پارلامەنت • 25 قىركۇيەك، 2020

ءماجىلىس دەپۋتاتتارى ەكولوگيالىق كودەكس جوباسىن تالقىلادى

10 رەت كورسەتىلدى

ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتى "جاسىل تەحنولوگيالار جانە ينۆەستيتسيالىق جوبالار حالىقارالىق ورتالىعىندا" كەڭەيتىلگەن وتىرىس وتكىزدى، دەپ حابارلايدى Egemen.kz.

ەكولوگيالىق كودەكس جوباسى شەڭبەرىندە ەكولوگيالىق قاتىناستاردى رەتتەۋدەگى جاڭا تاسىلدەر قارالدى. بەينە-كونفەرەنتسيا فورماتىندا وتكەن شاراعا ءماجىلىس دەپۋتاتتارى، بەيىندى مينيسترلىكتەردىڭ، ءىرى كاسىپورىنداردىڭ، قوعامدىق بىرلەستىكتەر مەن ۇكىمەتتىك ەمەس ۇيىمداردىڭ وكىلدەرى قاتىستى. ەكولوگيا ماسەلەلەرى جانە تابيعات پايدالانۋ كوميتەتىنىڭ توراعاسى گلەب ششەگەلسكي تاقىرىپتىق وتىرىس مەملەكەت باسشىسىنىڭ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىنداعى تاپسىرماسىن ىسكە اسىرۋ ماقساتىندا ءوتىپ جاتقاندىعىن العا تارتا كەلىپ، جۇمىس بارىسىندا نەگىزگى زاڭ جوباسىنا 1500-گە جۋىق، ال ىلەسپە جوباعا 350-دەن استام تۇزەتۋلەر ەنگىزىلگەنىن ايتتى.

سونىمەن قاتار، دەپۋتاتتار الدىندا بايانداما جاساعان ەكولوگيا، گەولوگيا جانە تابيعي رەسۋرستار ۆيتسە-ءمينيسترى احمەتجان پىرىمقۇلوۆ ەكولوگيالىق كودەكس جوباسىن ازىرلەۋ جۇمىسىنا جۇرتشىلىق پەن بيزنەس-قوعامداستىق وكىلدەرى بەلسەندى قاتىسقانىن، سونداي-اق ماجىلىستەگى جۇمىس توبىنداعى تالقىلاۋ كەزىندە بىرقاتار ماسەلەلەر كوتەرىلگەنىن اتاپ ءوتتى. ولار: - ەڭ جاقسى قول جەتىمدى تەحنولوگيالار مەن ەكونوميكالىق ىنتالاندىرۋ شارالارىن ەنگىزۋ. ەكولوگيالىق كودەكستىڭ جوباسى 2025 جىلدان باستاپ ءبىرىنشى ساناتتاعى جاڭا ءىرى كاسىپورىنداردى ەڭ جاقسى تەحنولوگيالاردى قولدانا وتىرىپ، كەشەندى ەكولوگيالىق رۇقساتتارعا كوشۋدى قاراستىرادى. قولدانىستاعى كاسىپورىندار ءۇشىن مۇنداي كوشۋدى 2021 جىلدان باستاپ ەرىكتى تۇردە جۇزەگە اسىرۋ ۇسىنىلادى.

بۇل تالاپتى ورىنداعان كاسىپورىندار ەميسسيالىق تولەمدەردەن بوساتىلادى، كەرى جاعدايدا تاريفتەر كوتەرىلەدى;

- اۆتوماتتاندىرىلعان شىعارىندىلاردى باقىلاۋ جۇيەسىن ەنگىزۋ. بۇل نوۆەللا شىعارىندىلار ينديكاتورلارىنىڭ ونلاين-مونيتورينگىن وتكىزۋگە، بۇزۋشىلىقتارعا جەدەل جاۋاپ بەرۋگە، حالىقتى سەنىمدى جانە ۋاقتىلى اقپاراتپەن قامتاماسىز ەتۋگە مۇمكىندىك بەرەدى;

- ەكولوگيالىق باقىلاۋدى جەتىلدىرۋ (بىرنەشە رەت بۇزۋشىلىقتار ءۇشىن جاۋاپكەرشىلىكتى ارتتىرۋ، ايىپپۇلداردى قاتايتۋ).

