جەلىدەگى جالعىزدىق
الەۋمەتتىك جەلىدە اسىرەبەلسەندى. كۇن سايىن قيسىنى كەلسىن-كەلمەسىن فوتوسىن جۇكتەپ, ءبىر اۋىز بولسا دا ءسوز جازىپ قالدىرۋدى ادەتكە اينالدىرعان. كەز كەلگەن جازباعا پىكىرىن «قىستىرىپ» كەتەتىن ىنتالىلىعى تاعى بار. جەلىدەگى جۇرتتىڭ دەنى ونى تانيدى, «جاقسى كورەدى», «قۇرمەتتەيدى». كەيدە ءتىپتى كورىنبەي قالسا, ىزدەپ, «جوقتاپ» جاتادى.
الەۋمەتتىك جەلىدەگى ونىڭ ءومىرى تاڭنان باستالمايدى, تۇنمەن جالعاسىپ كەتەدى. كەيدە ەرتە ويانىپ, بويانىپ-تارانۋعا ەرىنسە, «جەلىگە قاي بەتىممەن قارايمىن» دەگەن «جىگەر» جەلكەلەپ تۇرعىزىپ الادى. ساعات سايىن بولماسا دا, تاۋلىك بويى تۇرلەنىپ تۇراتىن Stories-ءىن جاڭالاپ تۇرۋ ول ءۇشىن «جاۋاپتى جۇمىسپەن» تەڭ. جۇرگەن-تۇرعانىن, ىشكەن-جەگەنىن, كيگەن-شەشكەنىن, ساتىپ العانى مەن تاستاعان قوقىسىنا دەيىن جەلىگە جۇكتەپ وتىرعاننان كەيىن بولار, ونىڭ بۇكىل ءومىرى – جەلىدەگى جۇرتتىڭ كوز الدىندا. بىلاي قاراعاندا, جالعىز ەمەس. سەبەبى جەلىدە ونىڭ «دوستارى», «تىلەۋلەستەرى» مەن «جاناشىرلارى» وتە كوپ. بىراق شىنايى ومىردە سوقا باسى سوپيىپ جۇرەدى...
جان-جاعىڭىزعا كوز تاستاساڭىز, مۇنداي جاندار اينالاڭىزدا از ەمەس. اسىرەسە, نازىك جاندار اراسىندا. الايدا الەۋمەتتىك جەلى جالعىزدىقتىڭ جاراسىن جازا الا ما؟ جەكە ءومىرىنىڭ قۇپيا-سىرىن جەلىدە جاريا ەتۋ – جالعىزدىقتىڭ بەلگىسى مە, الدە بۇل قوعاممەن ءتىل قاتىسۋدىڭ جاڭا ءتاسىلى مە؟ جالعىزدىقتى جەلى ارقىلى جاسىرىپ-جابۋدىڭ سالدارى قانداي؟ سوڭعى كەزدە وسى سۇراقتار پسيحولوگ – مامانداردى عانا ەمەس, ۇرپاعى ۆيرتۋالدى ءومىر سۇرۋگە داعدىلانىپ بارا جاتقان ۇلكەندەردى دە مازالاپ ءجۇر.
الەۋمەتتىك جەلىنىڭ كوزگە كورىنبەيتىن ءبىر سيقىرلى كۇشى بار. ىشىنە ءبىر ساتكە باس سۇققان ادام, التىن ۋاقىتىنىڭ قالاي ءوتىپ كەتكەنىن سەزبەي دە قالادى. جەلىسىز تاڭى اتپاي, ءبىر فوتوسىن جۇكتەپ, ءبىر اۋىز ءسوز جازباسا, كۇنى باتپاي قالاتىنداي كۇي كەشىپ جۇرگەن قىزداردىڭ وسى ماڭدى اينالسوقتاپ, شىرماۋىنان شىعا الماي جۇرگەنى دە وسى سيقىردان بولار. جەلىدەگى تانىمايتىن تانىستارعا ەسىل ۋاقىتىن قور قىلىپ جۇرگەن بويجەتكەندەرگە ەس كىرەم دەگەنشە قاتال ۋاقىت پەن جالعىزدىق ءوز دەگەنىن جاساپ ۇلگەرەدى.
