلى. بۇگىنگى جاھاندانۋ ءداۋىرى ءجۇرىپ, تەحنيكالىق دامۋ ۇدەرىستەرى قارقىن العان كەزەڭدە الدىمىزعا ستراتەگيالىق ماقساتتار قويىپ, الەمدە وزىندىك ورنى, اسقاق بەدەلى بار مەملەكەت قۇرۋ باستى مىندەت. مەملەكەت باسشىسى جاريالاعان ساياسي قۇجاتتىڭ ءمانى دە وسىندا. قازاقستاندىقتار ءبىر يدەياعا توپتاسىپ, ورتاق ماقسات پەن مۇددە ءۇشىن, كەمەل كەلەشەك ءۇشىن ەڭبەك ەتەرى ءسوزسىز.
ساكەن مايلىباي.
دەرەككوز, سۋرەتتەر: وڭتۇستىك قازاقستان وبلىسى اكىمىنىڭ ءباسپاسوز قىزمەتى.
