جازعى, قىسقى سپورت تۇرلەرىنەن بولسىن وليمپيا ويىندارىنىڭ ورنى بولەك. بيىل رەسەيدىڭ سوچي قالاسىندا وسىنداي ءدۇبىرلى دودا – قىسقى وليمپيادا وتەدى. بۇل باسەكەگە الەمنىڭ 80-نەن استام ەلىنەن 5 مىڭ سپورتشى
قاتىسىپ, سپورتتىڭ 15 تۇرىنەن 98 مەدال جيىنتىعىن ساراپقا سالادى. قازىر رەسەي ۇكىمەتى وسى ويىنداردى لايىقتى دەڭگەيدە وتكىزۋ ءۇشىن بارىن سالىپ, دايىندالۋدا.
جازعى, قىسقى سپورت تۇرلەرىنەن بولسىن وليمپيا ويىندارىنىڭ ورنى بولەك. بيىل رەسەيدىڭ سوچي قالاسىندا وسىنداي ءدۇبىرلى دودا – قىسقى وليمپيادا وتەدى. بۇل باسەكەگە الەمنىڭ 80-نەن استام ەلىنەن 5 مىڭ سپورتشى
قاتىسىپ, سپورتتىڭ 15 تۇرىنەن 98 مەدال جيىنتىعىن ساراپقا سالادى. قازىر رەسەي ۇكىمەتى وسى ويىنداردى لايىقتى دەڭگەيدە وتكىزۋ ءۇشىن بارىن سالىپ, دايىندالۋدا.
بۇل دوداعا الەمنىڭ ۇزدىك سپورتشىلارىمەن بىرگە, ءبىزدىڭ وتانداستارىمىز دا قاتىسىپ, كۇش سىناسادى. جالپى, بۇل – ەلىمىزدىڭ تاۋەلسىزدىك العاننان بەرگى التىنشى وليمپياداسى. بۇعان دەيىن ءبىزدىڭ قۇراما 1994 جىلى نورۆەگيانىڭ ليللەحاممەر قالاسىندا وتكەن قىسقى ويىندارعا, ودان كەيىن 1998 جىلى جاپونيانىڭ ناگانو, 2002 جىلى اقش-تىڭ سولت-لەيك-سيتي, 2006 جىلى يتاليانىڭ تۋرين مەن 2010 جىلى كانادانىڭ ۆانكۋۆەر قالالارىندا وتكەن وليمپيا ويىندارىنا قاتىسقانى بەلگىلى. وسى باسەكەلەردە سپورتشىلارىمىزدىڭ بار-جوعى 1 التىن, 3 كۇمىس جانە 2 قولا جۇلدەگە عانا قول جەتكىزە العاندارى ءمالىم. جالعىز التىن مەدالدى 1994 جىلى العان ەكەنبىز. سول كەزدە شاڭعىشى ۆلاديمير سميرنوۆتىڭ ءبىر ءوزى 1 التىن, 2 كۇمىس جۇلدەنى يەلەنىپ, قازاقستان قۇراماسىن جالپى ەسەپتە 12-ورىنعا شىعارعان بولاتىن.
ەندى بيىلعى سوچي وليمپياداسىندا قازاقستاندىق سپورتشىلاردىڭ قانشا جۇلدەنى الاتىنىن ازىرشە كەسىپ ايتۋ قيىن. سپورت ماماندارى, قىسقى جارىستاردىڭ ارعى-بەرگى جاعىندا جۇرگەن ادامداردىڭ ءوزى بۇل سۇراققا ناقتى جاۋاپ بەرە الماسى انىق. كەي جەردە 5 مەدال, نە 3 جۇلدە الادى دەسە, كەيبىرەۋى بۇدان دا از بولۋى مۇمكىن دەگەندى ايتادى. وسىندايدا ءبىزدىڭ جۇلدەنىڭ سانىنان گورى ساپاسى جاقسىراق بولسا ەكەن دەپ تىلەيتىنىمىز كۇمانسىز. ويتكەنى, 10 كۇمىستەن 1 التىننىڭ سالماعى باسىم ەكەنى بەلگىلى.
جالپى, قازىر ءبىزدىڭ ەلدە, قولدا بار مالىمەتتەرگە قاراعاندا, 40-تان استام ليتسەنزيا بار. بۇل ۆانكۋۆەردە وتكەن وليمپياداعا قاراعاندا الدەقايدا كوپ. ەگەر كانادادا قازاقستان قۇراماسى سپورتتىڭ 9 تۇرىنەن 39 جولدامانى يەلەنىپ, ناتيجەسىندە 37 سپورتشى باق سىناسسا, بيىلعى وليمپياداعا ءبىزدىڭ ەلدەن بۇدان دا كوپ سپورتشى قاتىسادى.
