بۇگىندە سەكسەننىڭ سەڭگىرىندەگى پولكوۆنيك كيم سەرىكباەۆ
بالا كۇنىندە باۋىرجانداي باتىر ساردار بولۋدى ارمان ەتكەن-ءدى
ءار كەزدەسكەن سايىن جايدارى ك ۇلىپ, جارقىن سويلەسەتىن كيم اعانىڭ ادامدى وزىنە باۋراپ تارتىپ الا قوياتىن ءبىر عاجابى بار. العاش باۋىرجان مومىش ۇلىنىڭ 100 جىلدىعى قارساڭىندا سۇحبات بەرۋىن ءوتىنىپ تەلەفون شالعانمىن. بىراق كيم سەرىكباي ۇلى قاتتى سۋىق ءتيىپ اۋىرىپ, اۋرۋحاناعا ءتۇسىپتى. قانشا قيىلىپ قينالسام دا تاپ وسى اراداعى شاراسىزدىعىمدى مويىنداپ, سالىم سۋعا كەتكەندەي وتىرىپ قالدىم.
ارادا ءبىر ساعات وتەر-وتپەستە كيم اعا قوڭىراۋ شالدى. اسكەر ادامىنا ءتان, بەكىنگەن بەكەم داۋىس.
– شىراعىم ىنىشەك, تۇماۋراتتىم دەپ ءبالسىنىپ سۇحبات بەرمەسەك, باۋكەڭنىڭ ارۋاعىنان ۇيات تا! سەن پالەنىنشى پالاتاعا كەلە عوي. شامام كەلگەنشە بىلگەنىمدى ايتايىن.
بۇگىندە سەكسەننىڭ سەڭگىرىندەگى پولكوۆنيك كيم سەرىكباەۆ
بالا كۇنىندە باۋىرجانداي باتىر ساردار بولۋدى ارمان ەتكەن-ءدى
ءار كەزدەسكەن سايىن جايدارى ك ۇلىپ, جارقىن سويلەسەتىن كيم اعانىڭ ادامدى وزىنە باۋراپ تارتىپ الا قوياتىن ءبىر عاجابى بار. العاش باۋىرجان مومىش ۇلىنىڭ 100 جىلدىعى قارساڭىندا سۇحبات بەرۋىن ءوتىنىپ تەلەفون شالعانمىن. بىراق كيم سەرىكباي ۇلى قاتتى سۋىق ءتيىپ اۋىرىپ, اۋرۋحاناعا ءتۇسىپتى. قانشا قيىلىپ قينالسام دا تاپ وسى اراداعى شاراسىزدىعىمدى مويىنداپ, سالىم سۋعا كەتكەندەي وتىرىپ قالدىم.
ارادا ءبىر ساعات وتەر-وتپەستە كيم اعا قوڭىراۋ شالدى. اسكەر ادامىنا ءتان, بەكىنگەن بەكەم داۋىس.
– شىراعىم ىنىشەك, تۇماۋراتتىم دەپ ءبالسىنىپ سۇحبات بەرمەسەك, باۋكەڭنىڭ ارۋاعىنان ۇيات تا! سەن پالەنىنشى پالاتاعا كەلە عوي. شامام كەلگەنشە بىلگەنىمدى ايتايىن.
بولماي قالا جازداپ بولعان سول جولعى سۇحبات ماقالا «قازاقتىڭ باس باتىرى باۋكەڭ حاقىندا پولكوۆنيك كيم سەرىكباەۆپەن اڭگىمە» دەگەن تاقىرىپپەن جارقىراپ گازەت بەتىنە شىقتى دا. كيم اعانىڭ سونداعى قايسارلىعىنا, كۇيبەڭ تىرشىلىكتەن بيىك تۇرعان ورشىلدىگىنە, باۋكەڭنىڭ ارۋاعىنا سونشالىقتى ادالدىعىنا ىشتەي ءبىر قۇرمەتىم ويانىپ ەدى.
