قازاقستاننىڭ ەڭبەك سىڭىرگەن قايراتكەرى, حالىقارالىق ق. ساتباەۆ قورىنىڭ پرەزيدەنتى, كورنەكتى اقىن كاكىمبەك سالىقوۆ ومىردەن وزدى. بۇل تۋرالى «قازاقپارات» اگەنتتىگى حابارلادى.
ك. سالىقوۆ 1932 جىلى 22 قاڭتاردا سولتۇستىك قازاقستان وبلىسى, شال اقىن اۋدانى, ەڭبەك اۋىلىندا تۋعان. 1955 جىلى ماسكەۋدىڭ ءتۇستى مەتاللۋرگيا جانە التىن ينستيتۋتىن بىتىرگەن. ودان كەيىنگى جىلدارى جەزقازعان كەنىشىندە كەن ماستەرى, ۋچاستكە باستىعى, ك.ي.ساتباەۆ اتىنداعى كەن-مەتاللۋرگيا كومبيناتى پارتكومىنىڭ حاتشىسى, قازاقستان كپ قالالىق كوميتەتىنىڭ ءبىرىنشى حاتشىسى, جەزقازعان وبلىستىق پارتيا كوميتەتىنىڭ ەكىنشى حاتشىسى قىزمەتىن اتقارادى. ال 1975 جىلى كوكپ ورتالىق كوميتەتىنىڭ اپپاراتىندا ينسپەكتور بولىپ قىزمەت ىستەيدى.
1984 جىلى وزبەكستان كپ وك-ءنىڭ بيۋرو مۇشەسى, قاراقالپاق اكسر وبلىستىق پارتيا كوميتەتىنىڭ ءبىرىنشى حاتشىسى, ودان كەيىن كەڭەستەر وداعى جوعارعى كەڭەسىنىڭ ەكولوگيا كوميتەتىنىڭ توراعاسى, جوعارعى كەڭەستىڭ پرەزيديۋم مۇشەسى قىزمەتتەرىندە بولدى.
العاشقى ولەڭدەر جيناعى 1977 جىلى جارىق كورگەن. سول جىلى «جەزكيىك» اتتى جىر جيناعى ورىس تىلىنە اۋدارىلىپ جاريالاندى. 1981 جىلى «قىرعىزستان» باسپاسى ونىڭ «نۇرلى كۇندەر» كىتابىن قىرعىز تىلىندە, 1983 جىلى عافۋر عۇلام باسپاسى «جەزكيىك» جيناعىن وزبەك تىلىندە شىعاردى. «بۋكەتوۆكە رەكۆيەم», «ەدەلۆەيس», «عاسىرعا تەڭ ءبىر مەزەت», «چە گەۆارا» اتتى پوەمالارى ورىس تىلىنە اۋدارىلدى.
ك. سالىقوۆ - «دالا», «قىراندار», «گاككۋ», «جەزكيىك», «ەڭلىكگۇل», «تاتتىمبەت», «دومبىرا», «قاراقالپاق», «كەنەسارىنىڭ سوڭعى ءسوزى» سەكىلدى كوپتەگەن پوەمالاردىڭ اۆتورى. سوڭعى جىلدارى ونىڭ «ويتولعاق» (2001), «سىرعالى سونەتتەر» (2001), «كۇزگى شۋاق» (2004), «كۇزگى سارىن» (2005), «سەنسىڭ ەل داناسى» (2006), «الەمنىڭ سەگىزىنشى عالاماتى» (2006), «ماعجانعا تاعزىم» (2008) كىتاپتارى جارىق كوردى. ۆ.ۆ.ماياكوۆسكيدىڭ «ۆ.ي.لەنين» پوەماسىن, ا.س.پۋشكيننىڭ ولەڭمەن جازىلعان «ەۆگەني ونەگين» رومانىن, م.يۋ.لەرمونتوۆتىڭ, يۋ. پ. پولونسكيدىڭ, ر. عامزاتوۆتىڭ, الدان-سەمەنوۆتىڭ, س.نوروۆچاتوۆتىڭ, ۆ.ساۆەلەۆتىڭ, يا.كولاستىڭ, م.لۆوۆتىڭ, موڭعول جانە وزبەك اقىندارىنىڭ ولەڭدەرىن قازاق تىلىنە اۋداردى. ب.جۇمانيازوۆ, ن.تىلەنديەۆ, ءا.بەيسەۋوۆ, ە.حاسانعاليەۆ سياقتى كومپوزيتورلار اقىننىڭ كوپتەگەن ولەڭدەرىنە ءان شىعاردى. جالپى, بىرنەشە وردەن, مەدالدارمەن ماراپاتتالعان اقىننىڭ كوركەم تۋىندىلارى كەلەر ۇرپاققا رۋحاني ازىق بولارى ءشۇباسىز.
دەرەككوز: «قازاقپارات» اگەنتتىگى