جالعان, الدامشى بەلسەندىلىك – جەلىدەگى جالعىزدىقتىڭ ءبىر بەلگىسى. جەلىدە «جۇلدىز» بولعانىمەن, شىنايى ومىردە جالعىز جانداردىڭ ماسەلەسىن پسيحولوگتەر تەحنولوگيانىڭ دامۋىمەن جانە الەۋمەتتىك جەلىدەگى قارىم-قاتىناستىڭ تىم تەرەڭدەپ كەتكەنىمەن تىعىز بايلانىستىرادى. ال SMM ماماندار الەۋمەتتىك جەلى كوممۋنيكاتسيا سالاسىندا عانا ەمەس, ادامداردىڭ ءومىر ءسۇرۋ سالتىندا دا رەۆوليۋتسيا جاسادى دەگەن پىكىرلەرىن ءجيى ايتىپ ءجۇر. «الايدا الەۋمەتتىك جەلى وزىمەن بىرگە جاڭا مۇمكىندىكتەرمەن قاتار, قاۋىپ-قاتەردى دە الا كەلدى. الەمنىڭ كەز كەلگەن جەرىندەگى اداممەن بايلانىس ورناتۋ وڭاي, جاڭالىق الۋ جىلدامداعانىمەن, جەلىگە تاۋەلدى بولۋ قاۋپى وتە زور. ال بۇل تاۋەلدىلىك, اسىرەسە, جاستاردى, وڭ-سولىن باعامداپ ۇلگەرمەگەن جەتكىنشەكتەردى رۋحاني كۇيزەلىسكە ۇشىراتۋى ابدەن مۇمكىن», دەيدى SMM مامان جالعاس ەرتاي.
ال پسيحولوگتەر كۇيزەلىستىڭ سوڭى دەپرەسسيا مەن سۋيتسيد ەكەنىن اۋەل باستان ايتىپ, دابىل قاعىپ ءجۇر. ءىىم-ءنىڭ رەسمي دەرەگىنە سۇيەنسەك, جىل باسىنان بەرى 248 ءجاسوسپىرىم ءوزىن ءوزى ولتىرمەك بولعان. وكىنىشكە قاراي, ولاردىڭ 84-ءى كوز جۇمدى. ءسۋيتسيدتىڭ سەبەپ-سالدارىنا تالداۋ جاساعان ماماندار ءاربىر ءۇشىنشى جەتكىنشەك ءوزىن جالعىز سەزىنگەننەن وسىنداي قادامعا بارعانىن ايتىپ, اقتالاتىنىن مالىمدەگەن.
الەم ەلدەرىنىڭ ىشىندە جەلىدەگى جالعىزدىق ماسەلەسى قازىر جاپونيادا وتە وتكىر. كۇنشىعىس ەلىندە, اسىرەسە, پاندەميا كەزىندە ايەلدەر مەن جەتكىنشەكتەر اراسىندا وزوزىنە قول جۇمساۋ دەرەكتەرى كوبەيىپ كەتكەن. جاپون پوليتسياسىنىڭ مالىمەتىنشە, وتكەن جىلى بۇل قارالى سان 20 مىڭعا جەتكەن. اسپانمەن تالاسقان بيىك-بيىك عيماراتتارى مەن ءبىر-بىرىمەن ءيىن تىرەسكەن قالالارى كوپ مەملەكەتتە كوبىنەسە نازىك جاندار جالعىزدىققا شىداماي, ءوز-وزدەرىنە ءجيى قول جۇمسايتىن كورىنەدى. وسى ەلدىڭ ءتىلى مەن مادەنيەتىن زەرتتەپ جۇرگەن عالىم الەكساندر راەۆسكي: «جاپونيادا كوشەدە نەمەسە باسقا جەردە تانىسۋ وتە سيرەك كەزدەسەدى. حالىقتىڭ باسىم كوبى ءۇشىن مۇنداي تانىستىق ىڭعايسىز ءارى قاتتى تولقۋ تۋدىرادى. نەگىزىنەن, بارلىعى ونلاين رەجىمىندە تانىسادى», دەيدى.