سول قۇرمەتىم كەلەسى كەزدەسۋىمىزدە ودان ءارى بەكي تۇسكەن. قازاننىڭ اياعىنا تامان كەشكە ءبىر جيىندا ۇشىراستىق تا, اعا مەنى قايتاردا «ساياحات» اۆتوبەكەتىنىڭ ماڭىنا جەتكىزىپ سالدى. رۋلدە ءوزى. قىزىق بولعاندا دەيمىز-اۋ, سوندا قولىنىڭ ءبىر ساۋساعى بۇگىن تاڭەرتەڭ عانا ماشينانىڭ ەسىگى وزدىگىنەن سارت ەتىپ جابىلعاندا قىسىلىپ قالىپ سۇيەگىنەن شارت سىنىپ, شىناشاعىنىڭ جارىمى تەرىسىنە ءىلىنىپ جالبىراپ قالعان ەكەن. پولكوۆنيك مومىش ۇلى ايتقانداي, پولكوۆنيك تە «سۇيەك-ەتتەن» جارالعان ادام عوي. جاندارمەن ۇيدە رايسا جەڭگەيگە بينتپەن وراتىپ, ەكىنشى قولىمەن قىسىپ ۇستاپ اسكەري گوسپيتالعا جەتەدى. ايتەۋىر نەگىزگى سۇيەگى امان ەكەن, حيرۋرگ دەرەۋ قيۋىن كەلتىرىپ گيپسكە سالىپ, ەندى قوزعالماي ءبىر اپتا جاتاسىز وسىندا دەيدى. بىراق ءدال سول ساتتە كيم سەرىكباي ۇلىنىڭ ءبىر اپتا تۇرماق, ءبىر ساعات تا توسەككە تاڭىلۋعا مۇرشاسى جوق ەدى. تۋرا ءبىر ساعاتتان كەيىن ءوزىنىڭ اسكەري عىلىمدار سالاسىنداعى دوكتورلىق ديسسەرتاتسياسىن تالقىعا سالاتىن رەسەي مەن ۋكراينادان ارنايى كەلگەن ساراپشىلارمەن كەزدەسۋى كەرەك-ءتىن. وسى ءبىر سىن ساعاتتا قولى گيپستەگى جاراقاتتى پولكوۆنيك اۋىرسىنۋدى, الدا بولار اسقىنۋدى ەلەڭ قىلماي, اتام قازاقتىڭ سالتىمەن قايسار نامىسقا تىرىسىپ, ماڭىزدى تالقىدان مۇدىرمەي ءوتتى. وسى ءبىر ارەكەتتە ەر مىنەزدىڭ ەرەندىگى, باتىردىڭ اقكويلەكتىگى جالاۋداي جەلبىرەپ تۇرعان جوق پا. جاي ومىردەگى رۋح مىقتىلىعى دا وسى شىعار. ءسويتىپ, اقجولتاي اعامەن ەكى كورگەندەگى تانىستىعىمىز وسىلاي جالعاسقان. تاعى ءبىر ايدان كەيىن, ياعني 2010 جىلدىڭ 30 قاراشاسىندا كيم سەرىكباي ۇلى ديسسەرتاتسياسىن ءساتتى قورعاپ, اسكەري عىلىمدار دوكتورى اتانعان بولاتىن.
ءيا, اسكەر عىلىمىندا مۇنداي دارەجەگە جەتكەن قازاق ساناۋلى. ال العاشقى قادامدارعا زەر سالساق, ونىڭ وڭاي بولماعانىن بايقايمىز. كيم سەرىكباي ۇلى سوعىس الدىندا تۋعان ۇرپاقتىڭ وكىلى. وسىناۋ جويقىن سوعىسقا تىم قۇرىسا ءبىر كىسىسى, جاقىن-جۋىعى قاتىسپاعان قازاق وتباسى بولماعان-اق شىعار. ەركەك كىندىكتىنى ايتپاعاندا, اقتوبە وبلىسى حرومتاۋ اۋدانىنداعى كوپتوعاي اۋىلىنىڭ ءبىر وزىنەن 8 قىز كەتىپتى سوعىسقا. سونىڭ ۇشەۋى قازا تابادى. سول قىرشىننان قيىلعانداردىڭ ءبىرى كيمنىڭ 1923 جىلى دۇنيەگە كەلگەن, باياعى پاشا انگەلينانىڭ باستاماسىمەن تراكتورعا وتىرىپ, ودان ەكى ايلىق تانكىشىلەر كۋرسىنان ءوتىپ مايدانعا اتتانعان تۋعان اپكەسى اقزيپا جانقىلىشباەۆا ەكەن.
