بۇل رەتتە قىزىلورداداعى ءبىلىم بەرۋ ۇيىمدارىن باسقاراتىن ديرەكتورلار اراسىندا جاقسى ءۇردىس قولعا الىنعانىن ايتا كەتۋىمىز كەرەك. رەسپۋبليكادا العاش بولىپ سىر وڭىرىندە «سەرىكتەس ديرەكتورلار» ليگاسى قۇرىلىپ, مەكتەپتەردىڭ جوبالىق باعىتتارى ايقىندالدى. قۇرىلعانىنا جىل تولعان ليگاداعى مەكتەپتەرگە 20-دان اسا تاقىرىپتىق باعىت بەرىلىپ, سوعان سايكەس ءار ءبىلىم ۇياسى جاڭا جوبالار ەنگىزدى. ۇيىمداستىرۋشىلاردىڭ ايتۋىنشا, بۇل تاجىريبە ءارى قاراي وزگە مەكتەپتەرگە تاراتىلا بەرەدى.
بۇگىندە وبلىس ورتالىعىنداعى №3 ءىت-ليتسەي «باعدارلامالاۋ مەكتەبى» اتانىپ, ءبىلىم ۇياسىندا Diqital school studio ستۋدياسى مەن ءىت-جۋرناليستيكا ۇيىرمەسى جۇمىسىن باستاپ كەتتى. قالاداعى №101 مەكتەپ ەكولوگيالىق جوبالاردى جۇرگىزەتىن «جاسىل مەكتەپ» مارتەبەسىن الدى. ال №261 مەكتەپ ء«وزىن-ءوزى باسقارۋ» جۇيەسىن دامىتاتىن تىرەك ءبىلىم وشاقتارى قاتارىنا ەنىپ وتىر. مۇنان بولەك, №176 مەكتەپ «وقۋعا قۇشتار», №140 مەكتەپ «عىلىمي جوبالارعا باعىتتالعان» ۇجىم رەتىندە جۇمىس جۇرگىزۋدە. ال كەلەسى وقۋ جىلىندا №278 مەكتەپ وقۋشىلار ءۇشىن بيزنەس تاسىلدەرىن ۇيرەتەتىن «كاسىپكەرلىك مەكتەبى» اتانباق.
وبلىستىق ءبىلىم باسقارماسىنىڭ باسشىسى اقزيرا قاسىموۆانىڭ ايتۋىنشا, ليگانى قۇرۋداعى باستى ماقسات – ديرەكتورلار اراسىندا شىنايى باسەكە قالىپتاستىرىپ, باسشىلاردىڭ كوممۋنيكالىق جانە مەنەدجمەنتتىك قاسيەتتەرىن دامىتۋ جانە جاڭا جوبالارمەن جۇمىس جۇرگىزۋىنە مۇمكىندىك بەرۋ بولىپ وتىر.
– قازىرگى زامان تالابى ديرەكتورلاردىڭ كابينەتتىك باسقارۋ جۇيەسىنەن الىستايتىن ۋاقىتى جەتكەنىن كورسەتىپ وتىر. ديرەكتوردىڭ باسقارۋشىلىق قابىلەتى ءوز مەكتەبىندەگى مۇعالىممەن قارىم-قاتىناس ورناتۋىنان كورىنەدى. سونىمەن قاتار ءبىلىم ۇياسىن باسقارعان باسشى جۇمىسىن باعالاۋدا وقۋشىلارمەن, اتا-انالارمەن جۇمىستى جولعا قويۋى سەكىلدى ولشەمشارت ەنىپ وتىر. ولاردىڭ جۇمىسى جاڭا ءبىلىمدى يگەرۋ, پەداگوگتەردى ءتيىمدى باسقارۋ مەن اتا-انالاردىڭ ءتىلىن تابۋ سەكىلدى ماڭىزدى قاسيەتتەر ارقىلى باعالانادى. وسى ارقىلى ءبىز ءبىرىنشى كەزەكتە مازمۇن مەن ساپانى تالاپ ەتەمىز. ءبىلىم بەرۋ ستاندارتىن مەڭگەرتۋ ءۇشىن ديرەكتوردىڭ جان-جاقتى جۇمىستى ۇيلەستىرۋىنە مۇمكىندىك جاسايمىز. ليگانى اشۋداعى ماقساتىمىز دا ءوزارا باسەكە قالىپتاستىرۋ ارقىلى باسقارۋشىلىق باعىتتاعى كوزقاراستى جاڭا زامانعا ساي بەيىمدەۋ, – دەيدى باسقارما باسشىسى.