باسقاشا ايتقاندا, تەحنولوگيانىڭ كەڭىنەن تارالۋى ادامداردى وزگەشە ءومىر سالتىنا الىپ كەلدى. بۇل ومىردە ولار شىنايى, تابيعي الەۋمەتتىك بايلانىستاردان تولىعىمەن باس تارتىپ, ۆيرتۋالدى الەمدە تىرشىلىك كەشىپ ءجۇر.
جالعىزدىق وتكەن جىلدىڭ ەڭ وزەكتى ماسەلەلەرىنىڭ ءبىرى رەتىندە تانىلدى. ال ونىمەن كۇرەس 2021 جىلدىڭ باستى باعىتى بولىپ وتىر. تەلەكوممۋنيكاتسيا ساراپشىلارى تەحنولوگيا دامىعان سايىن الەمدە جالعىزباستى ادامداردىڭ سانى دا ارتىپ كەلە جاتقانىن ايتۋدا. پسيحولوگتەر جالعىزدىققا دۋشار بولعان جانداردىڭ پسيحولوگيالىق دەنساۋلىعى دا اقسايتىنىن اشىق مالىمدەۋدە.
Tik Tok نەگە تاربيەلەيدى؟
سوڭعى ۋاقىتتا جەتكىنشەكتەردىڭ Tik Tok جەلىسىنە ءجيى جۇگىنەتىنىن بايقاپ ءجۇرسىز بە؟ اسىرەسە, 8-14 جاستاعى ءجاسوسپىرىم قىزدار وسى الەۋمەتتىك جەلىنىڭ «قىزىعىنا باتىپ كەتكەن». اينالاسى 2-3 جىلدىڭ ىشىندە 150 ەلدىڭ ءبىر ميللياردتان استام حالقىن «جاۋلاپ العان» Tik Tok-تىڭ قۇدىرەتى نەدە؟ قىتايلىق جەلىنىڭ جاستارعا بەرەرى بار ما؟ الدە بۇل ءمانسىز-ماعىناسىز بەينەجازبالار ارقىلى ۇرپاقتى ازدىرۋدىڭ تاعى ءبىر ءتاسىلى مە؟
Tik Tok-قا تىركەلگەن قولدانۋشىلاردىڭ ءبىر بولىگى بۇل قوسىمشانى ۇناتپاي بىردەن ءوشىرىپ تاستايدى, ەندى ءبىرازى قىزىقتى, تارتىمدى روليكتەردى كورۋ ءۇشىن عانا قالادى, ال قالعاندارى كونتەنتتىڭ نەگىزگى گەنەراتورى بولىپ سانالادى. الەۋمەتتىك جەلى جاستاردى جەلىمشە جابىستىرىپ الادى, سوسىن اقىرىنداپ تەرەڭىنە تارتا باستايدى. جەتكىنشەك جاي عانا قىزىعۋشىلىقپەن تۇسىرگەن العاشقى روليگىن سالادى. بۇل «تۋىندىسىن» ساناۋلى ۋاقىتتىڭ ىشىندە شامامەن 100 ادام كورسە, سونىڭ ىشىندە ءبىر-ەكەۋى لايك باسىپ, بىرنەشەۋى ويىن جازىپ قالدىرۋى مۇمكىن. وسىدان كەيىن ول ەكىنشى, ءۇشىنشى بەينەجازباسىن جۇكتەيدى. وسىلايشا, ءوزى قىسقا بەينەجازبا مەن روليكتەردى كورۋ مەن ءتۇسىرۋدىڭ قىزىعىنا باتىپ كەتەدى... Tik Tok-تى, نەگىزىنەن, مەكتەپ وقۋشىلارى قولدانادى. ولارعا قازىر وزگەنىڭ بەينەجازبالارىن كورۋ دە, وزدەرى ءتۇسىرۋ دە قىزىق. «Tik Tok تۇسىرەمىز» دەپ كوپقاباتتى ءۇيدىڭ شاتىرىنا شىعىپ كەتكەن جايتتار دا وسىنداي كوزسىز قىزىعۋشىلىقتىڭ كەسىرىنەن تىركەلۋدە. ەستەرىڭىزدە بولسا, وتكەندە الماتى وبلىسىندا 15-16 جاستاعى ەكى جەتكىنشەك سەلفي جاسايمىز دەپ قازا تاپتى. قايعىلى وقيعا الاكول اۋدانىنىڭ بەسكول اۋىلىنداعى بالىق زاۋىتىنىڭ جانىندا بولعان. ەكى قاباتتى عيماراتتا سەلفي جاساماق بولعاندا, جەتكىنشەكتەردىڭ ۇستىنە بەتون پليتا قۇلاپ كەتكەن ەدى...