كىشكەنتاي بولسا دا اقزيپا اپكەسىنىڭ قازاسى جانىنا باتتى. ءوزى قۇرالىپتاس بالالارمەن بىرگە سوعىسقا ءبىز دە بارىپ, جاۋدان كەك الساق دەپ ارماندايتىن. كۇيەۋى فين سوعىسىنان ورالماعان عاليا دەگەن جەڭگەسى ساباق بەردى. كۇندە اۋەل باستان ايتاتىنى سوعىستىڭ جايى. اسىرەسە, سوعىستا ەرلىك جاساعان باتىر اعالار جايىنداعى اڭگىمەلەردى قۇمارتىپ تىڭدايدى. سوندا ەڭ ءبىرىنشى ەستىگەندەرى – باۋكەڭنىڭ ەسىمى. ودان سوڭ باۋبەك بۇلقىشەۆ, تولەگەن توقتاروۆ, مالىك عابدۋلليندەردى ەستيدى. سول اعالاردىڭ ەرلىگىمەن رۋحتانىپ وسەدى. قارا قاعاز الىپ جىلاعان شال-كەمپىر, ايەلدەردىڭ قايعىسىن كورگەندە «تەزىرەك ەر جەتىپ, ەلدى ەندى ءبىز قورعاماساق بولمايدى» دەپ وي ءتۇيىپ, بەل بۋاتىن.
ءالى ەسىندە, 23 اقپانداعى قىزىلاسكەر مەرەكەسى الدىندا ءار بالاعا جاتتاۋعا تاقپاق ۇلەستىرىپتى. عاليا اپايى كيمگە «كىم بولام؟» دەگەن جاقسى تاقپاقتى بەرىپ, «اكەڭ كەلىپ تىڭدايدى, جاقسىلاپ جاتتا» دەپ دەمەپ قويادى. كونتسەرتتە تاقپاعىن ەرەكشە جىگەرمەن وقيدى:
ارىستانداي ايباتتى,
جولبارىستاي قايراتتى
قىزىل اسكەر مەن بولام!
بۇدان سوڭ دا توقتاي الماي:
ارىستانداي ايباتتى,
جولبارىستاي قايراتتى
قىزىل اسكەر كوماندير
باۋىرجانداي مەن بولامىن! – دەپ ءارى قاراي ءوز جانىنان قوسىپ ساڭقىلدايدى. وسى ولەڭدى سول ۋاقىتتىڭ وزىندە 60-تىڭ ۇستىنە شىققان اكەسى ەستىپ, ەلجىرەپ كوزىنە جاس العانىن كورەدى. سويتكەن اكە مۇنىڭ 12 جاسىندا, شەشەسى ەكى جىلدان كەيىن اۋىرىپ قايتىس بولىپ, جەتىم قالادى.
جەتىمدەر ءۇيىن پانالاپ, اقتوبەدەگى ينتەرناتتا مەكتەپ بىتىرگەن 1952 جىلداردا باۋىرجان اتى ءتىپتى داۋىرلەپ تۇردى. ەرلىگىن ىزدەپ ءجۇرىپ وقىدى, سونداي بولسام دەپ ارمان ەتتى. باتىرلىعىن, شىنشىلدىعىن, ورلىگىن, تۋرا سويلەيتىنىن ۇلگى تۇتتى. وسىنداي ىنتا-قۇشتارلىقتىڭ اسەر-سەبەبىمەن اسكەر قاتارىنا كىردى.
3 جىل ۋفاداعى اسكەري ۋچيليششە كۋرسانتى بولعان كيم سەرىكباەۆ قيىر شىعىستاعى چۋكوتكادا ۆزۆود كومانديرلىگىنەن باستاپ, ۋكراينادا پولكتىڭ شتاب باستىعىنا دەيىن ءوستى. ۋكراينانىڭ سلاۆۋتا دەگەن قالاسىندا كوبىرەك قىزمەت ەتتى. سوندا ون جىل بويى, لەيتەنانتتان مايورعا دەيىنگى ارالىقتا اسكەري قىزمەت وزاتتارى اللەياسىنداعى قۇرمەت تاقتاسىنان پورترەتى تۇسكەن جوق. 3 مىڭعا جۋىق وفيتسەردىڭ اراسىندا جالعىز قازاق بولعاندىقتان دا نامىسقا تىرىسىپ, جىلما-جىل ۇزدىك اتانۋعا ۇمتىلىپ باعاتىن.
