بارشامىزعا بەلگىلى, كەلەسى جىل قازاق حالقى ءۇشىن – تاعىلىمدى كەزەڭ. قازاقستان رەسپۋبليكاسى تاۋەلسىزدىكتىڭ 30 جىلدىعىنا قادام باسىپ, مەجەلى داتانى اتاپ وتەدى. ەل پرەزيدەنتى ءوز سوزىندە ايتىپ وتكەندەي, پاندەميا سالدارىنان ەلىمىزدىڭ ەڭ ۇلىق مەرەكەسىن كەڭ اۋقىمدا اتاپ وتە المادىق. الايدا تاۋەلسىزدىك مەيرامىنىڭ رۋحى ءار ازاماتتىڭ جۇرەگىندە لاۋلاپ تۇر, ال قۇندىلىعى – تالايعا باعا جەتپەس مۇرا. راسىندا دا, ءبىز بەتپە-بەت كەلگەن قيىندىققا مويىماي, تەك العا بەرىك سەنىممەن قادام باسامىز. وسى وتىز جىلدا قالىپتاسقان ەلدىگىمىز ءبىزدى اداستىرمايدى. تاۋەلسىزدىك – ءبىزدىڭ باستى باعدارىمىز بەن تەمىرقازىعىمىز.
بىزگە ۇلكەن كونفەرەنتسيالار, سيمپوزيۋمداردان گورى, «حالىق ۇنىنە قۇلاق اساتىن مەملەكەت» تۇجىرىمداماسىنىڭ ناقتى دالەلى بولا الاتىن الەۋمەتتىك-ەكونوميكالىق ءىس-شارالار ماڭىزدى. بۇل تۋرالى ەل پرەزيدەنتى دە ناقتى ايتىپ ءوتتى. ء«بىز حالقىمىز ءۇشىن اسا قاستەرلى مەرەكەنى ناقتى ىستەرمەن جانە جاڭا جوبالارمەن اتاپ وتەمىز», دەدى ق.توقاەۆ. ەل بيلىگىنىڭ ءىرى ناۋقاندار مەن پافوسقا قۇرىلعان ءىس-شارالار فورماتىنان باس تارتاتىنى, بارلىق جۇمىس بارىنشا پراگماتيكالىق تۇردە, ۇنەمدى بولاتىنى قۋانتادى. باسىمدىق ەكونوميكا, الەۋمەتتىك سالا مەن ەكولوگياعا بەرىلىپ, جۇيەلى شارالاردىڭ كولەمدى كەشەنىن ىسكە اسىرۋ جالعاسىن تاپپاق. حالىقتىڭ بارلىق توپتارىنىڭ, اسىرەسە جاستاردىڭ, ايەلدەردىڭ, مۇمكىندىگى شەكتەۋلى ازاماتتارىمىزدىڭ مۇقتاجدىعى مەن قاجەتتىلىكتەرىنە ءجىتى نازار اۋدارىلاتىنى شىنىندا الەۋمەتتىك ماسەلەلەردىڭ كۇن تارتىبىندە ەكەنىن كورسەتەدى. حالىقتىڭ جاعدايىن تۇزەتۋ, دەموكراتيالىق ينستيتۋتتاردى ودان ءارى جەتىلدىرۋ, از قامتىلعان وتباسىلاردى, كوپ بالالى انالاردى, جاستارعا دەگەن قامقورلىققا باعىتتالعان ءىس-شارالاردى وتكىزۋ كەلەسى جىلدىڭ باستى مىندەتتەرى دەپ بەلگىلەندى.
تاۋەلسىزدىكتىڭ 30 جىلدىعىندا مەملەكەتتىگىمىز بەكىپ, ەلدىگىمىز نىعايا ءتۇستى. تاۋەلسىزدىك – ءبىز ءۇشىن مەيرام عانا ەمەس, يدەولوگيامىزدى, كۇش-جىگەرىمىزدى باعىتتاي وتىرىپ, تىڭعىلىقتى دۇنيە اتقاراتىن ۇلكەن ءمانى بار استارلى ۇعىم. تاۋەلسىزدىگىمىز نىعايعان سايىن, كەيبىر شەتەلدىك ساياساتكەرلەردىڭ ورىنسىز پىكىرلەرىنە ۇرىنىپ جاتامىز. مۇنداي قاتە, تولىق زەرتتەلمەگەن مالىمدەمەلەر قازاقستاننىڭ ەگەمەندىگىن ەل باسىنداعى تۇلعالار عانا ەمەس, بارلىق حالىق بولىپ قىزعىشتاي قورعاپ, قاستەرلەۋىمىز كەرەك ەكەنىن كورسەتەدى. ءار ازامات ءۇشىن تاۋەلسىزدىك كيەلى ۇعىم بولىپ قالىپتاسۋى كەرەك. وسى رەتتە پرەزيدەنتتىڭ تۇرعىنداردىڭ ىنتىماعىن, حالىقتىڭ بىرلىگىن, ەلدىڭ ەگەمەندىگىن كوتەرەمىز دەگەن ويلارى كوڭىلگە قونادى. ال بارشا قازاقستاندىق وسى يدەيانى جۇزەگە اسىرۋعا جۇمىلا كىرىسكەنىمىز دۇرىس.
نۇرلان دۋلاتبەكوۆ,
ە.بوكەتوۆ اتىنداعى ۋنيۆەرسيتەت رەكتورى, ۇعا كوررەسپوندەنت-مۇشەسى, پروفەسسور
