الماتى قالاسىنداعى بالۋان شولاق سپورت سارايىندا سوچي قالاسىندا وتەتىن قىسقى وليمپيالىق ويىنداردا قازاقستان قۇراماسىنىڭ سپورتتىق كيىمدەرى تانىستىرىلدى.
الماتى قالاسىنداعى بالۋان شولاق سپورت سارايىندا سوچي قالاسىندا وتەتىن قىسقى وليمپيالىق ويىنداردا قازاقستان قۇراماسىنىڭ سپورتتىق كيىمدەرى تانىستىرىلدى.
سپورتتىق ۇلگىدەگى كيىمدەر تىگۋمەن اينالىساتىن قازسپو-N كومپانياسى ۇسىنعان سپورتتىق كوستيۋمدەر جيىنتىعىنا 26 ۇلگىدەگى كيىمدەر كىرەدى. ولاردىڭ ىشىندە وليمپيادانىڭ اشىلۋ سالتاناتىندا كيەتىن شەرۋلىك فورمادان وزگە, باسكيىم, جاتتىعۋ فورماسى, بوكەباي, سۋىق وتكىزبەيتىن ىشكيىم, جىلى كەۋدەشە جانە باسقالارى بار.
كيىمنىڭ ءتۇسى قازاقستان تۋىنىڭ تۇسىنە سايكەس, ال ويۋ-ورنەگى ۇلتتىق بەزەندىرۋ كەيپىندە بەرىلگەن. وندا ەلىمىزدىڭ ەجەلگى جازبا ۇلگىلەرى مەن تاس ءمۇسىن سەكىلدى مادەني ەسكەرتكىشتەرى دە كورىنىس تاپقان. سونىمەن قاتار, تاۋ-تاسقا قاشاپ سالىنعان بۇقا, بارىس, سالت اتتى ادام جانە باس ورنىنا كۇن بەينەلەنگەن سۋرەتتەردى دە ءبىزدىڭ سپورتشىلاردىڭ كيىمىنەن كورۋگە بولادى.
كومپانيا ديرەكتورى ەلەنا سۆەچنيكوۆانىڭ ايتۋىنشا, وتاندىق سپورتشىلاردىڭ كيىم ۇلگىسىن جاساردا تىگىنشى-سۋرەتشىلەر ەلىمىزدىڭ بىلگىر تاريحشىلارىنان كەڭەس العان ەكەن.
بۇل كيىمنىڭ ۇلگىسى جاقىن كۇندەردە ەلىمىزدىڭ سپورت دۇكەندەرىنە ءتۇسىپ, ءتىپتى, جاس بالالارعا ارنالعان ۇلگىلەرىن دە ەل ساتىپ الۋىنا جاعداي جاسالماق.
قانات ەسكەندىر,
«ەگەمەن قازاقستان».
الماتى.
