قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى 2020 فارابي جانە اباي جىلى اياسىندا وتكىزىلگەن ءىس-شارالار تۋرالى اقپاراتپەن ءبولىستى. بۇدان سوڭ, ول جامبىلدىڭ مۇراسىنىڭ ماڭىزدىلىعىنا توقتالدى.
سونداي-اق 2021 جىلدىڭ بۇكىل تۇركى الەمى ءۇشىن ماڭىزدى مەرەيتويلاردى اتاپ وتەتىن جىل بولاتىنىن ەسكە سالعان ەلشى قازاقستان تاۋەلسىزدىگىنىڭ 30 جىلدىق مەرەيتويىنىڭ اتالىپ وتىلەتىنىن ايتتى. ونىڭ ايتۋىنشا, قازاقستان تاريحىنداعى بىرقاتار ماڭىزدى وقيعانىڭ جىلدىقتارى مەن بەلگىلى تۇلعالاردىڭ مەرەيتويلارى اتالىپ وتىلەدى.
ءىس-شارادا ءسوز سويلەگەن حالىقارالىق تۇركى اكادەمياسىنىڭ پرەزيدەنتى دارحان قىدىرالى الەمدىك پاندەمياعا قاراماستان, ابايدىڭ مەرەيتويىنىڭ تۇركيادا وتە اۋقىمدى تويلانۋىنىڭ تۇرىك حالقىنىڭ قازاقستانعا دەگەن ىقىلاسىنىڭ كورسەتكىشى بولىپ تابىلاتىنىن ايتتى. «احمەت ياسساۋي, سۇلتان الپارسلان, حاجى بەكتاش ۆەلي, احي ەۆران, فارابي, اباي جانە جامبىل – ءبىزدىڭ ورتاق قۇندىلىقتارىمىز» دەپ ايتقان ول وسى تۇلعالار ارقىلى تۇركى الەمىنىڭ بىرلىگى نىعايىپ كەلە جاتقانىنا نازار اۋداردى.
ەۋرازيا جازۋشىلار وداعىنىڭ توراعاسى ياكۋپ ومەروعلۋ اباي, فارابي جانە جامبىلعا ارنالعان وسى ءىس-شارا بولعان كۇنى انكارادا دانىشپان تونىكوكتىڭ ەسكەرتكىشىنىڭ اشىلۋىن جاقسىلىقتىڭ ءبىر نىشانى دەپ جورىدى. ومەروعلۋ «دالا ادەبيەتىنىڭ ۇلى اقىنى جامبىل» كىتابىنىڭ اۆتورى مىرزاتاي جولداسبەكوۆتىڭ ءوز ەڭبەگىندە ورحون ەسكەرتكىشتەرى مەن جامبىلدىڭ اقىندىق ءداستۇرى اراسىنداعى ساباقتاستىقتى پاش ەتكەنىن مالىمدەدى.
ءىس-شارادا ءسوز سويلەگەن تۇركسوي باس حاتشىسى دۇيسەن قاسەينوۆ تەك قازاقتار ءۇشىن عانا ەمەس, بۇكىل تۇركى الەمى ءۇشىن ماڭىزدى قايراتكەرلەر بولىپ سانالاتىن اباي, فارابي جانە جامبىلدى ەسكە الۋ جيىنىنا قاتىسۋدى ۇلكەن مارتەبە دەپ سيپاتتادى. قاسەينوۆ 2020 اباي مەن فارابي جىلىنا ارنالعان ءىس-شارالار تۋرالى اقپارات بەردى. ءفارابيدىڭ مۋزىكا تۋرالى كىتابىنىڭ اراب تىلىنەن تۇرىك تىلىنە اۋدارىلىپ جاتقانىن ايتقان قاسەينوۆ شىعارمانىڭ جاقىندا وقىرماندارىمەن قاۋىشاتىنىن جەتكىزىپ, ءسۇيىنشى بەردى. ول تۇركسوي-دىڭ 2021 جىلى جامبىلدىڭ مەرەيتويىنىڭ لايىقتى تۇردە اتاپ ءوتۋ ءۇشىن بار كۇشىمەن جۇمىس ىستەيتىنىن مالىمدەدى.
سالتاناتتى سوزدەردەن كەيىن مىرزاتاي جولداسبەكوۆتىڭ «دالا ادەبيەتىنىڭ ۇلى اقىنى جامبىل» كىتابىنىڭ تۇرىكشەگە اۋدارىلعان نۇسقاسىنىڭ تۇساۋكەسەرى بولدى.
شارا سوڭىندا 2020 جىلى اباي مەن ءفارابيدىڭ تۇركيادا تانىلۋىنا ۇلەس قوسقان عالىمدار, جۋرناليستەر مەن مەملەكەتتىك قايراتكەرلەر قازاقستان پرەزيدەنتىنىڭ, حالىقارالىق تۇركى اكادەمياسىنىڭ, قر مادەنيەت جانە سپورت مينيسترلىگىنىڭ جانە قازاقستان ەلشىلىگىنىڭ العىس حاتتارى جانە مەدالدارىمەن ماراپاتتالدى. اتاپ ايتقاندا, «ۇلتتىق كوزقاراس» جۋرنالىنىڭ باس رەداكتورى, Tۇركيا پارلامەنتى دەپۋتاتى مەتين گۇندوعدۋعا, TRT Avaz ارناسىنىڭ ۇيلەستىرۋشىسى سەدات ساعىركاياعا جانە پامۋككالە ۋنيۆەرسيتەتىنىڭ پروفەسسورى نەرگيز بيرايعا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ العىس حاتى تابىستالدى.