ەندى قازاقستان قۇراماسى قاتىساتىن جارىستارعا كەلسەك, بۇلار – شاڭعى, بياتلون, مانەرلەپ سىرعاناۋ, كونكي تەبۋ, تۇعىردان شاڭعىمەن سەكىرۋ, فريستايل (موگۋل), سنوۋبورد, شورت-ترەك جانە باسقا دا سپورت تۇرلەرى. ءبىر وكىنىشتىسى, ءبىزدىڭ ەل وليمپيادانىڭ ەڭ قىزىقتى جانە تارتىستى بولاتىن حوككەي جارىسىنا قاتىسا المايدى. بيىل ەرلەر جانە ايەلدەر قۇراماسى حوككەي تۋرنيرىنەن سىرت قالىپ وتىر. بىلتىر لاتۆيانىڭ ريگا قالاسىندا وتكەن الەم چەمپيوناتىندا حوككەيشىلەرىمىز بۇل جولدامانى الا الماي قالدى. ال, جالپى بىلتىردان بەرى وليمپيادا ليتسەنزياسى ءۇشىن قازاقستان قۇراماسى 12 الەم چەمپيوناتى مەن 50-دەن استام حالىقارالىق تۋرنيرلەر مەن جارىستارعا, كۋبوك كەزەڭدەرىنە قاتىستى.
وسى سىندارعا قاتىسۋ ءۇشىن سپورتشىلارىمىز دايىندىقتىڭ بارلىق ساتىسىنان ءوتتى. سونىڭ ناتيجەسىندە كونكي تەبۋ, مانەرلەپ سىرعاناۋدان, شاڭعى جارىستارىنان وتكەن الەم چەمپيوناتتارىندا وتانداستارىمىز ءبىرنەشە جۇلدەلى ورىندارعا يە بولدى. مىسالى, دەنيس كۋزين كونكي سپورتىنان 1000 مەتر قاشىقتىققا ءجۇگىرۋدەن ءبىرىنشى ورىندى يەلەنسە, دەنيس تەن مانەرلەپ سىرعاناۋدان ەكىنشى ورىندى, شاڭعى جارىسىندا الەكسەي پولتورانين مەن نيكولاي چەباتكو كوماندالىق سپرينتتە ءۇشىنشى ورىندى, الەكسەي پولتورانين 50 كم-گە كلاسسيكالىق ستيلمەن جارىسۋدا قولا جۇلدەنى يەلەندى. ەندى ءبىزدىڭ جىگىتتەر الەمدىك باسەكەلەردەگى وسى جەتىستىكتەرىن وليمپيا ويىندارىندا قايتالاسا يگى.
سوچي وليمپياداسىنا مانەرلەپ سىرعاناۋدان ەكى سپورتشىمىز قاتىسادى. بىلتىر كانادادا وتكەن الەم چەمپيوناتىندا حالىقارالىق كونكي فەدەراتسياسى دەنيس تەن مەن ابزال راقىمعاليەۆكە ەكى ليتسەنزيا بەردى. وسى چەمپيونات كەزىندە تەن اتالعان فەدەراتسيا جاريالاعان رەيتينگتە بىردەن 17-ورىننان التىنشى ورىنعا كوتەرىلدى. ال ءبىزدىڭ ەلدەن وليمپياداعا ەڭ كوپ جولداما العاندار – بياتلونشىلار. ولار الەم كۋبوگى مەن الەم چەمپيوناتىنىڭ قورىتىندىسى بويىنشا ون جولداما الدى. ون ليتسەنزيا ەرلەر جانە ايەلدەرگە تەڭ بولىنگەن. بۇل جولدامالار جەكە سپورتشىلارعا ەمەس, قۇراماعا بەرىلگەندىكتەن, جاتتىقتىرۋشىلار قۇرامى وليمپياداعا قاتىساتىن بياتلونشىلاردىڭ ءتىزىمىن وزدەرى جاريالادى. وندا ەرلەر قۇراماسىن دياس كەنەشوۆ باستاسا, ايەلدەر جاعىن وليمپيادانىڭ كۇمىس جۇلدەگەرى ەلەنا حرۋستالەۆا باستاپ بارادى.
سپورت جانە دەنەشىنىقتىرۋ اگەنتتىگىنىڭ توراعاسى تاستانبەك ەسەنتاەۆتىڭ ايتۋىنشا, سپورتتىڭ سەگىز ءتۇرى بويىنشا ۇلتتىق قۇرامانى دايىنداۋ ءۇشىن كەلىسىمشارت نەگىزىندە 17 جەتەكشى شەتەل مامانى تارتىلدى. ولاردىڭ قاتارىندا بىلىكتىلىگى جوعارى شاڭعى مايلاۋشىلار مەن سپورتتىق مەديتسينا سالاسىنداعى ماماندار بار. «ءبىزدىڭ سپورتشىلاردىڭ وليمپياداعا دايىندالۋىنا, جولداما بەرەتىن جارىستارعا قاتىسۋىنا بارلىق جاعدايلار جاسالدى. ۇلتتىق قۇراما كوماندا 193 وقۋ-جاتتىعۋ جيىندارىنا جانە 175 حالىقارالىق سىندارعا, ونىڭ ىشىندە الەم كۋبوگى كەزەڭدەرىنە, الەم, ازيا چەمپيوناتتارىنا رەيتينگتىك جانە ليتسەنزيالىق جارىستارعا قاتىستى», دەدى ول.
داستان كەنجالين,
«ەگەمەن قازاقستان».
