ء«بىز قازىر كەشەندى باعدارمالار جاسادىق, ياعني بۇل – سپورت كەشەندەرىن سالۋ. بيىلدىڭ وزىندە بيۋدجەتتىڭ ەسەبىنەن التى سپورت كەشەنى سالىنادى. بۇدان بولەك جەكە كاسىپكەرلەر دە كەشەندەر سوعىپ جاتىر. ەكىنشى, اشىق الاڭدار جاسالىنۋدا. ءبىز وسى اشىق الاڭدا بالالاردى سپورتپەن شۇعىلداندىرۋ ءۇشىن تاجىريبەلى جاتتىقتىرۋشىلاردى شاقىرىپ جاتىرمىز», دەدى باقىتجان ساعىنتاەۆ.
جالپى بيىل 10 سپورت نىسانىنىڭ قۇرىلىسى جوسپارلانۋدا, ونىڭ 6 - ۋى جەرگىلىكتى بيۋدجەت ەسەبىنەن. بۇل 5 دەنە شىنىقتىرۋ-ساۋىقتىرۋ كەشەنىنىڭ قۇرىلىسى, ونىڭ ىشىندە قالا شەتىندە جەتىسۋ اۋدانىنىڭ «اينابۇلاق - 2» شاعىن اۋدانىندا, مەدەۋ اۋدانىنىڭ «الاتاۋ» شاعىن اۋدانىندا, تۇركسىب اۋدانىنداعى «جاس قانات», جەتىسۋ اۋدانىنداعى «كەمەل» جانە «قۇلاگەر» شاعىن اۋداندارىندا. سونداي-اق, الاتاۋ اۋدانىندا جابىق جانە اشىق كورتتارى بار تەننيس ورتالىعىنىڭ قۇرىلىسى جوسپارلانعان. قۇرىلىس جۇمىستارى باستالدى, اياقتالۋ مەرزىمى - 2021 جىل.
سونىمەن قاتار, بيىل ورتا مەكتەپتەردىڭ 52 ستاديونىن جاڭارتۋ جوسپارلانعان. بالالاردى تەگىن سپورت سەكتسيالارىمەن قامتۋدى ارتتىرۋ ءۇشىن مەكتەپ سپورتى فەدەراتسياسىمەن بىرلەسىپ قالا مەكتەپتەرىندە سپورت كلۋبتارىن اشۋ جۇمىستارى جۇرگىزىلۋدە. «سۇڭقار» حالىقارالىق شاڭعى ءترامپلينى كەشەنىنىڭ 2-ءشى كەزەگىنىڭ قۇرىلىس-مونتاجداۋ جۇمىستارى جۇرگىزىلۋدە, «جاڭا الماتى» باعدارلاماسىنا سايكەس سپورت سەكتسيالارىن كەڭەيتۋ جۇمىستارى جۇرگىزىلۋدە, ونىڭ باسىمدىقتارى ناۋرىزباي, الاتاۋ, تۇركسىب جانە جەتىسۋ اۋداندارىنىڭ تۇرعىندارى ءۇشىن سپورتتىڭ قولجەتىمدىلىگى بولىپ تابىلادى.
اتاپ وتەتىنى, اعىمداعى جىلى قالا بالالارىن سپورتپەن, مادەنيەتپەن جانە مەكتەپتەن تىس قوسىمشا ءبىلىم بەرۋمەن جاپپاي قامتۋ ءۇشىن 2020-2021 جىلدارعا ارنالعان جول كارتاسى ازىرلەندى, ول الماتى قالاسىنىڭ ءبىلىم, سپورت, مادەنيەت, قوعامدىق دامۋ, قوعامدىق دەنساۋلىق ساقتاۋ باسقارمالارىنىڭ بىرلەسكەن شارالار قابىلداۋىن كوزدەيدى.
