ءبىلىمىم جوعارى. ماگيسترمىن. مۇمكىندىگىم شەكتەۋلى بولعاندىقتان جوعارى بىلىمگە يە بولۋ ءۇشىن تاعدىردىڭ سان سوقپاعىنان وتۋىمە تۋرا كەلدى. ستۋدەنت اتانعان كۇننەن باستاپ ءتۇرلى قيىندىققا تاپ بولدىم. ويتكەنى جوعارى وقۋ ورىندارىندا ءبىلىم بەرەتىن پەداگوگتەردىڭ قوياتىن ءبىرىنشى سۇراعى: ء«بىز سەنى قالاي وقىتامىز؟» دەگەن ساۋال بولدى. اۋديو فورماتتا جازىلعان قازاق تىلىندەگى اقپاراتتاردىڭ تاپشىلىعىنان ەكىنشى كۋرستا ەرىكسىز ورىس توبىنا اۋىسۋىما ءماجبۇر بولدىم. ەرىك-جىگەرىم مەن تالپىنىسىمنىڭ ارقاسىندا وقۋىمدى ۇزدىك ءتامامدادىم. قىزىل ديپلومعا بىتىرسەم دە ەكى قولىما ءبىر كۇرەك تابا الماي ءبىراز ءجۇردىم. ال ون ەكى مۇشەسى ساۋ قاتارلاستارىم ديپلومدارىن الا سالا وزدەرى قالاعان جۇمىستارىنا ورنالاستى. ارتىنشا وردالى وڭتۇستىكتەن وڭدى باستاما بولماعان سوڭ, استاناعا جول تارتتىم.
نۇر-سۇلتانعا كەلىپ جۇمىس ىستەدىم. ەكى جىلدان كەيىن تىڭعىلىقتى دايىندىقتىڭ ارقاسىندا ماگيستراتۋراعا گرانتقا ءتۇستىم. ماگيستر اتانعاننان كەيىن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عىلىمي كىتاپحاناسىنا جۇمىسقا تۇردىم. اتالعان مەكەمە مەڭگەرۋشىسى باقىتجان اسەتىلدا ۇلى ورازاليەۆتىڭ قولداۋىمەن ينكليۋزيۆتى اقپاراتتىق رەسۋرستار ورتالىعى اشىلىپ, جۇمىسقا كىرىسۋىمە مول مۇمكىندىك جاسالدى. وسىلايشا, قىزمەتىمە دەگەن قۇلشىنىسىم ويانىپ, ءومىر سۇرۋگە دەگەن قۇشتارلىعىم ودان سايىن ارتا ءتۇستى.
ال وسى ماقالامدا پرەزيدەنتىمىز قاسىم-جومارت توقاەۆتىڭ جولداۋىندا ايتىلعان «حالىق ۇنىنە قۇلاق اساتىن مەملەكەت» تۇجىرىمداماسى اياسىندا بيلىككە مۇمكىندىگى شەكتەۋلى جانداردىڭ ماسەلەلەرىن, ۇسىنىستارىن جەتكىزگىم كەلەدى.
مەن شىمكەنت قالاسىندا مۇمكىندىگى شەكتەۋلى ازامات رەتىندە 6 جىل بويى تۇرعىن ءۇي كەزەگىندە تۇردىم. جوعارىدا ايتىپ وتكەنىمدەي, ەلورداعا قونىس اۋدارۋىما بايلانىستى بىردەن ءۇي كەزەگىنەن الىپ تاستادى. وسىعان وراي مۇمكىندىگى شەكتەۋلى جانداردى قايدا قونىس اۋدارسا دا باسپانا كەزەگىنەن شىعارىلماعانى ءجون دەگەن ۇسىنىسىمدى ايتار ەدىم.
ەلىمىزدە مۇمكىندىگى شەكتەۋلى ازاماتتاردى وقىتاتىن, ونىڭ ىشىندە زاعيپ جاندارعا ءبىلىم بەرەتىن زاماناۋي ەلەكتروندى جۇيە ەنگىزىلمەگەن. ارنايى بازا جوق. وسىنداي كەدەرگىلەردى جويۋ ماقساتىندا ەلىمىزدە ءبىلىم الۋشى ءاربىر ستۋدەنت, ماگيسترانت, دوكتورانتتارعا بارلىق جوعارى وقۋ ورىندارىندا مۇمكىندىگى شەكتەۋلى جاندار اراسىندا قارىم-قاتىناس ورناتۋ, ءبىلىم بەرۋ ءۇشىن دايارلىق كۋرسى جۇرگىزىلسە دەگەن ءوتىنىشىم بار. سول كەزدە ۋنيۆەرسيتەت قابىرعاسىندا قىزمەت ەتەتىن وقىتۋشىلار تاراپىنان زاعيپ ستۋدەنت وقۋعا تۇسكەن كەزدە ء«بىز سەنى قالاي وقىتامىز؟» دەگەن سۇراق قويىلماس ەدى.