بۇگىندە الەمدەگى قىسقا روليكتەرگە ارنالعان بىرەگەي بەينەپلاتفورما بولىپ سانالاتىن Tik Tok-تىڭ وكىلدىكتەرى لوس-اندجەلەس, نيۋ-يورك, لوندون, پاريج, بەرلين, دۋباي, مۋمباي, دجاكارتا, سەۋل جانە توكيو سەكىلدى ءىرى قالالاردا بار. بىراق مىنا ءبىر جايتتى ەسكەرگەنىمىز ءجون. وسىدان ەكى جىل بۇرىن اقش اسكەرى ءوز ساربازدارىنا Tik Tok قوسىمشاسىن پايدالانۋعا تىيىم سالدى. قولدانۋشىلاردىڭ جەكە مالىمەتتەرىن ۇرلايدى دەپ شەشىم شىعارعان وسى ەلدىڭ قورعانىس مينيسترلىگى بۇل الەۋمەتتىك جەلىنى قاۋىپتى دەپ تاپقان. ال بىلتىر جازدا ءۇندىستان بۇل جەلىنى ەلدىڭ تۇتاستىعىنا ىرىتكى سالاتىن 58 قىتايلىق قوسىمشانىڭ قاتارىنا ەنگىزىپ, مەملەكەت اۋماعىندا قولدانۋعا شەكتەۋ قويعان. 2018 جىلى اقش Tik Tok-تى اتا-انالارىنىڭ رۇقساتىنسىز 13 جاسقا دەيىنگى بالالاردان اقشا جينادى دەپ ايىپ تاققان. قوسىمشانى ازىرلەگەندەرگە بالالاردىڭ قۇپيالىلىعىن ينتەرنەتتە قورعاۋ تۋرالى زاڭناما نەگىزىندە ەڭ ءىرى كولەمدە – 5,7 ميلليارد دوللار ايىپپۇل سالۋ تۋرالى شەشىم شىعارىلعان.
قازىر Tik Tok-تى تالقىلايتىندار كوپ. سىنايتىندار دا, قولدايتىندار دا از ەمەس. ءبىرى جەلىنى كوڭىل كوتەرۋدىڭ كوزى دەپ ساناسا, ەندى ءبىرازى جاستاردى رۋحاني ازدىرۋدىڭ جولى دەيدى. ءبىر نارسە انىق. ول – قىتايلىق تيك توك تا وزگە الەۋمەتتىك جەلىلەر سەكىلدى, بۇگىنگى قوعامنىڭ بەت-بەينەسى. اينالامىزدا بولىپ جاتقان وزگەرىستەر مەن سان ءتۇرلى ادامنىڭ سان قيلى قىزىعۋشىلىعى, سۇرانىسى, مىنەز-قۇلقى, ءتىپتى ءتۇرلى تاربيەسى بار. باي-باعلانى مەن كەدەي-كەپشىگى, جاسى مەن جاسامىسى, جۇلدىزى مەن «جۇلدىز بولسام» دەپ جەلىككەنى دە وسىدان تابىلادى. بۇل جەلىدەن تۇككە تۇرعىسىز, ءمانسىز, ماعىناسىز اقىماقتىڭ ءىسىن دە كورۋگە بولادى, ءبىر ءسات ەزۋ تارتقىزار, كوڭىل كۇيىڭدى كوتەرەر قىزىقتى دا كەزىكتىرە الاسىڭ. قىسقا قايىرىلاتىن روليكتەردەن قانداي دا ءبىر وي-تۇجىرىم ىزدەۋدىڭ قاجەتى شامالى. سەبەبى, Tik Tok-تىڭ باستى كوزدەگەنى – ساناعا ساڭىلاۋ ءتۇسىرۋ ەمەس, اۋديتوريانى وزىنە تارتۋ عانا. مۇندا ءبىر قاتىپ قالعان قاعيدا جوق. ءبىزدىڭ قوعامدا بالاسىنىڭ ساناسىنا نەنى ءسىڭىرىپ, كىمنەن