يسپانيانىڭ ۇلتتىق سوتى قىتاي حالىق رەسپۋبليكاسىنىڭ ەكس-توراعاسى تسزيان تسزەمين مەن قىتايدىڭ ءتورت بىردەي ءىرى ساياسي قايراتكەرىن تۇتقىنداۋعا وردەر بەردى. بۇل تۋرالى ربك سايتى حابارلادى.
يسپانيا ۇلتتىق سوتى قىتاي بيلىگىنىڭ تيبەت تۇرعىندارىنا جاساعان زورلىق-زومبىلىعىن تەكسەرە كەلىپ, ناتيجەسىندە جوعارىدا اتى اتالعان قىتاي ساياساتكەرلەرىن كىنالى دەپ تانىعان.
سونىمەن, قىتاي حالىق رەسپۋبليكاسىنىڭ ەكس-توراعاسى تسزيان تسزەمين, ەكس-پرەمەر لي پەن, قحر ۇكىمەتى باسشىسىنىڭ بۇرىنعى ورىنباسارى تسياو شي, تيبەت كومپارتياسىنىڭ ءبىرىنشى حاتشىسى چەن كيان مەن قىتاي وتباسىن جوسپارلاۋ ءمينيسترى پەن پەيۋنگە «ىزدەۋ» جاريالاندى.
يسپانيا ۇلتتىق سوتى قىتايدىڭ جوعارىدا اتالىپ وتكەن بۇرىنعى باسشىلارىن تيبەتتە تۇرعىنداردى اياۋسىز قىردى, لاڭكەستىك ارەكەتتەردى ۇيىمداستىردى, ادامگەرشىلىككە جات قىلمىس جاسادى دەپ ايىپتادى.
ەندى كىنالى دەپ تابىلعان قىتاي ساياساتكەرلەرى يسپانيا اۋماعىنا نەمەسە يسپانيامەن ازاماتتاردى ەكستراديتسيالاۋ تۋرالى كەلىسىم جاساسقان ەكىنشى ءبىر ەلدىڭ تەرريتورياسىنا كەلە قالسا تۇتقىندالادى.
ال وسى ماسەلەگە قاتىستى قىتاي جاعى ءمادريدتى وزدەرىنىڭ ىشكى ىسىنە ارالاسىپ وتىر دەپ ايىپتادى. قىتاي بيلىگى يسپانيادان تسزيان تسزەمين, لي پەن, تسياو شي, چەن كيان مەن پەن پەيۋندى تۇتقىنداۋعا بايلانىستى شىعارعان قاۋلىلارىنىڭ كۇشىن جويۋدى تالاپ ەتۋدە.
قىتاي سىرتقى ىستەر مينيسترلىگىنىڭ وكىلى حۋن لەي: «قىتايدىڭ تيبەتكە بايلانىستى ساياساتى وزگەرمەيدى... ءبىز يسپانيا ۇكىمەتىنەن ەكى ەل اراسىنداعى قارىم-قاتىناسقا سەلكەۋ تۇسىرەتىن مۇنداي قاتە شەشىمدى وزگەرتۋدى تالاپ ەتەمىز», – دەدى.
جولدىباي بازار.
دەرەككوز: ربك.
