قىرىق مىڭعا جۋىق تۇرعىنى بار تەڭىزدى قالانى تەمىر جول جەلىسى قاق جارىپ وتەدى. وسىعان دەيىن بالىق شارۋاشىلىعى مەن تۇز ءوندىرىسى سەكىلدى ءداستۇرلى سالا دامىعان قالادا سوڭعى جىلدارى بيزنەستىڭ باسقا دا باعىتتارى قولعا الىنعان. قىزمەت كورسەتۋ سالاسىندا كاسىپ باستاپ جاتقاندار قاتارى كوپ. بۇعان قالانى قىسقا كۇندە قىرىق اينالىپ شىعاتىن تاكسيستەردى قوسىڭىز. شاعىن قالانى شارلاپ جۇرگەن كولىك بىتكەننىڭ كۇنىنە الدەنەشە رەت تۇيىسەتىن ءبىر تۇسى بار. بۇل پانفيلوۆ كوشەسىنە ورنالاسقان تەمىر جول وتكەلى. ول اشىق بولسا جولىنىڭ بولعانى, ال كەزەكتى پويىز جاقىنداعاننان تۇسىرىلەتىن شلاگباۋمدار اينالاسىندا كۇنىنە بىرنەشە رەت 1-2 شاقىرىمعا سوزىلعان كولىكتەر تىزبەگى پايدا بولادى.
«ارال تەڭىزى» ستانساسى ارقىلى تاۋلىگىنە جۇك جانە جولاۋشى تاسىمالىمەن اينالىساتىن 55 پويىز وتەدى. جاز مەزگىلدەرىندە ولاردىڭ قاتارى ارتاتىنى دا بەلگىلى. الداعى كۇندەرى تەمىر جول بويىندا بۇرمالاردى اۋىستىرۋ كوزدەلىپ وتىر. بۇل جولدىڭ ەكى قاپتالىندا ءيىن تىرەسكەن كولىكتەر كوبەيە بەرەدى دەگەن ءسوز.
– قازىر بۇرىنعىداي ەمەس, قالانىڭ كوپ پروبلەماسى شەشىمىن تاپتى. ەندىگى ماسەلە وسى وتكەل بولىپ تۇر. وسى جەردەن تالاي مارتە «جەدەل جاردەم» مەن ءورت ءسوندىرۋ كولىگىنىڭ كىدىرگەنىن كورگەنبىز. جانى قينالعان ناۋقاس پەن جالىنداپ جاتقان ورتكە جەدەل جەتۋى ءتيىس ودان باسقا جۇزدەگەن كولىكتىڭ امالسىزدان قاڭتارىلىپ قالار كەزى كوپ. كىشكەنتاي بالالار دا سپورتتىق سەكتسيالارعا, ءتۇرلى ۇيىرمەلەرگە قاتىسۋ ءۇشىن وسى كولىكتەرمەن جاعالاسىپ ءوتىپ جاتادى. بۇرىن دا وسى تىرلىك تىم قاۋىپتى كورىنەتىن ەدى, وسىدان 2 جىل بۇرىنعى شامالعانداعى تەمىرجول وتكەلىندەگى اپاتتان كەيىن ۇرەيىمىز ءتىپتى ۇدەي ءتۇستى, – دەيدى اۋداندىق قوعامدىق كەڭەستىڭ توراعاسى الدابەرگەن جولانوۆ.
اقساقالدىڭ الاڭى ورىندى. قالاداعى ت.شەۆچەنكو اتىنداعى №13 ورتا مەكتەپتىڭ باستاۋىش سىنىپتارىنا ارعى بەتتەن 133 وقۋشى قاتىناپ وقيدى ەكەن. وقۋشىلار ۇيىندەگى ءتۇرلى ۇيىرمەلەرگە 64 بالا, سپورتتىق سەكتسيالارعا قاتىساتىن 37 وقۋشى, مەكتەپالدى دايارلىق توبىنا كەلەتىن 19 بالاقاي كۇندەلىكتى وتكەلدە قايشىلاسقان كولىكتەر اراسىنان ءوتىپ كەلىپ ءجۇر.
ماسەلەنى اۋدان اكىمدىگىنىڭ دە كوتەرىپ كەلە جاتقانىنا كوپ جىلدىڭ ءجۇزى بولىپتى. ماماندار ەسەبىنشە وسى وتكەلدەن تاۋلىگىنە كولىكتەر 16-18 مىڭ رەت ءارى-بەرى وتەدى. اسىققان كولىكتەردىڭ اپاتقا ۇشىراپ, ابايلاماعان جاننىڭ پويىز استىنا تۇسكەن كەزى دە جوق ەمەس.
بىلتىر اۋداندىق بيۋدجەتتەن 9,8 ملن تەڭگە ءبولىنىپ, كوپىردىڭ تەحنيكالىق-ەكونوميكالىق نەگىزدەمەسى ازىرلەنىپ, مەملەكەتتىك ساراپتامادان وتكىزىلىپتى.
– وتكەن جىلى وسى باعىتتا قوعامدىق تىڭداۋ ۇيىمداستىرىلىپ, ءتۇرلى سالا ماماندارى مەن تۇرعىندار پىكىر ءبىلدىردى. تەمىر جول وتكەلىن سالۋدىڭ بىرنەشە نۇسقاسى ۇسىنىلدى. ماماندار مەن كوپشىلىك ۇسىنىسىمەن جەڭىستىڭ 30 جىلدىعى كوشەسىنىڭ ماڭى تاڭدالىپ الىندى, – دەيدى اۋداندىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى جانقوجا قۇدايبەرگەن.
وبلىستىق جولاۋشىلار كولىگى جانە اۆتوموبيل جولدارى باسقارماسى باسشىلىعى ارالدىقتاردى الاڭداتقان جاعداي ايماق باسشىلىعىنىڭ نازارىندا تۇرعانىن ايتىپ وتىر. وسىدان ءسال بۇرىن وتكەن وبلىستىق ءماسليحاتتىڭ سەسسياسىندا قۇرىلىستىڭ جوبا-سمەتالىق قۇجاتىن ازىرلەۋگە قارجى ءبولۋ جونىندە شەشىم قابىلدانىپتى. قۇجات ازىرلەنسە يگەرىلمەي قالعان قارجىلار ەسەبىنەن جىل سوڭىنا دەيىن قۇرىلىستى باستاپ كەتۋگە دە مۇمكىندىك بار.
وبلىس تاراپىنان اتقارىلۋعا ءتيىستى شارالار رەتىمەن شەشىمىن تاپتى. ەندى رەسپۋبليكالىق بيۋدجەت قارجىسىنان سالىناتىن جوبانىڭ بولاشاعى ەلورداداعى ءتيىستى قۇرىلىمدار قولىندا تۇر. سوندىقتان دا ارالدىق اعايىن باستامانىڭ تاعدىرى شەشىلەر باس قالا جاققا الاڭداي قاراپ وتىر.
قىزىلوردا وبلىسى