قانداي ۇلگى الىپ جۇرگەنىنەن بەيحابار اتا-انالار, وكىنىشكە قاراي, وتە كوپ. ءوز بەتىمەن وسكەن ۇل-قىزدىڭ ءتالىم-تاربيەسى دە اقساپ تۇرادى. تەحنولوگيا دامىعانىمەن, تاربيەمىزدىڭ السىرەپ بارا جاتقانى اششى دا بولسا شىندىق. سول سەبەپتى ۇرپاقتىڭ بويىنداعى جىلت ەتكەن جاقسى قاسيەتتى ءوشىرىپ الماي, مولايتۋعا قاراي جۇمىس ىستەگەنىمىز ابزال. ەندىگى ماقسات – جاڭا وسكىنگە جابىسقان جەلىنىڭ كەسىرىنەن ساقتانىپ, جەتكىنشەكتىڭ ساناسىنداعى كورسەقىزارلىق پەن شەكتەن شىققان قىزىعۋشىلىقتى اۋىزدىقتاۋ.
الەۋمەتتىك جەلىنى نەمەن الماستىرامىز؟
ء«بىز, ەرەسەكتەر, وسكەلەڭ ۇرپاققا شىنايى ومىردە قانشالىقتى نازار اۋدارىپ ءجۇرمىز؟ وتباسىنداعى شىنايى اڭگىمە, جاندى قارىم-قاتىناس دەڭگەيى قانداي؟ ولاردىڭ قىزىعۋشىلىعىنا ساي ۋاقىت ءبولىپ ءجۇرمىز بە؟ الەۋمەتتىك جەلىنى الماستىراتىن بالامالى ارەكەتتى ۇسىندىق پا؟ الدىمەن وسى سۇراقتار كوتەرىلۋى ءتيىس. سەبەبى, ماسەلەنىڭ بارلىعى الەۋمەتتىك جەلىدە ەمەس», دەيدى ەلورداداعى ءا.بوكەيحان اتىنداعى №76 مەكتەپ-ليتسەيىنىڭ ديرەكتورى سافۋرا سەيدۋاليقىزى.
الەۋمەتتىك جەلىنىڭ زاماناۋي قوعامنىڭ يگىلىكتەرىنىڭ ءبىرى ەكەنىن العا تارتقان مەكتەپ باسشىسى جەلىدەن بالانى اجىراتۋعا ەمەس, سول ورتانى جەتكىنشەككە پايدالى كونتەنتپەن تولتىرۋدى ويلاۋ كەرەكتىگىن ايتتى. «ويتكەنى ەرەسەكتەردىڭ ءوزى جەلىدەن شىعا الماي جۇرگەن ۋاقىتتا بالا دا سول جەردەن ءوز «ورتاسىن» وڭاي تاۋىپ الادى», دەيدى ول.
«الەۋمەتتىك جەلىگە تاۋەلدىلىكتىڭ سالدارى تۇسىنىكتى. ال سەبەبىن زەرتتەپ كوردىك پە؟ ومىردە بالانىڭ ويىن, مۇڭ-مۇقتاجىن, قۋانىشىن بولىسەتىن ادامنىڭ بولماۋى, سەنىمنىڭ جوعالۋى, قاتەلىك ءۇشىن ءومىر بويى «جازالانۋى», بالانىڭ كۇندەلىكتى ومىرىنە اتا-انانىڭ نەمقۇرايدىلىعى – مىنە, وسىنىڭ بارلىعى ۇل-قىزىمىزدى جەلىنىڭ تۇتقىنى بولۋعا يتەرمەلەيدى. شىنداپ كەلگەندە, بالاسىنا تاربيە بەرۋگە ءتيىس اتا-انانىڭ ءوزى دە قازىر Instagram مەن Facebook-ءتىڭ شىرماۋىنان شىعا الماي ءجۇر», دەگەن س.سەيدۋاليقىزى الەۋمەتتىك جەلىنى بالانى ءبىلىم مەن شىعارماشىلىققا تاربيەلەۋدىڭ قۇرالى رەتىندە قولدانۋ جولدارىن قاراستىرۋدى ۇسىندى.
