سەنات وتىرىسىندا دەپۋتات بىرعانىم ءايتىموۆا پرەمەر-مينيستر سەرىك احمەتوۆتىڭ اتىنا دەپۋتاتتىق ساۋال جولداعان ەدى. وندا بىلاي دەلىنەدى:
«ءبىزدىڭ دەپۋتاتتىق ساۋالىمىز كوميتەتتىڭ وتكەن ايداعى ماڭعىستاۋ وبلىسىنا ساپارىنىڭ قورىتىندىسى بويىنشا تۋىنداپ وتىر. ساپار بارىسىندا اسكەري قىزمەتشىلەرمەن, شەكاراشىلارمەن كەزدەسۋلەر وتكىزىپ, ولاردىڭ تۇرمىس تىرشىلىگىمەن, الەۋمەتتىك جاعدايىمەن تانىستىق.
سەنات وتىرىسىندا دەپۋتات بىرعانىم ءايتىموۆا پرەمەر-مينيستر سەرىك احمەتوۆتىڭ اتىنا دەپۋتاتتىق ساۋال جولداعان ەدى. وندا بىلاي دەلىنەدى:
«ءبىزدىڭ دەپۋتاتتىق ساۋالىمىز كوميتەتتىڭ وتكەن ايداعى ماڭعىستاۋ وبلىسىنا ساپارىنىڭ قورىتىندىسى بويىنشا تۋىنداپ وتىر. ساپار بارىسىندا اسكەري قىزمەتشىلەرمەن, شەكاراشىلارمەن كەزدەسۋلەر وتكىزىپ, ولاردىڭ تۇرمىس تىرشىلىگىمەن, الەۋمەتتىك جاعدايىمەن تانىستىق.
ەلىمىزدىڭ باتىس وڭىرىندەگى كليماتتىق جاعداي بارشاعا بەلگىلى. جازداعى كۇننىڭ اپتاپ ىستىعى, اۋانىڭ جوعارى تەمپەراتۋراسى, قۇرعاقتىعى, قۇم ارالاسقان ىستىق جەل, ال قىستاعى قىتىمىر اياز, ءجيى سوعاتىن سۋىق جەل سول وڭىردە اسكەري قىزمەت اتقاراتىن ءاسكەري قىزمەتشىلەردىڭ, شەكاراشىلاردىڭ دەنساۋلىعىنا زياندى اسەرىن تيگىزەتىنى ءسوزسىز. وسىعان بايلانىستى ماڭعىستاۋ وبلىسى اۋىر ەكولوگيالىق جانە كليماتتىق جاعدايداعى ولكەگە جاتادى.
ەلىمىزدىڭ ءارتۇرلى ءوڭىرىندەگى كۇنكورىس جاعدايىن سالىستىرعان كەزدە اقتاۋ قالاسى قازاقستاننىڭ ەڭ قىمبات قالالارىنىڭ ءبىرى بولىپ وتىر. وسىعان قاراماستان, اسكەري قىزمەتشىلەرگە قوسىمشا تولەماقى قاراستىرىلماعان.
مىسالى, اسكەري تەڭىزشىلەردىڭ اسكەري-كاسىبي قىزمەتى كوپ جاعدايلاردا كەمەلەردە ۇزاق مەرزىمگە قالۋ قاجەتتىلىگىمەن, سۋ ۇستىندە ورنالاسقان, ياعني تۇراقسىز نەگىزدەگى جابدىققا قىزمەت كورسەتۋمەن, كەمەلەردە جۇمىس ۇدەرىسىنىڭ بىرقالىپتى جاعدايدان جوعارى قىسىمدى, كەرنەۋلى جاعدايعا بىردەن اۋىسۋىمەن بايلانىستى. اسكەري-كاسىبي قىزمەت جاعدايىنىڭ اتالعان ەرەكشەلىگى ءجۇزۋشى قۇرامنىڭ ورگانيزمىنە تۇراقتى زياندى اسەر ەتەدى.
قازىرگى ۋاقىتتا قورعانىس مينيسترلىگىنىڭ وسىنداي كاسىبي اۋىرتپالىق, قىسىم تۇسەتىن اۋەدە ۇشۋ قۇرامىنا 50% ۇستەمەاقى تولەنەدى.
وسىنداي جاعدايدا, كەمەلەردە قىزمەت اتقاراتىن اسكەري قىزمەتشىلەردىڭ سانىنىڭ ازدىعىن ەسكەرە وتىرىپ, ولاردىڭ كەمەلەردە قىزمەت ەتۋ ىنتاسىن كوتەرۋ ءۇشىن ءجۇزۋشى قۇرامعا كەمەلەردە قىزمەت ەتۋدىڭ ەرەكشە جاعدايىنا بايلانىستى, اقشا ۇلەسىنە 50% جانە تەڭىزدە ءجۇرۋ ولشەم ۋاقىتىنا سايكەس 30% ۇستەمەاقى ەنگىزۋ ماسەلەسىن قاراستىرۋىڭىزدى وتىنەمىز.
سونىمەن قاتار, تەڭىز ءسۇڭگۋىرلەرىنىڭ جۇمىسى ەڭ كۇردەلى جۇمىستاردىڭ ءبىرى بولىپ تابىلادى. ول اۆارياعا تۇسكەن كەمەلەرگە كومەك كورسەتۋمەن, ادامداردى قۇتقارۋمەن, سۋعا باتقان كەمەلەردى كوتەرىپ شىعارۋمەن, بارلاۋمەن جانە دەسانتقا قارسى بوگەتتەردى تالقانداۋمەن, قارسىلاستىڭ مينالارىن ىزدەۋمەن جانە جويۋمەن, باسقا دا سۋ استى قاۋىپتى جۇمىستارىن اتقارۋمەن بايلانىستى بولىپ كەلەدى. سۇڭگۋىرلەر سۋ استىنا ءتۇسۋ ۋاقىتىندا ءارتۇرلى اسەرلەرگە ۇشىراعىش, مىسالى, قان قىسىمى بىردەن ءتۇسىپ كەتۋى, جاراقات الۋى جانە باسقا دا توسىن جاعدايلارعا تاپ بولۋى مۇمكىن.
جوعارىدا كورسەتىلگەندەردىڭ نەگىزىندە سۇڭگۋىرلەردىڭ جۇمىستى اتقارۋ جاعدايىنا جانە سۋ استىنداعى ولشەم ۋاقىتىنا سايكەس 100%-عا دەيىن ۇستەمەاقى ەنگىزۋ جاعدايىن قاراستىرۋىڭىزدى سۇرايمىز».
