بىرىنشىدەن, جەر – اتا-بابالارىمىزدان قالعان امانات. ەكىنشىدەن, قازاقتار ەشقاشان جەرگە جەكەمەنشىك قۇقىعىمەن يە بولعان ەمەس. كەيبىرەۋلەر امەريكا, كانادا مەن ەۋروپانى مىسالعا كەلتىرىپ, جەردى جەكەمەنشىككە وتكىزۋگە ىنتالاندىرادى. بۇل جەردە تىم بولماعاندا حالىقتىڭ مەنتاليتەتىن ەسكەرۋىمىز كەرەك. ول مەملەكەتتەردە نەنى بولسىن وزىنە مەنشىكتەپ الۋ مەنتاليتەتى بار, ال قازاق حالقى ءۇشىن جەر – ورتاق قۇندىلىق. ءبىز جەردى قاۋىم, رۋ بولىپ پايدالاندىق.
سوندىقتان پرەزيدەنتىمىز قاسىم-جومارت توقاەۆتىڭ جەردى شەتەلدىكتەرگە ساتپاۋ جانە جالعا بەرمەۋ تۋرالى زاڭ جوباسىن ماجىلىسكە جولداۋىن وڭ قادام دەپ ەسەپتەيمىن.
قازىرگى ۋاقىتتا قازاقستاندىقتىڭ جەردى 49 جىلعا جالعا الۋ قۇقىعى بار. 20 جاسىڭدا جەردى جالعا الىپ, اۋىل شارۋاشىلىعىمەن اينالىسساڭ, 69 جاسقا دەيىنگى ۋاقىت جەتكىلىكتى بولار. ەگەر ول جەردە شارۋاشىلىعىن ءوربىتىپ, ورىندى پايدالانىپ جاتسا, جەردى جالعا الۋ ۋاقىتىن زاڭدى تۇردە ۇزارتۋدى قاراستىرۋ كەرەك. وسىدان ارتىق نە كەرەك؟ سونداي-اق جالعا العان جەردىڭ ءتيىمدى پايدالانىلعانىن مەملەكەت قاتاڭ باقىلاۋدا ۇستاۋعا ءتيىس.
جەر كودەكسى قابىلدانعالى 18 جىلداي ۋاقىت ءوتتى. وسى ۋاقىت ىشىندە قازاقستانداعى 200 ملن-نان استام اۋىلشارۋاشىلىق ماڭىزى بار جەرلەردىڭ تەك 1,8 ملن گەكتارى جەكەشەلەندىرىلگەن. دەمەك 1 پايىزعا دا جەتپەيدى. ونىڭ ءوزى وڭتۇستىك ايماقتارداعى قۇنارلى سۋارمالى جەرلەر.
سونداي-اق ءىرى الماتى, نۇر-سۇلتان, شىمكەنت, اقتوبە, قاراعاندى سىندى قالالاردىڭ ماڭىنداعى اۋىل شارۋاشىلىعىنا ءتيىمدى, ماڭىزى بار جەرلەردى جەكەشەلەندىرىپ, كەيىن جەكە تۇرعىن ءۇي قۇرىلىسىنا ءبولىپ, ساتىپ جىبەردى.
تولەۋتاي راحىمبەكوۆ,
ۇلتتىق اگرارلىق عىلىمي-ءبىلىم بەرۋ ورتالىعىنىڭ باسقارما توراعاسى, ۇلتتىق قوعامدىق سەنىم كەڭەسىنىڭ مۇشەسى