«اتا-انا, مۇعالىم تاراپىنان وسى سەبەپتەردى بولدىرماساق, وقۋشىنىڭ شىنايى جانە ۆيرتۋالدى ومىرىندە ۇيلەسىمدى تەڭگەرىم قۇرۋعا بولادى. سەبەبى, ءار بالا – ەرەسەكتەردىڭ ايناسى. ءوزى كىتاپ بەتىن اشپايتىن اتا-انانىڭ قىزىنا «كىتاپ وقى» دەگەنى, ءوزى سپورتپەن اينالىسپايتىن اكە-شەشەنىڭ ۇلىنا «سپورتپەن شۇعىلدان» دەپ اقىل ايتقانى قازىرگى ۋاقىتتا ءوتىمدى ەمەس. ال مۇعالىمدەر ححI عاسىردىڭ داعدىلارىن الدىمەن ءوز بويىندا قالىپتاستىرۋى كەرەك, سوندا عانا وقۋشىعا ىقپال ەتە الادى. قازىرگى تاڭدا كرەاتيۆ, سىندارلى كەرى بايلانىس, ەموتسيالىق ينتەللەكت, كوممۋنيكاتيۆتىك قۇزىرەتتىلىك, سىني ويلاۋ الدىمەن مۇعالىم مەن اتا-اناعا كەرەك داعدىلار بولىپ وتىر. ءبىز بۇل داعدىلاردى يگەرگەنشە جاسوسپىرىمدەر كۇتىپ وتىرمايدى, وزگەرىستەر بولا بەرەدى. سوندىقتان بالامەن جۇمىس ىستەيتىن ءاربىر ەرەسەك ءوزىن وزگەرتۋى كەرەك. الەۋمەتتىك جەلىلەردى جوعالتىپ جىبەرۋ مۇمكىن ەمەس. سول سەبەپتى جەلىنىڭ مۇمكىندىگىن وقىتۋ مەن تاربيە قۇرالى رەتىندە قولدانۋ ءۇشىن الدىمەن ءوزىمىزدىڭ وزگەرگەنىمىز قاجەت», دەدى ول. ۇل-قىزىمىزدى ۇيدە تاربيەلەي الماساق, ينتەرنەت تاربيەلەپ بەرەتىنىن اشىق ايتقان مەكتەپ ديرەكتورى «بارىنە بالانى كىنالاي بەرۋگە بولمايدى» دەگەن ويىن دا ورتاعا سالدى.
ال «Tik Tok جەتكىنشەكتەردى نەگە تاربيەلەپ ءجۇر؟» دەگەن سۇراعىمىزعا پسيحواناليتيك جانار وسپانوۆا: «سىرتتاي باقىلاعاندا Tik Tok ءتۇسىرىپ جاتقان جەتكىنشەكتەردىڭ ءىس-قيمىلىنا, بيىنە ءسۇيسىنىپ قاراۋعا بولادى. وسى ارقىلى ولار ىشكى سەزىمدەرىن كورسەتىپ, بالالىق ءبىر ەركەلىك, ەركىندىكتەرىن بايقاتقىسى كەلەدى. مەن كوبىنەسە, مامان رەتىندە وسىنى بايقايمىن», دەپ جاۋاپ بەردى. Tik Tok-تى ءار جاستىڭ ءوزىن ءوزى كورسەتۋگە, مۇمكىندىگىن پاش ەتۋگە, جىلت ەتكەن تالانتىن دامىتۋعا وتە ىڭعايلى الاڭ دەپ باعالاعان مامان دا جەلىدەگى نارسەنىڭ بارلىعىن جامان دەپ جاۋىپ تاستاۋعا بولمايتىنىن اشىق جەتكىزدى.
