دەنساۋلىق ساقتاۋ ءمينيسترى الەكسەي تسوي, نۇر-سۇلتان قالاسىنىڭ اكىمى التاي كولگىنوۆ, الماتى وبلىسىنىڭ اكىمى اماندىق باتالوۆ, باتىس قازاقستان وبلىسىنىڭ اكىمى عالي ەسقاليەۆ, پاۆلودار وبلىسىنىڭ اكىمى ابىلقايىر سقاقوۆ بايانداما جاسادى. قازىرگى تاڭدا قازاقستاندا, اسىرەسە, «قىزىل ايماققا» كىرگەن الماتى, نۇر-سۇلتان قالالارىندا جانە باتىس قازاقستان وبلىسىندا كوروناۆيرۋسپەن سىرقاتتانۋشىلىقتىڭ ءوسۋى بايقالادى. الماتى, قاراعاندى, اقمولا جانە اتىراۋ وبلىستارىندا اۋىرعاندار سانى وسۋدە. رەسپۋبليكا بويىنشا ۆيرۋستىڭ رەپرودۋكتيۆتىك كورسەتكىشى 1,1-ءدى قۇرايدى. جۇقپالى اۋرۋلار اۋرۋحانالارىنىڭ تولۋى 24%, رەانيماتسيالىق توسەك ورىندارىنىڭ تولۋى 16% قۇرايدى. وتكەن تاۋلىكتە كۆي+ 954 جاعدايى جانە كۆي- 7 جاعدايى تىركەلدى.
ەلىمىزدە رەسەيلىك ۆاكتسينانى شىعارۋ جولعا قويىلدى جانە وتاندىق ۆاكتسينا دا تىركەلەتىن بولادى. حالىقتى ۆاكتسينالاۋ اقپان ايىندا باستالدى. قازىرگى ۋاقىتتا 95 مىڭنان استام ادامعا ۆاكتسينا سالىندى. ءبىرىنشى بولىپ مەديتسينا قىزمەتكەرلەرى, سودان كەيىن پەداگوگتار, كۇش قۇرىلىمدارىنىڭ قىزمەتكەرلەرىنە ۆاكتسينا سالىندى. ۆاكتسينا العانداردىڭ بارلىعىنىڭ جاعدايى جاقسى, پرەپاراتتىڭ قالىپتى توزىمدىلىگىن جانە جاعىمسىز رەاكتسيانىڭ جوقتىعىن كورسەتتى. ءساۋىر ايىندا ۆاكتسينا الاتىنداردىڭ سانى, ونىڭ ىشىندە اعا بۋىن وكىلدەرى اراسىندا ايتارلىقتاي ارتادى. ۇكىمەت باسشىسى ۆاكتسينا الۋدىڭ قولجەتىمدىلىگىن قامتاماسىز ەتۋ جانە جاپپاي ەگۋ پاندەميامەن كۇرەستە باستى مىندەت ەكەنىن اتاپ ءوتتى.
«ۆاكتسينالاۋ حالىقتىڭ ۇجىمدىق يممۋنيتەتىن قالىپتاستىرۋعا جانە ينفەكتسيانىڭ ودان ءارى تارالۋىن شەكتەۋگە مۇمكىندىك بەرەدى. ءدال وسى فاكتور – پاندەميامەن كۇرەستە, سونداي-اق ەكونوميكالىق ءوسىمدى قالپىنا كەلتىرۋدە اسا ماڭىزدى», دەدى ا. مامين.
ۆاكتسينا سالىناتىندار سانىن ۇلعايتۋ ماقساتىندا پرەمەر-مينيستر ۆاكتسينانى ساقتاۋ جانە تاسىمالداۋ ءۇشىن قاجەتتى جاعدايلارى بار ەگۋ كابينەتتەرىن قوسىمشا اشۋدى, ازاماتتارعا اقپاراتتىق-ءتۇسىندىرۋ جۇمىستارىن كۇشەيتۋدى تاپسىردى.
«اكىمدىكتەردىڭ سايتتارىندا ۆاكتسينالاۋ, ونىڭ پايداسى, ەگۋ پۋنكتتەرىنىڭ مەكەنجايلارى تۋرالى تولىق اقپارات جوق. حالىق اراسىندا ۆاكتسينالاۋدىڭ ماڭىزدىلىعى تۋرالى دۇرىس پىكىر قالىپتاستىرۋ ءۇشىن جۇرتشىلىق پەن مەديتسينا قىزمەتكەرلەرى اراسىندا سەمينارلار ۇيىمداستىرۋ قاجەت», دەدى ا. مامين.
دەنساۋلىق ساقتاۋ مينيسترلىگىنە وسى جىلدىڭ ناۋرىز ايىنىڭ سوڭىنا دەيىن ەگۋ پۋنكتتەرىنىڭ دايىندىعىن باقىلاۋ جانە ۆاكتسينانىڭ قاجەتتى مولشەرىن ۋاقىتىلى جەتكىزۋگە قاتىستى بارلىق ماسەلەنى شەشۋ تاپسىرىلدى. وڭىرلەردىڭ اكىمدىكتەرىنە حالىقتىڭ, اسىرەسە ۇجىمداردا جانە ءبىلىم بەرۋ ۇيىمدارىندا شەكتەۋ شارالارىن ساقتاۋىن قامتاماسىز ەتۋ, ادامدار كوپ جينالاتىن ويىن-ساۋىق ءىس-شارالارىن وتكىزۋگە جول بەرمەۋ, ىشكى ىستەر, دەنساۋلىق ساقتاۋ مينيسترلىكتەرىمەن بىرلەسىپ, مونيتورينگتىك توپتاردىڭ جۇمىسىن كۇشەيتۋ جانە ءتارتىپ بۇزۋشىلاردى قاتاڭ جاۋاپكەرشىلىككە تارتۋ تاپسىرىلدى. دەنساۋلىق ساقتاۋ مينيسترلىگىنە اكىمدىكتەرمەن بىرلەسىپ, اۋرۋ وشاقتارىندا جەدەل شارا قولدانىپ, شەكتەۋ شارالارىن قايتا قاراۋ تاپسىرىلدى.
«ناۋقاستارمەن بايلانىستا بولعان بارلىق ادامدارعا كوروناۆيرۋسقا تەستىلەۋ مىندەتتى تۇردە جۇرگىزىلىپ, ولار باقىلاۋدا بولۋى كەرەك. بۇل رەتتە كۇندەلىكتى جۇرگىزىلەتىن پتر-تەستىلەۋ دەڭگەيى تومەندەمەۋى ءتيىس», دەدى ا. مامين.
