تاراپتار وسىعان دەيىن قول جەتكىزىلگەن ۋاعدالاستىقتاردى ىسكە اسىرۋ بارىسىن جانە ساۋدا-ەكونوميكالىق, قارجى-ينۆەستيتسيالىق, كولىك-لوگيستيكا, اگروونەركاسىپ, تۋريزم, عارىش, تاۋ-كەن مەتاللۋرگياسى, ەنەرگەتيكا جانە باسقا دا سالالارداعى ەكىجاقتى ىنتىماقتاستىق پەرسپەكتيۆالارىن تالقىلادى.
سونداي-اق ۇكىمەت باسشىسى ءباا بيزنەس كاپيتاندارىمەن — «Mubadala» مەملەكەتتىك حولدينگىنىڭ, «Aldar Properties», «ADQ», «Al Dahra Holding», «International Holdings Company» («Royal Group») كومپانيالارىنىڭ باسشىلىعىمەن كەزدەستى.
كەلىسسوزدەر قورىتىندىسى بويىنشا قر مەن ءباا اراسىندا قۇس فابريكالارى مەن ءسۇت-تاۋار فەرمالارىن سالۋ, جەمىستەر مەن ساڭىراۋقۇلاقتاردى ءوندىرۋ جانە وڭدەۋ, تمك جانە گەولوگيالىق بارلاۋ سالالارىنداعى ىنتىماقتاستىق, ەكىباستۇز قالاسىنىڭ ونەركاسىپتىك ايماعىندا يندۋستريالىق پارك قۇرۋ, شىعىس قازاقستان وبلىسىندا «قاتونقاراعاي» تۋريستىك كەشەنىن قۇرۋ, سونداي-اق قازاقستاندا ەلەكتروموبيلدەر كومپونەنتتەرى ءوندىرىسىن اشۋ بويىنشا بىرلەسكەن جوبالاردى ىسكە اسىرۋ جونىندە 17 ۇكىمەتارالىق جانە كوممەرتسيالىق كەلىسىمگە قول قويىلدى.
ءباا قاراعاندى وبلىسىندا سۋمەن جابدىقتاۋ جانە سۋ بۇرۋ بويىنشا جوبالاردى ىسكە اسىرۋعا قاتىسادى, بۇل جوبالار وزىق تەحنولوگيالاردى بەرۋدى جانە كەيىننەن قازاقستاندا ءوندىرىستى جەرگىلىكتەندىرۋدى كوزدەيدى.
اوك جوبالارىن قارجىلاندىرۋ ءۇشىن قازاقستان مەن ءباا جالپى كاپيتالى $100 ملن بولاتىن بىرلەسكەن قور قۇرۋعا نيەتتى.
احقو الاڭىندا «E-Banking» سالاسىنداعى ىنتىماقتاستىق داميتىن بولادى.
كورسەتىلگەن جوبالار بويىنشا قر ەكونوميكاسىنا ينۆەستيتسيالاردىڭ جالپى سوماسى شامامەن $2,2 ملرد قۇرايدى. ينۆەستيتسيالىق جوبالار قوسىلعان قۇنى مەن رەنتابەلدىلىگى جوعارى, سونداي-اق ىشكى جانە پەرسپەكتيۆالى سىرتقى نارىقتاردا سۇرانىستىڭ ۇلكەن الەۋەتى بار جاڭا وندىرىستەردى قۇرۋدى كوزدەيدى. ولاردى ىسكە اسىرۋ قازاقستاندا جاڭا ساپالى جۇمىس ورىندارىن قۇرۋعا, وزىق تەحنولوگيالار مەن ءىس-تاجىريبەنى ەنگىزۋگە مۇمكىندىك بەرەدى.
ەكى ەل اراسىنداعى اۋە قاتىناسىن كەڭەيتۋ اياسىندا امىرلىكتىڭ «Wizz Air Abu Dhabi» لوۋكوستەرى بيىلعى مامىر ايىندا «ابۋ-دابي – الماتى» جانە «ابۋ-دابي – نۇر-سۇلتان» باعىتتارى بويىنشا تۇراقتى جولاۋشىلار اۋە تاسىمالىن باستايدى.
ا. مامين ءباا باتىرلارىنىڭ «ۋاحات ءال-كاراما» مەموريالىنا گۇل شوقتارىن قويىپ, «Masdar City» ەكو-قالاسىنىڭ اۋماعىندا جۇزەگە اسىرىلىپ جاتقان جوبالارمەن تانىستى جانە مۇحاممەد بەن زايد اتىنداعى جاساندى زەردە ۋنيۆەرسيتەتىنە باردى.
دۋباي قالاسىندا ۇكىمەت باسشىسى دۋباي حالىقارالىق قارجى ورتالىعىنىڭ (DIFC) جانە «دۋباي ينۆەستيتسيالىق كورپوراتسياسىنىڭ» باسشىلىعىمەن كەلىسسوز جۇرگىزدى, ونىڭ بارىسىندا قر مەن ءباا قارجى-ينۆەستيتسيالىق ىنتىماقتاستىعىن, ونىڭ ىشىندە احقو الاڭىندا ودان ءارى دامىتۋ پەرسپەكتيۆالارى تالقىلاندى.
جۇمىس ساپارىنا ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى – احقو باسقارۋشىسى قايرات كەلىمبەتوۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, اۋىل شارۋاشىلىعى ءمينيسترى ساپارحان وماروۆ, ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, ادىلەت ءمينيسترى مارات بەكەتاەۆ, شىعىس قازاقستان وبلىسىنىڭ اكىمى دانيال احمەتوۆ, قاراعاندى وبلىسىنىڭ اكىمى جەڭىس قاسىمبەك, «بايتەرەك» ۇبح» اق باسقارما توراعاسى ايدار ءارىپحانوۆ, قر ىسكەر توپتارىنىڭ وكىلدەرى جانە ت. ب. قاتىستى.