زاڭ جوباسىنىڭ جاڭا رەداكتسياسىندا قورشاعان ورتاعا ەميسسيالار نورماتيۆتەرىن بۇزعانى ءۇشىن اكىمشىلىك ايىپپۇل 10 ەسەگە، ال بىرنەشە رەت بۇزىلعان جاعدايدا 20 ەسەگە كوبەيتىلدى. ءوندىرىس جانە تۇتىنۋ قالدىقتارىن باسقارۋ جونىندەگى تالاپتاردى بۇزعانى ءۇشىن سانكتسيالاردى قاتاڭداتۋ قاراستىرىلعان.

قورشاعان ورتانى قورعاۋ سالاسىنداعى قۇقىق بۇزۋشىلىق ءۇشىن اكىمشىلىك جاۋاپكەرشىلىككە تارتۋ مەرزىمى بۇزۋشىلىق جاسالعان كۇننەن باستاپ 1 جىلدان 3 جىلعا دەيىن ارتۋى مۇمكىن;

  • جاڭا ەكولوگيالىق كودەكس قواب (قورشاعان ورتاعا اسەردى باعالاۋ) راسىمىنەن ءوتۋ تۋرالى تالاپتى تەك 1-ءشى ساناتتاعى كاسىپورىندارعا قاتىستى قولدانۋعا ۇسىنادى. 2-ءشى ساناتتاعى وبەكتىلەر ءۇشىن قواب مىندەتتەمەسى سكرينينگ ناتيجەلەرى بويىنشا انىقتالادى. 3-ءشى ساناتتاعى وبەكتىلەر حابارلاما سيپاتىنا كوشىرىلسە، ال 4-ءشى سانات رۇقسات الۋدان تولىعىمەن بوساتىلادى;
  • ءوندىرىس جانە تۇتىنۋ قالدىقتارىن باسقارۋدى جەتىلدىرۋ. وسىعان بايلانىستى جاڭا ەكولوگيالىق كودەكس قاۋىپتى قالدىقتار قىزمەتىن ليتسەنزيالاۋدى قاراستىرادى. بۇل قالدىقتاردى جيناۋعا، تاسىمالداۋعا، وڭدەۋگە جانە جويۋعا قاتىساتىن مامانداندىرىلعان كاسىپورىنداردىڭ ءتىزىلىمىن جۇرگىزۋگە مۇمكىندىك بەرەدى.

وسى ماسەلەلەردى تالقىلاۋ بارىسىندا ءماجىلىس دەپۋتاتتارى گ.بايماحانوۆا، ش.وتەمىسوۆ، ق.قاراكەن، ي.ۋنجاكوۆا بايانداماشىعا سۇراقتار قويىپ، پىكىرلەرىن ءبىلدىردى.

سونداي-اق قازاقستاننىڭ ەكولوگيالىق ۇيىمدارى قاۋىمداستىعىنىڭ توراعاسى ا.سولوۆەۆا، «حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى» كەاق باسقارما ءتورايىمى ج.قازجانوۆا، «قازحروم «ترانسۇلتتىق كومپانياسى» اق باس ديرەكتورى ا.ەسەنجۋلوۆ، «قازمىرىش» جشس اتقارۋشى ديرەكتورى ن.قۋانىشەۆ، «قازاقستان كوممۋنالدىق جۇيەلەرى» جشس باس ديرەكتورىنىڭ تەحنيكالىق ماسەلەلەر جونىندەگى ورىنباسارى ۆ.ۋسەنكو، «ەكوم» قوعامدىق بىرلەستىگىنىڭ توراعاسى س.موگيليۋك ءسوز سويلەدى.

ەكولوگيالىق كودەكستىڭ جاڭا رەداكتسياسى بويىنشا تالقىلاۋ ودان ءارى دەپۋتات م.ماحامبەتوۆ جەتەكشىلىك ەتەتىن جۇمىس توبىندا جالعاسادى.

سوڭعى جاڭالىقتار

ۇقساس جاڭالىقتار