جاسى 32-دەن اسقاندا اسكەري اكادەمياعا وقۋعا ءتۇستى. كۇندىزگى بولىمگە 32-گە دەيىن عانا قابىلدايدى ەكەن. بۇدان جاسى ءسال عانا اسقان بىرنەشە جىگىت ءوتىنىش جازىپ ەدى, ورىستاردى عانا كۇندىزگى بولىمگە اۋىستىرىپ, 300 ادامنىڭ ىشىندەگى جالعىز قازاقتى وگەيسىتىپ, سىرتقى بولىمدە قالدىرىپ قويدى. «ءاي قازاق, ەندى مىقتى بول!» دەپ ويلادى ىشىنەن. ءتورت جىل بويى سول مىقتىلىقتان جازباعان. اكادەميانى سىرتتاي بىتىرگەن 220 تىڭداۋشىنىڭ ىشىنەن ۇزدىك وقىعان 14-ءىن اسپيرانتۋراعا الدى. سونىڭ ىشىندەگى جالعىز قازاق تاعى دا كيم سەرىكباەۆ ەدى.
بۇل كەزدە اسكەري قىزمەتى ءماسكەۋگە اۋىسقان. وتباسىمەن ۋاقىتشا ەكى بولمەلى پاتەردە تۇرىپ جاتقان, ەندى ءتورت بولمەلىسىن الامىن دەپ جۇرگەن. موڭعوليا مەن كۋبا وفيتسەرلەرىنە تاكتيكادان ساباق بەردى. كانديداتتىق ديسسەرتاتسياسىن ەلدىڭ الدىمەن جازىپ, تاپسىرىپ قويعان. اكادەميادا قالاتىنىنا سەنىمدى-ءتىن. بىراق تاعدىر جانە قورعانىس ءمينيسترى گرەچكونىڭ بىتىرۋشىلەردىڭ 60 پايىزىن اسكەري ۋچيليششەلەرگە جىبەرۋ تۋرالى بۇيرىعى باسقاشا شەشتى. سونىمەن بىرگە جان تۇكپىرىندەگى قازاقي نامىسقا, قالىپقا سىيماس باۋىرجاندىق مىنەزگە سالىپ ءداۋ گەنەرالدارمەن پىكىر تالاستىرىپ, ايتىسىپ قالۋى دا فرۋنزە اتىنداعى اكادەميادا ساباق بەرىپ جۇرگەن كيم سەرىكباەۆتىڭ ماسكەۋدەن شەتتەتىلىپ, الماتىعا, 70-ءشى بەكەتتەگى كونەۆ اتىنداعى اسكەري ۋچيليششەگە تاكتيكا كافەدراسىنىڭ مەڭگەرۋشىسى بولىپ كەلۋىن تەزدەتىڭكىرەپ جىبەرگەن سىڭايلى. ءوزىن قازاقتىڭ: «باسقا جەردە سۇلتان بولعانشا, ءوز ەلىڭدە ۇلتان بول!» دەگەن ءبىر جاقسى, قاناتتى سوزىمەن جۇباتتى. «ەلىڭە بار» دەپ وتىر عوي. وندا دا جەتپەي جاتىر كادرلار. بارايىن» دەپ شەشتى.
سونىمەن, ەلگە كەلدى. تاكتيكا كافەدراسىن باسقارىپ ءۇش جىل ىستەدى. بۇل – سوعىس ادىسىنە دايىندايتىن نەگىزگى كافەدرا. باسقا بارلىق 10 كافەدرا وسى تاكتيكا كافەدراسى ءۇشىن جۇمىس ىستەيدى. جۇمىستى ماسكەۋدەن كەلىپ تەكسەردى. ۋچيليششە پودپولكوۆنيك كيم سەرىكباەۆتىڭ باسشىلىعىمەن اسكەري ينسپەكتسيادان ابىرويمەن ءوتتى. قولىندا باۋلىعان كۋرسانتتارىنىڭ ءبىرسىپىراسى گەنەرال, پولكوۆنيك بولدى. سولاردىڭ ىشىندە ۇلكەن لاۋازىمعا جەتكەن الىبەك قاسىموۆ, بولات جاڭاساەۆ, جاقىندا عانا جىل اسكەريى اتانعان مۇرات مايكەەۆ جانە باسقالارىن كيم اعا ورىندى ماقتان تۇتادى. قازاقستان بويىنشا ءوزى تاربيەلەگەن گەنەرالدار 20-عا جۋىق, ال تمد ەلدەرى بويىنشا 40 شاقتى. سولاردىڭ ءبارى قازىر كەزدەسكەندە تىك تۇرىپ ىزەت قىلادى.
