– ءىس-شارا بارىسىندا پاۆلودار پوليتسەيلەرى زاڭسىز اينالىمنان 9 بىرلىك قارۋ مەن 30 پاتروندى تاركىلەدى, – دەدى پاۆلودار وبلىسى پوليتسيا دەپارتامەنتى اكىمشىلىك پوليتسيا باسقارماسى باستىعىنىڭ ورىنباسارى ارىستان دۇيسەمباەۆ.
پوليتسيا قىزمەتكەرلەرى جەدەل-الدىن الۋ ءىس-شاراسىن وتكىزۋ كەزىندە 2674 قارۋ يەسىن تۇرعىلىقتى جەرى بويىنشا تەكسەردى. قارۋدى ساقتاۋ ەرەجەلەرىن بۇزۋدىڭ 130 دەرەگى انىقتالدى, بۇل اكىمشىلىك ءىس اياسىندا ايىپپۇل سالۋعا سەبەپ بولدى.
– ماسەلەن, ماي اۋدانىنىڭ پوليتسيا قىزمەتكەرلەرى اۋىلداردىڭ بىرىندە 47 جاستاعى اۋىل تۇرعىنىنان ەلەكتروشوكەر, ال اقسۋ قالاسىندا 62 جاستاعى ەر ادامنىڭ گاراجىنان ەكى بىرلىك قارۋ تاركىلەدى. تەرەڭكول اۋدانىنىڭ تۇرعىنىنان ءتيىستى قۇجاتتارسىز “يج” ماركالى ءبىر ۇڭعىلى مىلتىق الىندى. بارلىق قارۋلارعا بالليستيكالىق جانە ەلەكتروتەحنيكالىق زەرتتەۋلەر تاعايىندالدى, – دەپ حابارلادى ارىستان دۇيسەمباەۆ.
سونداي-اق تىركەلگەن قارۋ يەلەرىن تەكسەرۋ ناتيجەسىندە ازاماتتىق قارۋ مەن وق-دارىلەردى ساقتاۋ ەرەجەلەرىن بۇزۋ دەرەكتەرى انىقتالدى. باياناۋىل اۋدانىندا ازاماتتىق قارۋ يەسى باسقا قارۋدىڭ پاتروندارىن زاڭسىز ساقتاعان. وعان قاتىستى قر اقبتك-ءنىڭ 482-بابى (جەكە جانە زاڭدى تۇلعالاردىڭ قارۋدى زاڭسىز يەلەنىپ الۋى, بەرۋى, وتكىزۋى, ساقتاۋى, الىپ ءجۇرۋi, تاسىمالداۋى) بويىنشا اكىمشىلىك حاتتاما تولتىرىلدى.
