سالالىق باسقارمانىڭ ءباسپاسوز قىزمەتى تاراتقان اقپاراتقا سۇيەنسەك, №2 وبلىستىق ينفەكتسيالىق اۋرۋحاناداعى جۇقپالى اۋرۋلارمەن اۋىراتىن بالالار بولىمشەسى وزگە ەمدەۋ ورنىنا كوشىرىلگەن ەدى. ءسويتىپ, وبلىستىق بالالار اۋرۋحاناسىندا ەپيدەميالىق ستاتسيونار رەتىندە جۇقپالى اۋرۋمەن اۋىرعان بالالاردى قابىلدادى. اتالعان اۋرۋحانانىڭ باس دارىگەرى نۇرقابىل ايتمۇحانبەتوۆتىڭ ايتۋىنشا, بيىلعى 1 تامىزدان 4 قىركۇيەككە دەيىنگى ارالىقتا 62 ناۋقاس ەمدەلىپ شىققان.
– بىلتىر ءدال وسى كەزەڭدە جۇقپالى اۋرۋمەن 208 ناۋقاس قابىلدانعان ەدى. بيىل ناۋقاستاردىڭ قاتارى 146-عا تومەندەدى. الەۋمەتتىك جەلىدە بالالار اراسىندا ديارەيا تارادى دەگەن اقپارات جالعان ەكەنى داۋسىز, – دەدى ن. ايتمۇحانبەتوۆ.
دەگەنمەن, №2 وبلىستىق ينفەكتسيالىق اۋرۋحانانىڭ ينفەكتسيونيست-دارىگەرى اينۇر ساپاروۆانىڭ ايتۋىنا قاراعاندا, كۇن سۋىتقان كەزدە جەدەل ىشەك ينفەكتسيالارى روتوۆيرۋستىق جۇقپالارمەن قاتارلاسا جۇرەدى. سونىڭ سالدارىنان ىشەك اۋرۋلارى بالالار اراسىندا اۋىر جاعدايدا ءوتۋى مۇمكىن. جالپى جەدەل ىشەك ينفەكتسياسى اۋىر, ورتاشا, جەڭىل تۇردە وتەدى. بۇل اۋرۋ اۋىز قۋىسى ارقىلى ىشەك جولدارىن زاقىمدايدى. ناۋقاستا قۇسۋ, دەنە قىزۋىنىڭ كوتەرىلۋى, السىزدىك سيمپتومدارى ارقىلى بىلىنەدى. اسىرەسە, كۇز ايلارىندا روتوۆيرۋستى ينفەكتسيامەن قاتار جۇرەتىندىكتەن, ىشەك ينفەكتسياسى ءورشي تۇسەدى.
– سول سەبەپتەن, جازدا باستالىپ كۇزگە تامان ءورشيتىن ىشەك ينفەكتسياسىن كوروناۆيرۋسپەن نەمەسە كاۆاساكي سيندرومىمەن بايلانىستىرۋعا ەش نەگىز جوق. كەرىسىنشە, وتكەن جىلدارى ىشەك اۋرۋىمەن اۋىرعان بالالار سانى ارتقان بولسا, بيىل ولاردىڭ سانى ازايدى. مۇنى ءبىز پاندەميا كەزىندەگى كارانتيندىك شەكتەۋ شارالارىمەن بايلانىستىرىپ وتىرمىز. اتا-انالار جاز ايلارىندا بۇرىنعىداي بالالارىمەن قىدىرىپ شىقپاي, ءبارى ۇيىندە بولدى, – دەيدى ينفەكتسيونيست-دارىگەر ا.ساپاروۆا.
دارىگەردىڭ ايتۋىنشا, بۇل اۋرۋدى كوبىنەسە ءبىر جاسقا دەيىنگى بالالار مەن جاسى الپىستان اسقان ەرەسەكتەر وتە اۋىر جاعدايدا وتكىزەدى. ال جەدەل ىشەك ينفەكتسياسى – ۆيرۋستارمەن, باكتەريالارمەن قوزدىرىلاتىن جەدەل ينتوكسيكاتسيامەن, دەنە تەمپەراتۋراسىنىڭ كوتەرىلۋىمەن, ديارەيالىق بەلگىلەرمەن سيپاتتالاتىن ينفەكتسيا ءتۇرى. بۇل اۋرۋ جەمىس-جيدەكتەردى جۋماي جەپ, قول جۋ ەرەجەسىن دۇرىس ساقتاماۋ, قايناماعان سۋ ىشۋدەن بوي كوتەرەدى.
وبلىستىق دەنساۋلىق ساقتاۋ باسقارماسىنىڭ سوڭعى مالىمەتىنە سۇيەنسەك, بالالار اراسىندا جەدەل رەسپيراتورلىق ۆيرۋستىق جۇقپانىڭ ءورشۋى تىركەلىپ وتىرعان جوق. قازىر №2 وبلىستىق ينفەكتسيالىق اۋرۋحانادا جەدەل رەسپيراتورلىق ۆيرۋستىق جۇقپامەن 30-عا جۋىق بالا ەم الىپ جاتىر.
– جەدەل رەسپيراتورلىق ۆيرۋستىق جۇقپاعا قاتىستى ماۋسىمدىق احۋال تۇراقتى كۇيىندە ساقتالىپ وتىر. ءبىزدىڭ اۋرۋحانا ۆيرۋستىق جۇقپالى اۋرۋلارعا شالدىققانداردى ەمدەۋ ءۇشىن ءدارى-دارمەكتەرمەن تولىقتاي قامتىلدى, – دەيدى №2 وبلىستىق ينفەكتسيالىق اۋرحانانىڭ ءبولىم مەڭگەرۋشىسى ءاسيا سيدەشوۆا.
ونىڭ ايتۋىنشا, بيىلعى ناۋرىزدان بەرى اتالعان اۋرۋحانادا كوروناۆيرۋس ينفەكتسياسىن جۇقتىرعان 30 بالا ەمدەلىپ, ساۋىعىپ شىعىپتى. بالالار كوروناۆيرۋستى جەڭىل جاعدايدا وتكەرىپ, كلينيكالىق بەلگىلەرى اسا قاتتى بىلىنبەپتى. وسىلايشا, قاۋىپتى ىندەتتىڭ قاقپانىنا تۇسكەن بالالاردىڭ ءبارى وتباسىنا امان-ساۋ ورالىپ, اتا-اناسىمەن قاۋىشتى.
اتىراۋ وبلىسى
