كورەي حالىقتىق دەموكراتيالىق رەسپۋبليكاسىندا ەلدىڭ بۇرىنعى پرەزيدەنتى كيم ير سەننىڭ 120 جاسقا دەيىن ءومىر سۇرۋىنە ىقپال ەتۋ ءۇشىن قىزمەت ەتكەن ارنايى ىرىكتەلگەن دارىگەرلەر توبى بولعان. بۇل تۋرالى Lenta.ru حابارلادى.
كورەيا رەسپۋبليكاسىنىڭ «چوسون يلبو» گازەتى مالىمدەگەندەي, بۇل دەرەكتەر اتالمىش مەديتسينالىق توپتىڭ جەتەكشىسى بولىپ, كەيىننەن وڭتۇستىك كورەياعا قاشىپ كەلگەن كيم سو يوننىڭ كىتابىندا جازىلعان.
كيم سو يوننىڭ ايتۋى بويىنشا, كيم ير سەن ۇزاق ءومىر ءسۇرۋدى 65 جاسقا كەلگەن كەزىندە ويلانا باستاعان. 1977 جىلى ول ەلدىڭ ەڭ ۇزدىك دارىگەرلەرىن جيناپ, ولاردىڭ الدىنا وسى تاپسىرمانى قويدى. دارىگەرلەر ادامنىڭ ۇزاق ءومىر سۇرۋىنە شىعىس مەديتسيناسىندا قولدانىلاتىن 1700 ءشوپتىڭ ىقپالىن زەرتتەپ شىققان. ولار سونداي-اق پرەزيدەنتتىڭ ۇزاق ءومىر ءسۇرۋى ءۇشىن وعان جاقسى تاماقتانىپ, ءجيى كۇلۋ كەرەك دەپ شەشكەن. سوندىقتان دا كيم ير سەن ارقاشان كوڭىل كوتەرەتىن ارتىستەردىڭ ونەرىن تاماشالاعان ەكەن. دەگەنمەن, دارىگەرلەردىڭ جۇمىسى ايتارلىقتاي ناتيجە بەرمەدى. 1980 جىلداردىڭ سوڭىندا كيم ير سەن مي اتەروسكلەروزىنا شالدىعادى. 78 جاسىندا ول دارىگەرلەردەن ۇنەمى وزىنە جاس بالالاردىڭ قانىن قۇيىپ وتىرۋدى تالاپ ەتكەن. كيم سو يون بۇل ارەكەتتەر كيم ير سەننىڭ قانى AB-دان B توبىنا اۋىسىپ, ونىڭ دەنساۋلىعىنىڭ ناشارلاۋىنا اسەر ەتكەنىن ايتادى.
65 جاستاعى دارىگەردىڭ كىتابىندا تەك كيم ير سەن تۋرالى ەستەلىكتەر عانا ەمەس, سونىمەن قاتار, ادام ءومىرىن ۇزارتۋ جونىندەگى اۆتوردىڭ ويلارى جازىلعان. ول ادامعا ۇزاق ءومىر ءسۇرۋ ءۇشىن بارلىق جامان ادەتتەردەن ارىلىپ, ديەتا ساقتاپ, ءجيى كۇلۋ كەرەك دەگەن شەشىمگە كەلگەن ەكەن.
ايدار ورىسباەۆ.
دەرەككوز: Lenta.ru