ءبىر ۇمىتپاس كۇنى – 1974 جىلدىڭ 14 ناۋرىزىندا كانديداتتىق ديسسەرتاتسياسىن قورعاعان. سوندا فرۋنزە اتىنداعى اسكەري اكادەميا باستىعى, ارميا گەنەرالى ا.رادزيەۆسكي جانىنا كەلىپ, «بۇگىن العاش رەت قاھارمان قازاق حالقىنىڭ وكىلى اسكەري عىلىم كانديداتى اتاعىن ويداعىداي قورعاپ شىقتى!» دەپ قۋانا قۇتتىقتاپ, اكەلىك مەيىرمەن قۇشاقتاپ ەدى. ديماش احمەت ۇلى سوۆمين توراعاسى بايكەن ءاشىموۆ پەن ورتالىق ازيا اسكەري وكرۋگىنىڭ قولباسشىسى لياششەنكوعا ارنايى تاپسىرىپ, الماتىنىڭ جاقسى اۋدانىنان ءتورت بولمەلى ءۇي بەرگىزىپ ەدى. كونەۆ اتىنداعى ۋچيليششە باستىعى, اسا شارۋاگەر, ءناتى جاقسى ادام ۆاچيكان ۆلاسوۆ: «مەن جاقىندا زەينەتكە كەتەم, ورنىما يكەمدەلە بەر» دەپ ۇمىتتەندىرىپ تە قويعان. ءبىر قازاق وداقتىق اسكەري ۋچيليششە باستىعى بولىپ اقىرىپ وتىرسا, ۇلتقا ايبىن, مەرەي ەدى عوي. بىراق بۇل جولى دا «ۇيدەگى كوڭىلدى بازارداعى نارىق بۇزدى», جوعارىدان تۇسكەن قاۋلىنىڭ نەگىزىندە ەلدەگى جوعارى پارتيا مەكتەپتەرىندەگى اسكەري كافەدرالار قالپىنا كەلتىرىلدى. ورتالىق كوميتەتتە: «ءسىز ۇلت كادرىسىز. ونان كەيىن ءسىز ارميانىڭ عانا سولداتى ەمەسسىز, ەڭ الدىمەن پارتيانىڭ سولداتىسىز» دەپ سىپايى دۇممەن ايتىلعان سوڭ كيم سەرىكباي ۇلىنىڭ الماتى جوعارى پارتيا مەكتەبىنە اسكەري كافەدرا باستىعى بولىپ بارماۋىنا بولماي قالعان. ۋاقىت سولاي ەدى. پارتيانىڭ ايتقانى زاڭ بولاتىن.
قازىر ويلاپ قاراسا, بۇعان دا وكىنىشى جوق. 13 جىل جۇمىس ىستەدى. باسقارۋىنداعى اسكەري كافەدرا 15 جىل بويى وداقتا بىرىنشىلىكتى بەرمەدى. سول كەزدە ۇستازدىعىنا ۇيىعان نە سان اتپال ازاماتتار قازىردە تاۋەلسىز ەلىمىزدىڭ سالا-سالا قىزمەتىندە ءجۇر.
جۇمىسىندا ءمىن جوق ەدى. بار ءمىنى بەتكە ايتاتىن تۋراشىلدىعى بولاتىن. اسكەري ادام سويتپەگەندە قايتەدى. بىراق ول تۋراشىلدىق وزىنە زيان بولىپ تيەتىنىن كەيىن ۇقتى. ءالى بەس جىل اسكەر قاتارىندا جۇرۋگە حاقىلى بولسا دا 1988 جىلى 54 جاسىندا زاپاسقا شىقتى. بىراق جاقسى كادر قايتكەندە دە جەردە قالمادى. ەكى كۇننەن كەيىن وقۋ ءمينيسترى شايسۇلتان شاياحمەتوۆ شاقىرىپ: «كامەكە, ەڭبەگىڭىزدى بىلەمىز. ءسىز بۇرىن ونەبويى ۆىسشي شكولدا ىستەپ ەدىڭىز, ال ەندى كەلىسىپ جاتساڭىز «نيزشي» شكولعا جىبەرگىمىز كەلىپ وتىر», دەپ قۋاقى جىميعان.
