ايماق باسشىسى وڭىردە ۆيرۋستىڭ تىركەلۋى تاۋلىگىنە 100-دەن اسىپ وتىرعانىن ايتىپ, ساقتىق شارالارىن قاتاڭداتۋدى تاپسىردى.
– رەسپۋبليكانىڭ وزگە ايماقتارى سەكىلدى ءبىزدىڭ وبلىستا دا «دەلتا», «دەلتا پليۋس» شتامدارى تىركەلىپ, جەدەل تاراپ وتىرعانىن كورىپ وتىرمىز. جاعداي وتە اۋىر. بىلتىر ءدال وسى ۋاقىتتا وبلىسىمىزدا كوروناۆيرۋس ينفەكتسياسىنان ءولىم-ءجىتىم كوپ بولعانى بەلگىلى. ەندى بيىل ءار جەردە جىلدىق استار وتكىزۋ جيىلەپ وتىرعانى جونىندە مالىمەتتەر ءتۇسىپ جاتىر. توي وتكىزەتىندەر دە تولاستار ەمەس. كۇنى كەشە عانا قىزىلوردا قالاسىندا ورنالاسقان ەكى مەيرامحانادا وتباسىلىق شارالار ۇيىمداستىرىلعان. بىراق بۇل مونيتورينگتىك توپتاردىڭ نازارىنان تىس قالىپ وتىر. ءدال وسىنداي جاعداي اۋدانداردا دا كەزدەسۋدە. سوندىقتان مونيتورينگتىك توپتاردىڭ جۇمىسىن شيراتقان ءجون, – دەدى وبلىس اكىمى.
وبلىستاعى ەپيدەميالىق جاعداي تۋرالى بايانداما جاساعان سانيتارلىق-ەپيدەميالىق قاداعالاۋ دەپارتامەنتىنىڭ باسشىسى دينارا جاڭابەرگەنوۆا ناۋرىز ايىنداعى مەرەكەلىك كۇندەردەن كەيىن اۋرۋ سانىنىڭ كۇرت كوبەيىپ كەتكەنىن ايتىپ ءوتتى. دەپارتامەنت باسشىسىنىڭ ايتۋىنشا, ۇجىمدىق ۆاكتسينا العاندار اراسىندا اۋرۋشاڭدىق دەڭگەيى تومەندەپ كەلە جاتىر. ال وبلىس ورتالىعىندا ىندەت جۇقتىرعانداردىڭ كۇرت كوبەيۋىنە بايلانىستى قىزىلوردا قالاسى ءۇشىن جاڭا قاۋلى قابىلدانىپ, كۇشەيتىلگەن ساقتىق شارالارى ەنگىزىلىپ وتىر.
شتاب وتىرىسىندا وبلىستىق پوليتسيا دەپارتامەنتىنىڭ باستىعى بەكتورە سۇلتان وڭىردەگى مونيتورينگتىك توپتاردىڭ جۇمىسىن كۇشەيتۋ باعىتىنداعى ۇسىنىسىن ايتسا, وبلىستىق دەنساۋلىق ساقتاۋ باسقارماسىنىڭ باسشىسى ءسابيت پازىلوۆ اۋرۋحانالارداعى توسەكتىك ورىندارمەن قامتۋ جانە جاپپاي ۆاكتسينالاۋ جۇمىستارى بارىسىن باياندادى.
جۇكتەمەنىڭ ارتۋىنا بايلانىستى ينفەكتسيالىق توسەكتىك ورىندار سانى 3 ەسەگە ۇلعايىپ, 1 820-عا جەتكەن. قاجەتىلىككە قاراي ينفەكتسيالىق جانە پروۆيزورلىق ستاتسيونارلاردا توسەكتىك ورىندى 3 200-گە دەيىن كوبەيتۋگە مۇمكىندىك بار. ءۇي جاعدايىندا ەم الاتىن ازاماتتار ءۇشىن 138 دارىگەرلىك موبيلدىك توپ قۇرىلعان. توپ قۇرامىنداعى دارىگەرلەردىڭ ناۋقاستارعا شۇعىل تۇردە جەتۋى ءۇشىن وبلىس اكىمدىگى مەن قالا اكىمدىگى تاراپىنان قوسىمشا كولىكتەر قاراستىرىلدى. وبلىستا ۆاكتسينا سالىنۋعا ءتيىس 401 مىڭ تۇرعىننىڭ 53,2 پايىزى ەكپە العان.