جىل ىشىندە «سەرىكتەس ديرەكتورلار» ليگاسى مۇشەلەرى TEDx الاڭىندا كەزدەسىپ, جاڭا كەيستەر بويىنشا بىلىمدەرىن جەتىلدىردى. ديرەكتورلار «ستراتەگيالىق برەند مەنەدجمەنت», «مەكتەپتەگى ۆەنچۋردى دامىتۋ», «مۇعالىم اراسىنداعى ماتريتسالار مەن انىقتاۋىشتار», «مەكتەپتەگى HR مەنەدجمەنت» ەنگىزۋدىڭ جاڭا ادىستەرىن ۇيرەندى.
ءبىر جىلعا جۋىق ۋاقىت ىشىندە «سەرىكتەس ديرەكتورلار» ليگاسى ادىستەمەلىك مارافون, «التىن بەلگى» ۇمىتكەرلەرىنە ارنالعان فورۋم, وقۋشىلار اراسىنداعى دەبات, «پەدEXPO-2021, تازا تابيعات اياسىنداعى «مەكتەپتەگى بەنچماركينگ» شارالارىن ۇيىمداستىرىپ, ۇزدىك 30 كىتاپقا 30 بەينەروليك تۇسىرگەن.
ليگاداعى ديرەكتورلار بيىل وڭىردە تۇڭعىش رەت وتكەن سامميتتە باس قوسىپ, وقۋ جىلىن قورىتىندىلادى. «re-Start: جاڭا الەمدەگى جاڭا مەن» اتاۋىندا وتكەن ديرەكتورلار سامميتىندە ءبىلىم بەرۋ ۇيىمىنىڭ باسشىلارى وزەكتى ماسەلەلەردى پىكىر الماسۋ فورماتىندا تالقىلادى. قىزىقتى تاقىرىپ اياسىندا وي ءبولىستى. ماسەلەن, قىزىلوردا قالاسىنداعى №176 مەكتەپ ديرەكتورى قادىركۇل شايماعانبەتوۆا «ديرەكتوردىڭ 10 قاتەلىگى» تاقىرىبىن ارقاۋ ەتىپ الىپ, ارىپتەستەرىنە ساۋال قويدى. ال №3 ءىت-ليتسەي ديرەكتورى ءلاززات ابەنوۆا «ديرەكتوردىڭ وزىندىك دامۋىنداعى جىلدىق جوسپار ءمودۋلى» تاقىرىبىن تارقاتتى. جەكە جانە جىلدىق جوسپاردى قۇرۋدىڭ جولدارى جايلى تاجىريبەسىن ايتتى. سونداي-اق №43 مەكتەپ ديرەكتورى باقىتجان يمانبەرديەۆا «كوشباسشىداعى ەموتسيالىق ينتەللەكت» باعىتىندا وي ءوربىتتى. ارنايى بەينەسيۋجەت ارقىلى ديرەكتورلارعا تىعىرىقتان شىعار جولدى نۇسقاپ, توسىننان سۇراقتار قويدى. ال وڭىردەگى ءبىلىم وشاعىنىڭ ەڭ جاس باسشىسى سانالاتىن جاڭاقورعانداعى №164 مەكتەپ ديرەكتورى جانبولات احمەتجانوۆ «پەداگوگپەن ديالوگ» تاقىرىبىندا قىزۋ پىكىرتالاس ۇيىمداستىردى.
وي الاڭىنداعى تالقىلاۋدا بارلىق ديرەكتور وزىندىك پىكىرىن ايتىپ, كوزقاراستارىن ءبىلدىردى. ىشكى ساراپتاۋ, سىني ويلاۋ سىندى ماسەلەلەر دە قامتىلدى. ليگا جىل ىشىندە 30-عا جۋىق مەكتەپ ديرەكتورىنىڭ باسىن بىرىكتىرىپ وتىر. جاڭا وقۋ جىلىندا ولاردىڭ قاتارى جاڭا مۇشەلەرمەن تولىقپاق.
قىزىلوردا وبلىسى
