نەمەسە جاقسى ىسكە ۇمتىلعان جان جايباراقات وتىرا المايدى
جامبىل وبلىسىنىڭ اكىمى كارىم كوكىرەكباەۆ مەرەكەلىك دەمالىس بەس كۇن ەكەن دەپ, جايباراقات جاتىپ العان جوق. «باي دۇيسەنبىنى» بەيمارال كۇتسە, تۇلپاردايىن تىقىرشىعان ۋاقىتتىڭ تالاي ىستەن قۇر قالدىراتىنى انىق. سوندىقتان جاڭا جىلدىڭ العاشقى سەنبىسىن قورداي اۋدانىن ارالاۋدان باستادى.
نەمەسە جاقسى ىسكە ۇمتىلعان جان جايباراقات وتىرا المايدى
جامبىل وبلىسىنىڭ اكىمى كارىم كوكىرەكباەۆ مەرەكەلىك دەمالىس بەس كۇن ەكەن دەپ, جايباراقات جاتىپ العان جوق. «باي دۇيسەنبىنى» بەيمارال كۇتسە, تۇلپاردايىن تىقىرشىعان ۋاقىتتىڭ تالاي ىستەن قۇر قالدىراتىنى انىق. سوندىقتان جاڭا جىلدىڭ العاشقى سەنبىسىن قورداي اۋدانىن ارالاۋدان باستادى.
وبلىستىڭ وڭتۇستىك-شىعىسىن الىپ جاتقان قورداي اۋدانىنىڭ جەرى, نەگىزىنەن, تاۋلى-تاستاقتى بولىپ كەلەدى. سولتۇستىك جانە شىعىس بولىگىن بيىكتىگى تەڭىز دەڭگەيىنەن 1000 مەتردەن اساتىن شۋ-ىلە تاۋلارى وراپ جاتىر. كىندىكتاس, جەتىجول سياقتى تاۋ جوتالارى اۋداننىڭ ورتالىق جانە وڭتۇستىك-شىعىس بولىگىن قامتىعان. ەگەر جانىڭىزعا جازىقتاۋ جەر كەرەك بولسا, وندا شۋ اڭعارىنا قاراي بارىڭىز.
اكىم جۇمىس ساپارى اياسىندا اۋدانداعى الەۋمەتتىك نىسانداردىڭ تىنىس-تىرشىلىگىمەن جانە وسىندا ءتۇتىن تۇتەتكەن كاسىپكەرلەر جۇزەگە اسىرىپ جاتقان جوبالاردىڭ بەتالىسىمەن, باعىت-باعدارىمەن تانىستى. سونىڭ ءبىرى – جەكە كاسىپكەرلەردىڭ قارجىسىنا سالىنعان وتار اۋىلىنداعى كۇن ەلەكتر ستانساسى. وبلىستىڭ بۇرىنعى اكىمى قانات بوزىمباەۆ تۇساۋىن كەسكەن بۇل ستانسا ونەركاسىپتىك دەڭگەيدە جۇمىس ىستەيتىن, سونىمەن بىرگە, ورتاق ەلەكتر جۇيەلەرىنە قوسىلعان, ءوز ەلەكتر قۋاتىن ەلدىڭ ءبىرتۇتاس ەنەرگيا جۇيەسىنە جەتكىزەتىن مەملەكەتىمىزدەگى ەڭ العاشقى قۋات كوزى بولىپ ەسەپتەلەدى. ستانسانىڭ قۋاتى الداعى ۋاقىتتا 7 مۆت-عا دەيىن جەتەدى دەپ كۇتىلۋدە.
