اقتوبە وبلىسىندا كاسىپكەرلىك نىساندارىنىڭ كوبەيۋى جاعىنان مۇعالجار اۋدانى كوش باستاپ كەلەدى. قازىرگى ۋاقىتتا مۇندا 3 مىڭنان استام كاسىپكەر تىركەلگەن. اۋداندا «بيزنەستىڭ جول كارتاسى – 2025» باعدارلاماسىمەن 1,5 ملرد تەڭگەگە 21 جوبا ماقۇلدانىپ, «قاراپايىم زاتتار ەكونوميكاسى» باعدارلاماسى بويىنشا 11 ءىرى جوبا ىسكە اسىپ جاتىر. ناتيجەلى جۇمىس ارقىلى اۋداندا تىركەلگەن شاعىن جانە ورتا كاسىپكەرلىك نىساندارى وتكەن جىلى 104 %-عا وسكەن.
عالىم ايتىمبەتوۆ وتكەن جىلدىڭ سوڭىندا اۋدان ورتالىعى قاندىاعاش قالاسىندا جيھاز جاسايتىن تسەح اشقان بولاتىن. از ۋاقىتتىڭ ىشىندە عالىمنىڭ تسەحى قاناتىن كەڭگە جايىپ, قازىر 12 ازاماتقا تۇراقتى جۇمىس تاۋىپ بەرىپ وتىرعان ءوندىرىس ورنىنا اينالدى.
– جۇمىسقا كىرىسكەنىمىزگە كوپ ۋاقىت وتە قويماسا دا, تاپسىرىس وتە كوپ بولعاندىقتان, باستاپقىدا ەكى-ءۇش اداممەن جۇمىس كولەمىن يگەرۋ وتە قيىنعا ءتۇستى. سول سەبەپتى جان-جاققا سۇراۋ سالىپ, 12 ادامدى جۇمىسقا قابىلدادىق. قازىر ولاردىڭ ەڭبەكاقىسى 150-200 مىڭ تەڭگە ارالىعىندا. جۇمىس كولەمى كوبەيسە, ەڭبەكاقى دا ارتادى. ارينە, جۇمىسكەرلەردەن ەڭ ءبىرىنشى تالاپ ەتىلەتىنى – العان تاپسىرىستى دەر كەزىندە ساپالى ورىنداۋ عانا. وسى تالاپتان شىققان ماماندارىمىز قالادى, ال مىندەتىنە ءجۇردىم-باردىم قاراعاندارعا بىزدە ورىن جوق, – دەيدى ع.ايتىمبەتوۆ.
كاسىپكەر جەكە كاسىبىن اشۋعا كەزدەيسوق كەلگەن جوق. ول 2000 جىلى وسى اۋداننىڭ اقكەمەر ەلدى مەكەنىندەگى ءۇيدىڭ ءبىر بولمەسىنەن قولدا بار قۇرالىمەن جيھاز جاساۋدى باستاعان ەدى. از ۋاقىتتىڭ ىشىندە عالىمنىڭ شەبەرلىگى اقكەمەر اۋىلىنان استى. اقتوبە قالاسىنان, بايعانين, تەمىر, شالقار اۋداندارىنان تاپسىرىس كوپتەپ تۇسە باستاعاندا, كاسىبىن كەڭەيتۋدىڭ توتە جولى – قاندىاعاش قالاسىندا جيھاز جاسايتىن جاڭا تسەح اشۋ دەپ ءتۇسىندى. وسى ىسكە بەل بايلاعان كاسىپكەر وتكەن جىلدىڭ باسىندا «قاراپايىم زاتتار ەكونوميكاسى» باعدارلاماسى شەڭبەرىندە جەڭىلدەتىلگەن نەسيە الۋعا قۇجاتتار ازىرلەدى. 20 ملن تەڭگە قارجىعا قول جەتكىزگەن سوڭ جيھاز تسەحىنىڭ قۇرىلىسىنا كىرىستى. بەس اي ىشىندە ءوندىرىس ورنىن تالاپقا ساي جابدىقتاپ, جيھاز جاساۋعا قاجەتتى جاڭا جابدىقتارعا تاپسىرىس بەردى. قازىر عالىمنىڭ تسەحى قاندىاعاش قالاسىنداعى ەڭ تاڭداۋلى جيھاز جاسايتىن ورىنعا اينالدى. شيكىزاتتى سىرتتان تاسىعاندى اسا ۇناتپايتىن كاسىپكەر وتاندىق ءونىمدى پايدالانادى. جيھاز اعاشتارىن قوستانايدان الدىرسا, باسقا كەرەك-جاراقتاردى وزدەرى-اق جاساپ الىپ ءجۇر. ويتكەنى عالىمنىڭ جۇمىسكەرلەرىنىڭ اراسىندا تەمىردەن ءتۇيىن تۇيگەن شەبەرلەر دە بار.
اقتوبە وبلىسى,
مۇعالجار اۋدانى