«الەمدى جايلاعان ىندەتتىڭ كەسىرىنەن جاسوسپىرىمدەردىڭ اراسىندا ءوزارا ارالاسۋ, باسقوسۋ مەن اڭگىمە-دۇكەن قۇرۋ ءبىرشاما ازايىپ كەتتى. كوپتەگەن جاس جەتكىنشەك وسىنداي سۇرانىستىڭ ورنىن الەۋمەتتىك جەلىمەن تولىقتىرۋعا تىرىسادى. الايدا ءبىر جايتتى ەسكەرگەن ءجون. كەز كەلگەن نارسەنى شامادان تىس قولدانسا, ول پايداسىمەن قوسا كەسىرىن دە تيگىزە باستايدى. ءاربىر جاسوسپىرىمدە جىنىستىق ەنەرگيا 12-13 جاس كەزىندە ارتا تۇسەدى. ياعني بۇل – گورموندار تۇزىلەتىن, وزىنە سەنىمدى بولعىسى كەلەتىن كەزەڭ. ءجاسوسپىرىم ايناعا قاراپ, بوي تۇزەپ, بىرەۋگە ۇناعىسى كەلىپ, سىرتتان «سەن ادەمىسىڭ», «ماعان ۇنايسىڭ» دەگەن سوزدەر ەستىگىسى كەلەتىن شاق. اتا-اناسىنان بولەك, «سىرت كوز نە ايتادى ەكەن؟» دەگەندەي الاڭداۋعا تولى سىن ءسات. توماعا-تۇيىق ءجاسوسپىرىم ءوزىنىڭ الەۋەتىن اشقىسى كەلەدى, ال كەز كەلگەن ورتادا الدىڭعى قاتاردا جۇرەتىن جاس ودان ءارى بيىكتەگىسى كەلەدى. بۇل ءبىر جاعىنان بالانىڭ ومىرگە دەگەن قۇشتارلىعىن ارتتىرۋ بولىپ سانالادى. ال ەگەر الەۋمەتتىك جەلىگە سالعان بەينەجازبادان ورەسكەل قىلىقتار, اشىق-شاشىق كيىنۋ بايقالسا, بۇل ەڭ ءبىرىنشى اتا-انا تاراپىنان باقىلاۋدىڭ جوقتىعىن اڭعارتادى. باسقاشا ايتقاندا, بالا مەن اكە-شەشەنىڭ اراسىندا بايلانىس جوق. ءجاسوسپىرىم كەزىندە ءار بالادا «مەن بىلەمىن», «مەن ىستەي الامىن» دەگەن ءبىر زور سەنىم بولادى. وسى كەزەڭدە اتا-انا بالاسىن سىناپ, ۇرسۋدىڭ ورنىنا, قولداۋ ءبىلدىرىپ, تۇسىنىستىك تانىتۋى قاجەت», دەيدى ساراپشى.
ءتۇيىن: تەكتى ۇرپاق تاربيەلەۋ ءۇشىن وزگەنىڭ ويلاپ تاپقان ويىنى ەمەس, اۋەلى ءوز اتا-بابامىزدىڭ اسىل ونەگەسىن سىڭىرگەن ابزال-اۋ. سەبەبى, جەتكىنشەك كورگەنىن قايتالايدى. ەستىگەنىن ساناعا ءسىڭىرىپ وسەدى. ال اتا-انانىڭ دەنى ء«مانسىز-ماعىناسىز بەينەروليكتەر الەمى» دەپ باعالايتىن Tik Tok, اشىق-شاشىق كيىنۋگە كوزدى قىزىقتىرىپ, دورەكى قىلىقتارعا داعدىلاندىرىپ جۇرگەن Instagram-مەن, ءجونسىز-جوسىقسىز اڭگىمەگە تولى الەۋمەتتىك جەلىمەن ۇرپاقتى ۇلاعاتتى قىلىپ تاربيەلەي الامىز با؟ قاپەرسىز, قامسىز جۇرگەنىمىزدە قازاق جاستارىن جەلى جۇتىپ قويىپ جۇرمەسىن دەگەن قاۋىپ بار كوڭىلدە.
