مەملەكەت تاريحى ينستيتۋتىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى, حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەلەرى, حالىق قاھارمانى, گەنەرال-لەيتەنانت باقىتجان ەرتاەۆتىڭ, گەنەرال-لەيتەنانت, تاريح عىلىمدارىنىڭ دوكتورى, پروفەسسور اباي تاسبولاتوۆتىڭ جانە مەملەكەت تاريحى ينستيتۋتى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى عالىمدارىنىڭ قاتىسۋىمەن «ەلباسى جانە قازاقستان رەسپۋبليكاسىنىڭ قارۋلى كۇشتەرى» تاقىرىبىندا دوڭگەلەك ۇستەل ءوتتى.
مەملەكەت تاريحى ينستيتۋتىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى, حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەلەرى, حالىق قاھارمانى, گەنەرال-لەيتەنانت باقىتجان ەرتاەۆتىڭ, گەنەرال-لەيتەنانت, تاريح عىلىمدارىنىڭ دوكتورى, پروفەسسور اباي تاسبولاتوۆتىڭ جانە مەملەكەت تاريحى ينستيتۋتى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى عالىمدارىنىڭ قاتىسۋىمەن «ەلباسى جانە قازاقستان رەسپۋبليكاسىنىڭ قارۋلى كۇشتەرى» تاقىرىبىندا دوڭگەلەك ۇستەل ءوتتى.
دەپۋتات ب.ەرتاەۆ ءوز سوزىندە 1992 جىلدىڭ 7 مامىرىندا ەلباسىنىڭ جارلىعىمەن قازاقستان رەسپۋبليكاسىنىڭ قارۋلى كۇشتەرى قۇرىلعانىن, ونى جاساقتاۋ وڭايعا تۇسپەگەنىن ايتتى. «قولىمىزدا توزعان تەحنيكاعا تولى قويمالار, تاجىريبەلى ۇشقىشتار مەن جانار-جاعارمايدىڭ جوقتىعىنان ۇشپايتىن ۇشاقتار, باسقارۋسىز اۋە قورعانىس جۇيەسى قالدى. 1992-1998 جىلدار ارالىعىندا قارۋلى كۇشتەرىمىزدى قايتا قۇرىپ, 1999 جىلدان باستاپ, ونى تۇبەگەيلى رەفورمالاۋعا كوشتىك. ناتيجەسىندە قارۋلى كۇشتەرىمىز از عانا ۋاقىتتىڭ ىشىندە ەل قورعانىنا اينالدى», دەدى ول.
ب.ەرتاەۆ ايتقانداي, وتكەن جىلداردا ءبىزدىڭ مەملەكەتىمىز باستى ماسەلەنى – قازىرگى كەزدە بۇكىل الەم مويىنداعان تاۋەلسىز, دەربەس مەملەكەت قۇرۋ مىندەتىن شەشتى. ونىڭ قاۋىپسىزدىگىنىڭ كەپىلى – قارۋلى كۇشتەر بولىپ تابىلادى. تاۋەلسىزدىگىمىزدىڭ ىرگەسى مىقتى بولۋىنا بىردەن-ءبىر سەبەپكەر – قازاقستاننىڭ قارۋلى كۇشتەرىنىڭ مىقتى بولۋى.
گەنەرال-لەيتەنانت اباي تاسبولاتوۆ جاستارعا پاتريوتتىق تاربيە بەرۋ ماسەلەسىن قوزعادى. «ءبىزدىڭ بابالارىمىز كەڭ-بايتاق جەرىمىزگە كوز الارتقان جاۋلارىن بىلەكتىڭ كۇشىمەن, نايزانىڭ ۇشىمەن عانا ەمەس, اقىلمەن دە, پاراساتتىلىقپەن دە, دانالىقپەن دە جەڭگەن. سوندىقتان, جاستاردى سولاردىڭ ۇلگىسىندە تاربيەلەۋىمىز كەرەك. ءبىزدىڭ ەلىمىز حالىقارالىق ارەنادا ءوزىندىك ورنى بار بەدەلدى مەملەكەت. وسىنىڭ بارلىعى اسىرا سىلتەپ ايتقاندىق ەمەس, ەلباسىمىزدىڭ ارقاسى», – دەدى ا.تاسبولاتوۆ.
دوڭگەلەك ۇستەلگە قاتىسۋشىلار ەلباسىنىڭ قازاقستان رەسپۋبليكاسى قارۋلى كۇشتەرىن دامىتۋعا ۇدايى قامقورلىق جاساپ وتىرعانىن باسا ايتتى.
– مەملەكەت تاريحىنا قاتىستى ماسەلەلەر زەرتتەلىپ, جازىلىپ جاتىر, وسى رەتتە اسكەري تاقىرىپتى دا نازاردان تىس قالدىرماعانىمىز ءجون. وسىنداي ماسەلەلەردى تالقىلاپ, سارالاۋ ءۇشىن سىزدەردى بىرلەسە جۇمىس ىستەۋگە شاقىرامىز, – دەدى دوڭگەلەك ۇستەلدىڭ مودەراتورى, تاريح عىلىمدارىنىڭ دوكتورى, پروفەسسور بۇركىتباي اياعان. ول سونىمەن ءبىرگە, قازاقتىڭ جانىمەن, قانىمەن, ەرجۇرەك باتىرلارىنىڭ ەرلىگىمەن ساقتالعان, قورعالعان اتامەكەنىمىز, قاسيەتتى قازاق دالاسى – بابالارىمىزدىڭ ۇرپاعىنا قالدىرىپ كەتكەن اسىل مۇراسى ەكەنىن, وسىنىڭ بارلىعى ەلباسىنىڭ كوپ جىلعى قاجىرلى ەڭبەگىنىڭ, قاجىماس قايراتىنىڭ, سارقىلماس كۇشىنىڭ ارقاسىندا ءوسىپ-وركەندەپ كەلە جاتقانىن تىلگە تيەك ەتتى.
«ەگەمەن-اقپارات».