مۇمكىندىگى شەكتەۋلى جانداردىڭ قوعامدىق كولىكتەردە ءجۇرۋى دە ۇلكەن پروبلەما. ولاي دەيتىن سەبەبىم, ينۆاتاكسيدىڭ جەتىسپەۋشىلىگىنەن ەرەكشە كۇتىمدى قاجەت ەتەتىن جاندار مارشرۋتتارعا مىنۋگە ءماجبۇر, سايكەسىنشە جول ءجۇرۋ اقىسىن تولەيدى. مۇمكىندىگى شەكتەۋلى ازاماتتار مەكەنجايىن اۋىستىرسا, ياعني ءبىر قالادان ەكىنشى قالاعا بارا قالسا, نەمەسە ءبىر وبلىستان كەلەسى وبلىسقا جولى تۇسكەن جاعدايدا, جالپى, رەسپۋبليكامىزدىڭ بارلىق جەرىندە قوعامدىق كولىكتەردە تەگىن جۇرۋىنە جاعداي جاسالسا ءجون بولار ەدى.
بۇگىندە ەلىمىزدىڭ بارلىق تەاترىندا اۋديوستۋديالار بار. سول ستۋديالار نەگىزىندە جاڭا جوبالاردى نەگە جۇزەگە اسىرماسقا؟! ماسەلەن, اۋديو-ادەبي كىتاپتاردى اكتەرلار وقىپ, ونى تاسپاعا ءتۇسىرىپ, كوپشىلىككە ۇسىنسا, تالاي مۇمكىندىگى شەكتەۋلى جاننىڭ تالانتى اشىلار ەدى...
ارنايى زاعيپتار كىتاپحانالارىندا دا جاعداي ءماز ەمەس. كىتاپتاردى ەلەكتروندى فورماتتا وقىتاتىن شتات جوق دەۋگە بولادى. باسقاسىن ايتپاعاندا, برايل جۇيەسىندە ءدارىس بەرىپ, كومپيۋتەر ۇيرەتۋشى مامان مۇلدە جوق. مامانداندىرىلعان كىتاپحانالاردا پسيحولوگ مامانى جۇمىس ىستەسە, برايل قارپىندە ۇيرەتەتىن شتات بولىنسە جانە دىبىس رەجيسسەرىنىڭ شتاتى دا قاراستىرىلسا دەگەن ۇسىنىسىم بار.
مۇمكىندىگى شەكتەۋلى جاندار – قوعامدا ءوز ورنىن تولىقتاي تاپپاعان ازاماتتار. ەلدەگى بارلىق وڭىردە كىتاپحانا, حالىققا قىزمەت كورسەتۋ ورتالىعى, پوشتا, ەمحانا جانە سپورتزال سىندى بىرقاتار قوعامدىق ورىنداردىڭ قىزمەتىن ءبىر جەردەن كورسەتەتىن ينكليۋزيۆتى ورتالىق اشىلسا قۇبا-قۇپ بولار ەدى. ويتكەنى اتاۋى ايتىپ تۇرعانداي, ءبىزدىڭ مۇمكىندىگىمىز شەكتەۋلى. «تسيفرلى قازاقستان» دەپ ايتىپ جاتىرمىز عوي, راسىندا وسى باعدارلاما اياسىندا مۇگەدەكتەر ءۇشىن بارلىق قىزمەت تۇرلەرىن ۇسىناتىن ورىندار ارنايى باعدارلاما شەڭبەرىندە ءبىر جەرگە توپتاستىرىلسا, ءبىراز ماسەلەنىڭ شەشىلەتىنى انىق.
مەن جانە مەنىڭ تاعدىرلاستارىمنىڭ جۇرەكتەرىن جارىپ شىققان وسى ءبىر ۇسىنىستار گازەت بەتىندە عانا حاتتالىپ قالماي, پارلامەنت دەپۋتاتتارى نازارىنا الىپ, شەكتەۋلى مۇمكىندىگىمىزدىڭ شەكاراسىن كەڭەيتىپ بەرسە, ءبىز دە وزگە ازاماتتار سەكىلدى ەل قاتارلى ءومىر سۇرەر ەدىك, ءسال دە بولسىن كەدەرگىسىز, ارينە...
گۇلhايا جۋاشباەۆا,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عىلىمي كىتاپحاناسى ينكليۋزيۆتى اقپاراتتىق رەسۋرستار ورتالىعىنىڭ كوورديناتورى