– كۇندەلىكتى 150-160-قا جۋىق ىندەت تىركەلىپ, 100-گە جۋىق ناۋقاس ستاتسيونارعا ەم الۋعا جاتقىزىلۋدا. بۇل, ارينە, ستاتسيونار جۇكتەمەسىنىڭ ارتۋىنا اكەلىپ سوعادى. اۋىر جاعدايداعى ناۋقاستاردىڭ كوبەيگەنى دە ءبىزدى الاڭداتىپ وتىر, – دەدى باسقارما باسشىسى.
جيىندا گۇلشارا ابدىقالىقوۆا كەرەكتى دارىلەردىڭ اۋىلدار مەن قالا شەتىندەگى دارىحانالارعا ۋاقتىلى جانە قاجەتتى مولشەردە تۇراقتى تۇردە جەتكىزىلۋىن قاداعالاۋدى تاپسىردى. وتىرىستا وبلىستىق كاسىپكەرلىك جانە تۋريزم باسقارماسى باسشىسى فەردوۋسي قوجابەرگەنوۆ Ashyq جوباسىنا كاسىپكەرلەردىڭ قاتىسۋى تۋرالى باياندادى. بۇگىندە وڭىردەگى 252 نىسان Ashyq-قا ەنگەن.
وبلىس اكىمى قوعامدىق تاماقتانۋ مەن سەرۆيستىك قىزمەت ورىندارىندا قاۋىپسىزدىكتى ساقتاۋ ءۇشىن كاسىپكەرلىك نىساندار Ashyq جوباسىنا بەلسەنە قاتىسۋى قاجەتتىگىن ەسكە سالىپ, بۇل باعىتتا ءتيىستى سالا باسشىلارىنا جۇمىستى قىسقا مەرزىم ىشىندە ۇيلەستىرۋدى جۇكتەدى.
جيىن سوڭىندا ايماق باسشىسى وبلىستىق سانيتارلىق-ەپيدەميالىق باقىلاۋ دەپارتامەنتىنە ناۋقاستارمەن قارىم-قاتىناستا بولعان تۇرعىنداردى شۇعىل تۇردە انىقتاپ, اۋرۋدىڭ تارالۋىنا جول بەرمەۋدى, پوليتسيا دەپارتامەنتى, قىزىلوردا قالاسى جانە اۋدان اكىمدىكتەرىمەن بىرلەسىپ, كۇندەلىكتى مونيتورينگ توپتارىنىڭ جۇمىسىن كۇشەيتۋدى مىندەتتەدى.
– قازىرگى تاڭدا ۆاكتسينالاۋ ماسەلەسىنە باستى نازار اۋدارىلۋى ءتيىس, ويتكەنى اۋرۋدى جۇقتىرماۋدىڭ بۇدان باسقا جولى جوق. مۇنان بولەك, توسەكتىك ورىنمەن قامتۋ مەن جانساقتاۋ بولىمدەرىنىڭ دايىندىعى دا اسا ماڭىزدى. سونداي-اق ۇيدە ەمدەلىپ جاتقان ناۋقاستاردىڭ تولىققاندى ەم الۋىن قامتاماسىز ەتۋ قاجەت. جاعدايىن ۋشىقتىرىپ الماس ءۇشىن ولاردىڭ جاعدايىن كۇندەلىكتى قاداعالاۋدى تاپسىرامىن. بارلىق جۇمىس ۇيىمداسقان تۇردە جۇرگىزىلىپ, تۇراقتى باقىلاۋدا بولسىن, – دەدى وبلىس اكىمى.
قىزىلوردا
