27 ماۋسىمداعى مالىمەت بويىنشا وڭىردە 28 ادام ىندەت جۇقتىرعان. كەلەسى كۇنى 17 جاعداي تىركەلدى. جىل باسىنان بەرى وبلىستا 3 707 تۇرعىننىڭ بويىنان دەرت بەلگىسى بايقالعان. ارينە, ولاردىڭ دەنى ەمدەلىپ شىقتى.
وڭىرلىك كوممۋنيكاتسيالار قىزمەتىندە وبلىس اكىمىنىڭ ورىنباسارى بالجان شامەنوۆا, وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى دينارا جاڭابەرگەنوۆا, وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى جانگەلدى شايىمبەتوۆتىڭ قاتىسۋىمەن بريفينگ ءوتىپ, وڭىردەگى ۆاكتسينالاۋ جۇمىستارىنىڭ بارىسى جايلى ايتىلدى.
– سوڭعى كۇندەرى ىندەت جۇقتىرعاندار سانى كوبەيىپ, وبلىس «سارى ايماققا» ءوتتى. وسىعان بايلانىستى ساقتىق شارالارىن كۇشەيتە تۇسەمىز. بۇل رەتتە تۇرعىنداردىڭ دا ءوز ساۋلىعىنا سالعىرت قاراماي, بەلگىلەنگەن شەكتەۋلەر تالاپتارىن ساقتاعانى ءجون. اۋرۋدى ازايتۋعا مۇمكىندىك بەرەتىن ۇجىمدىق يممۋنيتەت قالىپتاستىرۋ ءۇشىن حالىقتىڭ كەم دەگەندە 60%-ى ۆاكتسينالاۋدان ءوتۋى قاجەت. جاعدايدى بارىنشا تەز تۇراقتاندىرۋدىڭ جالعىز جولى – وسى, – دەدى وبلىس اكىمىنىڭ ورىنباسارى.
وڭىردە 106 ەكپە كابينەتى جاساقتالعان. سونىمەن قاتار ادامدار كوپ جينالاتىن جەرلەردە 37 جىلجىمالى پۋنكت تۇراقتى جۇمىس ىستەپ تۇر.
وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى جانگەلدى شايىمبەتوۆ 1 اقپاننان باستاپ ينفەكتسياعا قارسى ۆاكتسينالاۋ ءۇشىن
331 920 دوزا جەتكىزىلگەنىن اتاپ ءوتتى. قازىر وبلىستاعى 20 مەديتسينالىق مەكەمەدە ەگۋ تاڭەرتەڭگى 8.00-دەن تۇنگى 00.00-گە دەيىن ءۇزىلىسسىز جۇرگىزىلەدى. ايماقتا ۆاك-
تسينانىڭ ءبىرىنشى كومپونەنتىن
143 949 ادام السا, ەكىنشى بولىگىن 77 109 تۇرعىن سالدىرعان.
وبلىس بويىنشا ينفەكتسيالىق ستاتسيوناردا 225 ناۋقاس, رەانيماتسيالىق توسەكتىك ورىندا 24 ادام ەم قابىلداپ جاتىر. دارىگەرلەر بويىنان دەرت بايقالعانداردى بەلگىلەنگەن تارتىپپەن ەمدەۋدە. اۋرۋحانادا ورىن جەتپەي قالادى دەگەن قاۋىپ جوق.
وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى دينارا جاڭابەرگەنوۆانىڭ ايتۋىنشا, جىل باسىنان بەرى مونيتورينگتىك توپتار رەيدتىك تەكسەرىس جۇرگىزىپ, كارانتين تالاپتارىن بۇزۋدىڭ 335 دەرەگىن انىقتاعان. شەكتەۋ تالاپتارىن ساقتامايتىندار قاتارىندا حالىققا قىزمەت كورسەتۋ نىساندارى باسىم. ارنايى توپ وكىلدەرى كوپ ادامنىڭ قاتىسۋىمەن ءۇي جاعدايىندا ۇيىمداستىرىلعان مەرەكەلىك ءىس-شارالار سانى دا ازايماي تۇرعانىن ايتادى.
اۋىرىپ ەم ىزدەگەننەن, اۋىرماۋدىڭ جولىن ىزدەگەن جەڭىل ەكەنىن ءالى دە تۇسىنبەي كەلەمىز-اۋ.
قىزىلوردا
