قازاق فولكلورىنىڭ 100 تومدىعىنىڭ جاريالانۋى – ەلدىگىمىزدى ەڭسەلەنتەر ەرەن وقيعا. پارلامەنت ءماجىلىسىنىڭ كەشەگى وتىرىسىندا دەپۋتات الدان سمايىلدىڭ ۇكىمەت باسشىسى سەرىك احمەتوۆتىڭ اتىنا جولداعان ساۋالىنىڭ ءمانىن ءبىر سويلەممەن وسىلايشا ءتۇيىپ ايتۋعا بولادى. ساۋالدا بىلاي دەلىنگەن:
* مەملەكەت مەرەيى
قازاق فولكلورىنىڭ 100 تومدىعىنىڭ جاريالانۋى – ەلدىگىمىزدى ەڭسەلەنتەر ەرەن وقيعا. پارلامەنت ءماجىلىسىنىڭ كەشەگى وتىرىسىندا دەپۋتات الدان سمايىلدىڭ ۇكىمەت باسشىسى سەرىك احمەتوۆتىڭ اتىنا جولداعان ساۋالىنىڭ ءمانىن ءبىر سويلەممەن وسىلايشا ءتۇيىپ ايتۋعا بولادى. ساۋالدا بىلاي دەلىنگەن:
قۇرمەتتى سەرىك نىعمەت ۇلى!
ۇلتىمىزدىڭ داۋىرلەردى سويلەتكەن باي فولكلورى – قازاق ادەبيەتى مەن مادەنيەتىنىڭ قاينار كوزى, حالىقتىڭ تەڭدەسى جوق رۋحاني قۇندىلىعى.
«ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ پرەزيدەنتى ساۋىتبەك ابدراحمانوۆ وسى اۋىز ادەبيەتىنە قاتىستى مىنا ءبىر وقيعانى اتالعان باسىلىم بەتىندە (7.ءحىى.2013 ج.) بىلاي دەپ ەسكە الادى: «2004 جىلى «مادەني مۇرا» باعدارلاماسىن جاڭا قولعا الىپ جاتقان شاقتا اقپارات ءمينيسترى رەتىندە اقش-تىڭ سول كەزدەگى ەلشىسى ەليزاۆەت دجونس حانىممەن كەزدەسۋىم كەزىندە مينيسترلىك جۇمىسىن اڭگىمەلەي كەلىپ, ەلباسى نۇرسۇلتان نازارباەۆتىڭ باستاماسىمەن قولعا الىنعان «مادەني مۇرا» باعدارلاماسىنىڭ اياسىندا 100 تومدىق قازاق فولكلورى شىعارىلاتىنىن ايتقان ەدىم. ءسوزىمدى ەلشىلىك قىزمەتكەرى اۋدارىپ بولىسىمەن مينيسترلىكتىڭ ادامى: «دۇرىس اۋدارعان جوق», دەپ قالدى. ءسويتتى دە, ءوزى ءبىر تۇسىن قايتا اۋدارىپ بەردى. سويتسەك, ەلشىلىك قىزمەتكەرى مەنىڭ «ءجۇز تومدىق» دەگەنىمدى مينيستر جاڭىلىس كەتكەن بولار دەپ, وزىنشە «تۇزەتىپ» «ون تومدىق» دەپ اۋدارعان ەكەن... سوندا باتىس ادامىنىڭ ۇعىمىندا بىزدە ءجۇز تومدىق فولكلور بولۋى مۇمكىن, ونىڭ ءبارىنىڭ باسى قوسىلىپ, سونداي كولەمدە شىعارىلۋى مۇمكىن دەگەن ويدىڭ ءوزى بولماي تۇرعانى عوي».
جاقىندا پرەزيدەنت باستاماشى بولعان وسى «مادەني مۇرا» باعدارلاماسىنىڭ ەڭ ءبىر ءىرى جوباسى – قازاق فولكلورىنىڭ 100 تومدىق «بابالار ءسوزى» جيناعىن شىعارۋ جۇمىسى اياقتالدى. مۇنداي باسىلىم الەم مادەنيەتىنىڭ تاريحىندا بۇرىن-سوڭدى بولعان ەمەس. دۇنيە ديدارىندا فولكلورى ءجۇز تومدى قۇرايتىن باسقا ۇلت بار بولسا, بار دا شىعار, بىراق فولكلورىن ءجۇز تومعا جيناپ, باستىرىپ شىعارعان الەمدەگى جالعىز ۇلت – قازاق ەكەنى انىق. بۇل – الەمدىك ءمانى بار وقيعا, ۇلت رەتىندە ماقتانىش ەتەتىن رۋحاني جەتىستىگىمىز. سوندىقتان, ءبىلىم جانە عىلىم مينيسترلىگىنىڭ م.و.اۋەزوۆ اتىنداعى ادەبيەت جانە ونەر ينستيتۋتىندا الەمدىك دەڭگەيدەگى فولكلورشىمىز, اكادەميك سەيىت قاسقاباسوۆتىڭ جەتەكشىلىگىمەن باستالىپ, جەرىنە جەتكىزىلگەن, مادەنيەت جانە اقپارات مينيسترلىگىنىڭ قامقورلىعىمەن استاناداعى «فوليانت» باسپاسىندا كوركەم بەزەندىرىلىپ, ساپالى قاعازعا باسىلعان «بابالار ءسوزى» سەرياسىنىڭ اياقتالۋى مەملەكەت ومىرىندەگى ەلەۋلى رۋحاني-مادەني بەلەس رەتىندە قارالۋى كەرەك. وسى وقيعاعا تيىسىنشە ءمان بەرىلىپ, ۇكىمەت دەڭگەيىندە كوڭىل ءبولىنۋى, ەلدىڭ ىشىندە دە, سىرتىندا دا لايىقتى ناسيحاتتالۋى قاجەت دەپ سانايمىز. اتاپ ايتقاندا, 100 تومدىقتىڭ يۋنەسكو-نىڭ شتاب-پاتەرىندە, ماينداعى فرانكفۋرت قالاسىنداعى كىتاپ كورمەسىندە تۇساۋكەسەرىن وتكىزۋ, الەمدىك تىلدەردەگى سالماقتى جۋرنالداردا عىلىمي ماقالالار جاريالاۋ, وسى وقيعاعا ورايلاستىرىلعان حالىقارالىق عىلىمي كونفەرەنتسيالار ۇيىمداستىرۋ, دۇنيەجۇزىندەگى ەڭ تانىمال كىتاپحانالاردىڭ قورىندا وسى قۇندى باسىلىمنىڭ بولۋىن قامتاماسىز ەتۋ قاجەت. وسىنداي اۋقىمدى دا وزەكتى شارالاردى اتقارۋ ءجونىندە ءبىلىم جانە عىلىم, مادەنيەت جانە اقپارات, سىرتقى ىستەر مينيسترلىكتەرىنە ءتيىستى تاپسىرمالار بەرۋىڭىزدى سۇرايمىز. ءبىز وسىلاي ەلدىك رۋحىمىزدى اسقاقتاتا تۇسەيىك.
الدان سمايىل,
قازاقستان رەسپۋبليكاسى
پارلامەنتى ءماجىلىسىنىڭ دەپۋتاتى.
