سەنات توراعاسى ءوز سوزىندە مەملەكەت باسشىسىنىڭ رەفورمالارىن جاڭعىرتۋ جونىندەگى كۇن ءتارتىبىن زاڭنامالىق تۇرعىدا قامتاماسىز ەتۋ تۋرالى جان-جاقتى ايتىپ بەردى. ول اسا ماڭىزدى زاڭ جوبالارىن قاراۋعا ءماسليحاتتار دەپۋتاتتارىن بەلسەندى تۇردە تارتۋعا شاقىردى. سەناتورلاردىڭ ۇشتەن ەكىسى ايماقتاردان سايلانعانىن ەسكەرە كەلگەندە مۇنداي تىعىز قارىم-قاتىناستىڭ ماڭىزى وتە زور.
«وتكەن سايلاۋدا ەلباسى مەن مەملەكەت باسشىسىنىڭ باستاماسىمەن جۇرگىزىلىپ جاتقان ساياسي رەفورمالاردىڭ الەۋەتى ىسكە اسىرىلدى دەۋگە ابدەن بولادى. العاش رەت ءماسليحات دەپۋتاتتارى پارتيالىق ءتىزىم بويىنشا سايلاندى. ايەلدەر مەن جاستارعا ارنالعان كۆوتا دا العاش رەت قولدانىلدى. سايلاۋ ناتيجەسىندە جەرگىلىكتى وكىلدى ورگاندار 70 پايىزعا جاڭارىپ, ءماسليحاتتاردىڭ ساپالى قۇرامى قالىپتاستى», دەدى ماۋلەن اشىمباەۆ.
سەنات توراعاسىنىڭ پىكىرىنشە, پرەزيدەنت باستامالارىنىڭ تابىستى ىسكە اسۋى زاڭنامالىق بازانىڭ وزگەرۋىنە عانا ەمەس, حالىقپەن ءتۇسىندىرۋ جۇمىستارىنىڭ قانشالىقتى ساپالى جۇرگىزىلىپ جاتقانىنا دا بايلانىستى. سوندىقتان ماۋلەن اشىمباەۆتىڭ پىكىرىنشە, ءماسليحاتتار مەن سەنات وسى باعىتتا ءوزارا بەلسەندى ءىس-قيمىل جاساۋى ءتيىس.
«سەنات دەپۋتاتتارى ۇنەمى اۋداندىق, قالالىق, وبلىستىق ماسليحاتتارمەن ءوزارا تىعىز بايلانىستا بولۋى كەرەك. سونىڭ بارىسىندا جەرگىلىكتى دەڭگەيدەگى وزەكتى ماسەلەلەر جانە قولدانىستاعى زاڭنامانىڭ تيىمدىلىگى تالقىلانادى. ناتيجەسىندە ءبىز حالىقتى تولعاندىرعان ماسەلەلەردى انىقتاپ, ولاردى شەشۋدىڭ ءتيىمدى جولدارىن قالىپتاستىراتىن بولامىز. جۇمىسىمىزداعى ماڭىزدى باعىتتاردىڭ تاعى ءبىرى حالىققا مەملەكەت باسشىسىنىڭ ساياساتىن جانە قابىلدانعان زاڭداردىڭ ءمانى مەن ماڭىزىن ءتۇسىندىرۋ», دەدى ماۋلەن اشىمباەۆ.
وتىرىستا ۇلتتىق ەكونوميكا ءمينيسترى اسەت ەرعاليەۆ تە ءسوز سويلەدى. ول «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اۋداندىق, قالالىق جانە اۋىلدىق بيلىك دەڭگەيلەرىنىڭ دەربەستىگى مەن جاۋاپكەرشىلىگىن كەڭەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا بەلگىلەنگەن جەرگىلىكتى مەملەكەتتىك جانە ءوزىن-ءوزى باسقارۋدى دامىتۋدىڭ نەگىزگى تاسىلدەرىنە توقتالدى. ال ءماسليحات وكىلدەرى جەرگىلىكتى وكىلدى ورگاندار قىزمەتىنىڭ نەگىزگى اقپاراتتىق-ۇيىمداستىرۋشىلىق ماسەلەلەرى تۋرالى ايتىپ بەردى.
