ديرەكتوردىڭ مىندەتىن اتقارۋشى مەيرامگۇل اياعانوۆانىڭ ايتۋىنشا, بۇل مەكتەپ ەكى جىل بۇرىن پايدالانۋعا بەرىلدى. قازىر مۇندا 424 وقۋشى ءبىلىم الادى. مەكتەپتە قوسىمشا كادەت سىنىبى, وندىرىستىك, تىگىن شەبەرحانالارى, گيمناستيكا ورتالىعى مەن تير الاڭى بار. وقۋشىلار شىعارماشىلىعىن دامىتۋ ماقساتىندا16 ۇيىرمە مەن 4 كلۋب اشىلىپتى.
بۇل ءبىلىم ورداسىنىڭ اۋدانداعى وزگە مەكتەپتەردەن ءبىر وزگەشەلىگى بار. مۇندا جاڭاشىل ۇستازدار دا, ويى جۇيرىك, قولى شەبەر وقۋشىلار دا كوپ. ماسەلەن, حيميا ءپانىنىڭ مۇعالىمى اقىنتا بيسەمبيەۆا بىلتىر رەسپۋبليكالىق عىلىمي جوبالار بايقاۋىنا قاتىسىپ, جەڭىمپاز اتاندى. ءسويتىپ, جۇلدەگە STEM زەرتحانانى ۇتىپ الدى. شاكىرتتەرىنىڭ جاڭا تەحنولوگيالاردى جەتىك مەڭگەرىپ, ءبىلىمدى بولعانىن قالايتىن ۇستاز وسى زامانعى زەرتحانانى ءوزى ەڭبەك ەتەتىن مەكتەپكە سىيلادى.
– بيىلعى قاڭتاردان بەرى 30 وقۋشى جاڭا زەرتحانادا قوسىمشا ءبىلىم الا باستادى. مۇندا جوعارى سىنىپتىڭ وقۋشىلارى ارنايى باعدارلاما جۇكتەلگەن 3D پرينتەردىڭ كومەگىمەن تەلەفون تىرەۋىشىن, قۇمىرالار مەن ەرەكشە فورماتتاعى اباي كىتابىن, برەلوكتار, مەدالدار جاساپ شىعاردى. وقۋشىلار قۇراستىرعان درون ادەتتەگىدەي اۋەدە ۇشادى. ءتىپتى سۋ بەتىندە ءجۇزىپ, ۆيدەو تۇسىرەدى. دروننىڭ اۋەدە ۇشۋ جىلدامدىعى سەكۋندىنا 1,5 مەتر. ال سۋ بەتىندە سەكۋندىنا 2,5 مەترگە دەيىن جۇزەدى. ازىرگە ەكسپەريمەنت تۇرىندە قۇراستىرىلعان دروننىڭ قۋاتى 6 مينۋتقا جەتەدى. كەيىن قايتا قۋاتتاۋعا بولادى. سونىمەن بىرگە وقۋشىلار اعاش ستانوگىمەن, 3D نوۋتبۋكپەن جۇمىس ىستەۋدى ۇيرەنۋدە, – دەيدى STEM زەرتحانانىڭ لابورانتى ءلايلا شىڭدىباەۆا.
ونىڭ ايتۋىنشا, وقۋشىلار STEM زەرتحانادا ءۇش ءتۇرلى فۋنكتسيا اتقاراتىن روبوتتار قۇراستىرىپتى. ماسەلەن, مبوت روبوتى وزدىگىنەن بۇرىلىپ, ءتۇرلى كەدەرگىدەن وتە الادى. ەكىنشى روبوت اۋەنمەن قوزعالادى. ءۇشىنشى روبوت ارنايى باعدارلاما ارقىلى سىزىلعان سىزبالار بويىمەن جۇرەدى.
– STEM زەرتحانا ماتەماتيكا, ينجەنەريا باعىتىنداعى وسى زامانعى تەحنولوگيالىق ىزدەنىستەرگە باعىتتالعان. جوعارى سىنىپتىڭ وقۋشىلارى روبوتتاردى قۇراستىرادى. تومەنگى سىنىپ وقۋشىلارى درون مەن روبوت قۇراستىرۋدىڭ تاسىلدەرىن ۇيرەنىپ جاتىر, – دەيدى ساعىز ورتا مەكتەبى ديرەكتورىنىڭ مىندەتىن اتقارۋشى مەيرامگۇل اياعانوۆا.
ال باقىت قويشىعالي جەتەكشىلىك ەتەتىن ۇيىرمەدە 20-دان استام وقۋشى كلاسسيكا, ەسترادا جانە ۇلتتىق بي باعىتىندا ءدارىس الادى. قازىردىڭ وزىندە بالعىن بيشىلەردىڭ ونلاين-فورماتتا ءوتىپ جاتقان «جارىق جۇلدىز» كونكۋرسىندا شوقتىعى بيىك تۇر.
اتىراۋ وبلىسى,
قىزىلقوعا اۋدانى
