باتىس قازاقستان وبلىسىندا جەرگىلىكتى كاسىپكەردىڭ وتباسىنا قاراقشىلىق شابۋىل جاسالدى. 61 جاستاعى ۆيتالي كۋركۋلا ايۋاندىقپەن سول جەردە ولتىرىلسە, ونىڭ 59 جاستاعى ايەلى اۋىر جارالانىپ, اۋرۋحاناعا ءتۇستى. بۇل تۋرالى «كتك» تەلەارناسى حابارلادى.
ميىنا قاتتى زاقىم كەلگەن كەلىنشەككە 3 مارتە وتا جاسالىپتى. ايتا كەتەرلىگى, ەرلى-زايىپتى كۋركۋلالار وڭىرگە بەلگىلى جەكە شارۋا قوجالىعىنىڭ يەلەرى عانا ەمەس, سونداي-اق وبلىستىق ءماسليحاتتىڭ دەپۋتاتتارى. قازىر ورىن العان وقيعامەن استانادان ارنايى قۇرىلعان تەرگەۋ توبى اينالىسۋدا.
وڭىرگە تانىمال كاسىپكەردىڭ وتباسىنا جاسالعان بۇل قاراقشىلىق شابۋىل 12 قاڭتاردا كەشكىسىن بولعان. مارقۇمنىڭ اعاسى ەۆگەني كۋركۋلا باۋرىنىڭ ەشكىممەن وشتەسپەگەنىن ايتادى. « اعامنىڭ باسىنان ەكى رەت وق اتىپ, قولىمەن جوعارىعا ءىلىپ قويىپتى. سوعان قاراعاندا, ونى قيناعان بولۋى كەرەك. مۇنداي ايۋاندىقتى كىم جاسادى ەكەن؟», - دەيدى ول كەنەتتەن بولعان قازاعا قابىرعاسى قايىسىپ.
قىلمىسكەرلەردىڭ كوزدەگەنى كاسىپكەر ۆيتالي كۋركۋلانىڭ ءوزى بولسا كەرەك, ونى ءدال باسىنان ەكى مارتە وق اتقان. ال كەلىنشەگىن باسىنان ۇرىپ, تالدىرعان. كەيىن ەسىن جيعان ۆالەنتينا «103» قىزمەتىنەن كومەك سۇراعان. بىراق, اۋرۋحاناعا جەتكەنىندە ەسىنەن تانادى. «ناۋقاسقا قويعان دياگنوزىمىز – باس سۇيەگىنىڭ سىنۋى. قازىر جاعدايى وتە ناشار. اپپاراتپەن دەمالىپ جاتىر», - دەدى اۋداندىق اۋرۋحانا باسشىسى ناديا احمەتوۆا.
الدىن الا جۇرگىزىلگەن بولجامعا جۇگىنسەك, كۇدىكتىلەر ۇيدەگى قۇندى زاتتار مەن كوزگە كورىنەر جەردە تۇرعان 500 مىڭ ءرۋبلدى الماعان. وسىعان قاراعاندا ايىپكەرلەر ۇرلىق جاساۋدى ماقسات تۇتپاعان سەكىلدى.
«24 kz» تەلەارناسىندا ايتىلعانداي, ۆ. كاركۋلا وبلىستاعى ەڭ ءىرى شارۋا قوجالىقتارىنىڭ بىرىنە باسشىلىق جاساعان ەكەن. 14 مىڭ گەكتار جەرگە استىق ءونىمىن سالعان كاسىپكەردىڭ بۇدان بولەك مىڭ باستاي ءىرى قارا مالى مەن دۇكەندەر جەلىسى بار. شارۋاشىلىقتا 350 ادام ەڭبەك ەتەدى. وبلىستىق ىشكى ىستەر دەپارتامەنتىنىڭ باسشىلىعى ءوڭىر جۇرتشىلىعىن وسى قىلمىستىق ءىستى اشۋعا جاردەمدەسۋگە شاقىرۋدا. سونىمەن قاتار تەرگەۋگە قاتىستى قانداي دا ءبىر مالىمەت بەرگەندەر ءۇشىن سىياقى تاعايىندالاتىنىن مالىمدەدى.
بۇگىندە جەكەلەگەن بۇقارالىق اقپارات قۇرالدارى ورال قالاسىنداعى بەلگىلى كاسىپكەردى باس ارازدىعى بولعان تۇلعا ءولتىرتۋى مۇمكىن دەگەن اقپارات تاراتىپ ۇلگەردى. دەگەنمەن, تەرگەۋ امالدارى اياقتالعانشا, ناقتى قورىتىندىعا كەلۋ ەرتەرەك. سوندىقتان بۇل ءىس توڭىرەگىندەگى اقيقاتتى كەيىن حابارلايتىن بولامىز.
باقىتبەك كەنەش ۇلى.
دەرەككوز: «كتك», «24 kz» تەلەارنالارى.
فوتو: «كتك» تەلەارناسى.
