باتىس قازاقستان وبلىستىق اۋىل شارۋاشىلىعى باسقارماسىنىڭ باسشىسى جاسۇلان ءحاليولليننىڭ ايتۋىنشا, وتكەن جىلى ەگىلگەن كۇزدىك داقىلدى (95,2 مىڭ گا) قوسقاندا بيىلعى ەگىس القابى 537,5 مىڭ گەكتاردى قۇرايدى. سونىڭ ىشىندە ءداندى داقىلدار – 296,9 مىڭ گا, مايلى داقىلدار – 118,2 مىڭ گا, كارتوپ, كوكونىس جانە باقشا داقىلدارى – 9,6 مىڭ گا. بۇعان قوسا 31,9 گا القاپقا مال ازىقتىق داقىلدار ەگىلگەن.
«ەگىستىڭ ءدال قازىرگى جاي-كۇيى نەگىزىنەن قاناعاتتانارلىق, تەك 0,8% القاپتىڭ ونىمدىلىگى تومەن, ال 0,7 مىڭ گا (0,3%) وتكەن ايداعى اپتاپ ىستىقتا كۇيىپ كەتتى», دەيدى ج.حاليوللين.
وڭىردە كۇزدىك ەگىندى ورۋ جۇمىسى باستالىپ تا كەتتى. ازىرگە گەكتارىنا 4-12 تسەنتنەر ارالىعىندا ءونىم جينالۋدا. بىلتىر بۇل كورسەتكىش 22,4 تس/گا بولعانىن ەسكەرسەك, ازداۋ, ارينە. بىراق ديقاندار بيىل ءداندى داقىلدار القابىنان بارلىعى 168,3 مىڭ توننا ءونىم الۋدى كوزدەپ وتىر. ونىڭ شامامەن 75 مىڭ تونناسى مال ازىعىنا پايدالانىلماق.
باسقارمانىڭ جوسپارلاۋىنشا, بيىلعى جاڭا ءونىم وبلىستىڭ ازىق-ت ۇلىك بيدايعا سۇرانىسىن 119%-عا, تۇقىمعا قاجەتتىلىكتى 100%-عا قامتاماسىز ەتۋى ءتيىس. ەگىن وراعىنا قاتىساتىن 949 كومباين مەن وزگە دە تەحنيكا سايلانىپ تۇر. باسقارما باسشىسى بيىلعى ەگىن وراعى مەن كۇزگى دالالىق جۇمىستارعا 11 مىڭ توننا ارزانداتىلعان ديزەل وتىنىن ءبولۋ جونىندە اۋىل شارۋاشىلىعى مينيسترلىگىنە ارنايى ءوتىنىم جولدانعانىن ايتادى.
بيىل ماڭعىستاۋ, قىزىلوردا وڭىرىندە قۋاڭشىلىق بولىپ, مال ازىعىنا تاپشىلىق سەزىلۋدە. ونىمەن سالىستىرعاندا باتىس قازاقستان وبلىسىندا جاعداي جامان ەمەس. سوندىقتان ءوڭىر باسشىسى جەرگىلىكتى اۋىل شارۋاشىلىعى ۇيىمدارىنا مال ازىعىنىڭ 1,5 جىلدىق قورىن جاساقتاۋ مىندەتىن قويىپ وتىر.
باتىس قازاقستان وبلىسى