ءتارتىپ ناشارلاپ, وقۋ دەڭگەيى مۇلدەم تومەندەپ كەتكەن وسى اسكەري مەكتەپتى كيم سەرىكباي ۇلى ءۇش جىلدا شىن مانىندەگى جوعارى دارەجەگە جەتكىزدى. وقۋ-تاربيە ءىسىن جانداندىرىپ, جاڭارتىپ, ۋاقىت تالابىنا ساي قايتا قۇردى. مەكتەپكە حالقىمىزدىڭ قاھارمانى باۋىرجان مومىش ۇلىنىڭ اتىن بەرگىزىپ, الدىنا ەل بويىنشا تۇڭعىش ءمۇسىن-ەسكەرتكىشىن قويعىزدى.
تاۋەلسىزدىك جىلدارىندا كيم سەرىكباي ۇلى تولىسقان تەورەتيك ءارى پاراساتتى پراكتيك رەتىندە تۇلعالانا ءتۇستى. ول تۇڭعىش قورعانىس ءمينيسترى ساعادات نۇرماعانبەتوۆپەن بىرگە قازاقستان قارۋلى كۇشتەرىن قۇرۋدىڭ باستاۋىندا تۇردى, اسكەر سالاسىنىڭ ەرتەڭگە نىق قادام باسۋىنا كوپ ەڭبەك ءسىڭىردى. مەملەكەتتىك قورعانىس كوميتەتى توراعاسىنىڭ كەڭەسشىسى جانە پرەزيدەنت پەن مينيسترلەر كابينەتى اپپاراتى قورعانىس ءبولىمىنىڭ مەڭگەرۋشىسى بولا ءجۇرىپ ەلىمىزدىڭ العاشقى اسكەري دوكتريناسىن, جاس مەملەكەتتىڭ باسقا دا اسكەري زاڭدارىن دايىنداۋ, ولاردى جوعارعى كەڭەسكە ۇسىنىپ, قابىلداتتىرۋ مىندەتتەرىن ءوز موينىنا الدى. ساعادات اعاسى دا وسىندايدا: «پراكتيكالىق جاعىن مەن اتقارايىن, تەورياسىمەن سەن اينالىس» دەپ دەم بەرىپ قوياتىن. بىرگە ءجۇرىپ, بىرگە تۇرىپ, ماسكەۋگە دە باردى. كوپ ماتەريال جيىلىپ, جارتى جىلدا دوكترينا دا جازىلىپ بولىپ ەدى. «قورعانىس جانە قارۋلى كۇشتەر» تۋرالى دەگەن العاشقى زاڭ جوباسىن كيم سەرىكباي ۇلى جوعارعى كەڭەستە ەكى كۇن قورعاعان-دى. ال اسكەري دوكترينانى ساعادات اعا ءوزى قورعاعان بولاتىن. بۇل دا ءبىر ءومىردىڭ جارقىن كەزەڭى.
كيم سەرىكباي ۇلى سەگىز قىرلى, ءبىر سىرلى تۇلعا. ءار قىرى جەكە اڭگىمە ارناسى. قازاقتىڭ جاڭا زامانداعى اسكەري ءىلىمىنىڭ كوشباسشىسى. اسكەري رەفورمالاردىڭ قامشىگەرى. باۋىرجانتانۋدى باستاعان باھادۇر, باۋكەڭنىڭ شىراقشىسى. كۇنى بۇگىنگە دەيىن قورعانىس ۇلتتىق ۋنيۆەرسيتەتىندە بولاشاق ساردارلارعا ساباق بەرىپ جۇرگەن اسكەري ۇستاز. ءدارىس وقيدى, سەمينارلار جۇرگىزەدى. دوكتورانتتارى مەن ماگيسترانتتارى بار. سونىمەن بىرگە, سوڭعى 7-8 جىلدا الماتىنىڭ مەدەۋ اۋداندىق ارداگەرلەر كەڭەسىنە جەتەكشىلىك ەتىپ, قاريالارعا قامقور بولۋعا دا ۋاقىت تابۋدا.
تاسجارعان تامىردان الىپ بايتەرەككە اينالعان كيم اعا ايتقانداي, وسىناۋ جاقسى ىستەردىڭ ءومىرى ۇزاق بولاتىنىنا ءبىز دە كامىل سەنەمىز.
قورعانبەك امانجول,
«ەگەمەن قازاقستان».
الماتى.
