مىسىردا جاڭا كونستيتۋتسيا جوباسى بويىنشا داۋىس بەرۋ كەزىندە ءبىر ادام قازا بولدى. بۇل تۋرالى يتار-تاسس حابارلادى.
پوليتسيانىڭ اقپارى بويىنشا, كايردىڭ وڭتۇستىگىندەگى بەني-سۋەيف پروۆينتسياسىنداعى قاقتىعىس كەزىندە تيىم سالىنعان «مۇسىلمان باۋىرلار» اسسوتسياتسياسىنىڭ اكتيۆيستى قازا بولعان. 25 جاسار جىگىتتىڭ كەۋدەسىنە وق تيگەنى بەلگىلى بولدى.
بەني-سۋەيف پروۆينتسياسىنداعى سايلاۋ ۋچاسكەسى ماڭىندا ەرەۋىلشىلەر مەن ءتارتىپ ساقشىلارى اراسىندا قاقتىعىس ورىن العان. ەلدىڭ ءتۇرلى قالالارىندا يسلاميستەر جاڭا كونستيتۋتسيا جونىندەگى رەفەرەندۋمعا قارسى نارازىلىق اكتسياسىنا شىقتى. قاۋىپسىزدىك كۇشتەرى سايلاۋشىلاردى قورعاۋ ءۇشىن, قارۋ مەن كوز جاساۋراتاتىن گاز قولدانۋ ارقىلى ەرەۋىلشىلەردى ىعىستىرىپ تاستاماقشى بولعان.
سونىمەن قاتار, بۇگىن مينۋفيا پروۆينتسياسىنداعى سايلاۋ ۋچاسكەسى ماڭىندا بەس جارىلعىش زات زالالسىزداندىرىلدى. ال كاير سوتى ماڭىنا جاسىرىلعان بومبا جارىلىپ ۇلگەرگەن. ونىڭ سالدارى ازىرگە بەلگىسىز بولىپ وتىر.
ايدار ورىسباەۆ.
دەرەككوز: Itar-tass.com
فوتو: Itar-tass.com