وتار بەكەتىنەن كەنەن اۋىلى ونشا الىس ەمەس. وبلىس اكىمى اقىن ءومىر سۇرگەن اۋىلدان سالىنىپ جاتقان 600 وقۋشىعا ارنالعان مەكتەپتىڭ قۇرىلىس جۇمىسىمەن دە تانىستى. قۇنى 844,3 ملن. تەڭگە بولاتىن ءبىلىم ورداسىنىڭ قۇرىلىسى 2011 جىلى باستالىپتى. بىراق جۇمىس بارىسى تىم سوزىلىپ كەتىپتى. وبلىس اكىمىنە اتباسىن بۇرعىزعان ماسەلە دە وسىعان الاڭداۋشىلىق سياقتى كورىندى. اكىمدى نىسانداعى جۇمىس بارىسىمەن تانىستىرعاندار ءبىلىم وشاعىنىڭ قۇرىلىسى ۇستىمىزدەگى جىلدىڭ ءبىرىنشى جارتىسىندا اياقتالادى دەپ سەندىردى.
«Vista International» كومپانياسى مۇزبەل اۋىلىندا قايتا قالپىنا كەلەتىن ەنەرگيا كوزدەرى باعىتىنداعى جوبالارىن جۇزەگە اسىرىپ جاتىر. ولار وتكەن جىلى جالپى قۋاتى 21 مۆت قۇرايتىن قورداي جەل ەلەكتر ستانساسىنىڭ 4 مۆت قۇرايتىن العاشقى كەزەگىنىڭ قۇرىلىسىن اياقتاعان بولاتىن. جاماعاتتىڭ يگىلىگى ءۇشىن جەلدى دە جۇمىسقا «جەككەن» اۋىلدا بۇگىندە 13 ادام تۇراقتى جۇمىسپەن قامتاماسىز ەتىلىپتى.
كەنەن اقىن جىرىنا قوسقان قورداي ءوڭىرى كەنگە دە باي. سوندىقتان اۋدانداعى ءوندىرىس سالاسى دا قارقىندى دامىپ كەلەدى. مىنە, سوڭعى جىلدارى قوردايدىڭ التىنى مەن كۇمىسىن ءوندىرۋ جوباسى دا تابىستى جۇزەگە اسىرىلا باستادى. «Central Asia Gold Production» كومپانياسى بۇل جوبانى 2012 جىلى باستاعان بولاتىن. كومپانيا باسشىلارىنىڭ ايتۋىنشا, مۇندا ءبىر جىلدا 500 كگ التىن مەن كۇمىس وندىرۋگە بولادى ەكەن. ونەركاسىپتەگى اتقارىلعان وڭدى ىستەر باعالى مەتالل وندىرۋگە بارىنشا دەن قويعان كومپانيانىڭ العا قويعان ماقساتتارىنىڭ ايقىن ەكەنىن بىلدىرەدى.
اۋدانداعى «كۋليكوۆ ءسۇت ونىمدەرى» جشس ءسۇتتى قايتا وڭدەۋ جانە ءسۇت ونىمدەرىن وندىرۋمەن اينالىسادى. ول جىلىنا 3,6 مىڭ توننا ءسۇت ونىمدەرىن شىعارادى. بۇگىندە 50 ادام جۇمىس ىستەپ جاتقان كاسىپورىننىڭ قۇنى يەلەرىنە 150 ملن. تەڭگەگە ءتۇسىپتى. كانادادان ەت باعىتىنداعى 221 باس قىزىل انگۋس جانە گەرەفورد اسىل تۇقىمدى ءىرى قارا مال الدىرعان سەرىكتەستىكتىڭ تابىسى مەن قاسىق اۋىلىنا تابيعي گاز جەتكىزۋگە بارىن سالعان قۇرىلىسشىلار قارقىنى دا وبلىس اكىمىنىڭ ويىنان شىقتى. بۇگىندە بۇل اۋىلداعى 745 ءۇيدىڭ 160-ىنا تابيعي گاز جەتكىزىلىپتى.
كوسەمالى ساتتىباي ۇلى,
«ەگەمەن قازاقستان».
جامبىل وبلىسى,
قورداي اۋدانى,
قورداي اۋىلى.
