«پرەزيدەنت جولداۋى جۇيەلى ترانسفورماتسيانىڭ كەشەندى شارالارىنان تۇرادى. ال ونى جۇزەگە اسىرۋ ءۇشىن مەملەكەت پەن قوعام بىرلەسە جۇمىس ىستەۋى كەرەك. ەڭ باستىسى, قوعامعا جولداۋدىڭ نەگىزگى اسپەكتىلەرىن, ونى ىسكە اسىرۋدىڭ ناقتى جوسپارلى شارالارىن جەتكىزە بىلگەن ابزال. بۇل باعىتتا جولداۋدى ءتۇسىندىرۋ جۇمىستارى قىزۋ جۇرگىزىلىپ جاتقانىن اتاپ ءوتۋ كەرەك. بۇگىنگە دەيىن باق-تا جولداۋعا قاتىستى 5 مىڭعا جۋىق ماتەريال جارىق كورىپ, ساراپشىلاردىڭ پىكىرى جاريالانۋدا. جولداۋدا كوتەرىلگەن 11 باعىتتىڭ بارلىعى بۇگىنگى قوعام ءۇشىن وزەكتى. بۇل قوعاممەن تىعىز قارىم-قاتىناس ورناعانىن كورسەتەدى», دەدى ايدا بالاەۆا.
سونىمەن بىرگە مينيستر قوعامدىق باقىلاۋ ينستيتۋتتارىنىڭ ماڭىزدىلىعىن اتاپ ءوتتى. «پاندەميا كەزىندە قوعامدىق باقىلاۋ ينستيتۋتىنىڭ قانشالىقتى ماڭىزدى ەكەنىنە كوزىمىز جەتتى. قازىرگى تاڭدا قوعامدىق كەڭەستەر قوعامدىق باقىلاۋ فۋنكتسياسىنا يە. الايدا ۋاقىت بۇل فۋنكتسياعا يە ۇيىمداردىڭ ءتىزىمىن كەڭەيتۋ كەرەكتىگىن كورسەتىپ وتىر. سەبەبى اقپارات جانە قوعامدىق دامۋ مينيسترلىگى قوعامدىق باقىلاۋ فۋنكتسياسىن مىندەتىنە العان بەلسەندىلەر جۇمىسىنىڭ ۇيلەستىرۋشىسى بولدى. دارىحانالارداعى ءدارى-دارمەك باعاسىنىڭ الا-قۇلالىعى, گۋمانيتارلىق كومەكتى ءبولۋ ماسەلەسى, مەديتسينالىق ۇيىمداردىڭ جۇمىسىنا قاتىستى قانشاما ماسەلە تۋىنداعانى بەلگىلى. مىنە, وسى رەتتە ءبىز بەلسەندىلەرگە قولداۋ بىلدىردىك. بۇعان ەلىمىزدىڭ كەز كەلگەن ازاماتى قاتىسا الادى. وسى ورايدا «قوعامدىق باقىلاۋ تۋرالى» زاڭ جوباسى ازىرلەنىپ جاتقانىن, جۇمىس توبى قۇرىلعانىن ايتقىم كەلەدى. ال سىزدەر, پرەزيدەنتتىڭ كادرلىق رەزەرۆىندەگى جاستار بۇل جۇمىسقا ارالاسىپ, جۇمىس توبىنىڭ مۇشەسى بولا الاسىزدار», دەدى مينيستر.
ءمينيستردىڭ ايتۋىنشا, زاڭ جوباسىن ازىرلەۋگە قاتىسىپ جاتقان جۇمىس توبىنا ۇلتتىق قوعامدىق سەنىم كەڭەسىنىڭ مۇشەلەرى, ۇكىمەتتىك ەمەس ۇيىمدار وكىلدەرى كىرگەن.
ودان ءارى مينيستر ونلاين-پەتيتسيا ينستيتۋتىنىڭ قاجەتتىلىگىنە دە توقتالدى. «قازاقستاندا قوعام وكىلدەرى ونلاين-پەتيتسيا ينستيتۋتىن زاڭنامالىق تۇرعىدا بەكىتۋ باستاماسىن بۇعان دەيىن بىرنەشە رەت كوتەرگەن بولاتىن. ەلىمىزدە ول ينستيتۋت جۇمىسىن باستاۋ ءۇشىن ونلاين-پەتيتسيالار بويىنشا پلاتفورمانى ازىرلەۋى كەرەك. بىراق ەڭ باستىسى قاجەتتى ءنورماتيۆتى-قۇقىقتىق بازا بولۋى ءتيىس. وسىعان بايلانىستى قازىرگى ۋاقىتتا ءبىز زاڭناماعا ەنگىزىلەتىن وزگەرىستەر مەن تۇزەتۋلەردى ازىرلەۋدەمىز», دەدى ايدا بالاەۆا.
وسى ورايدا مينيستر ەڭ الدىمەن حالىققا پەتيتسيا ۇعىمىن ءتۇسىندىرۋ كەرەكتىگىنە توقتالدى. «ەكىنشىدەن, پەتيتسيا جىبەرۋ, مەملەكەتتىك ورگانداردىڭ پەتيتسيالاردى مودەراتسيالاۋ مەن قاراۋ ءتارتىبىن رەتتەگەن ابزال. ۇشىنشىدەن, مەملەكەتتىك ورگانداردىڭ پەتيتسيانى مىندەتتى تۇردە قاراۋى ءۇشىن قانشا ادامنىڭ قولى قاجەت ەكەنىن ايقىنداپ العان ءجون», دەدى مينيستر.
ال تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين جولداۋعا قاتىستى ءوزى باسقارىپ وتىرعان مينيسترلىكتىڭ جوسپارىمەن ءبولىستى.
«پرەزيدەنتتىڭ جولداۋىنا قۇجات كۇيىندە عانا قاراماۋ كەرەك. سەبەبى مەملەكەت باسشىسىنىڭ بۇعان دەيىنگى ايتقان سوزدەرى مەن كوتەرگەن باستامالارى وسى جولداۋدى تولىقتىرىپ تۇر. ءبىزدىڭ مينيسترلىككە قاتىستى, ەڭ باستىسى, تسيفرلاندىرۋدىڭ بارلىق رەفورمانىڭ بازالىق ەلەمەنتىنە اينالۋى كەرەك ەكەنى باسا ايتىلدى. ءارتۇرلى سالاداعى مەجەلەرگە جەتۋ, مەملەكەتتىك باسقارۋ جۇيەسىن جاڭعىرتۋ سەكىلدى سالالاردا تسيفرلى ماقساتتار بار. ال ءبىزدىڭ ماقسات – شىنىندا دا بۇكىل رەفورمالار پروتسەسىن جەدەلدەتەتىن بازالىق ەلەمەنتكە اينالۋ. جالپى, مەملەكەت باسشىسى بىزگە جۇكتەگەن پروتسەستەردى جەدەلدەتەتىن بازانى قۇرۋىمىز كەرەك», دەدى ول. مينيستر مەملەكەت باسشىسىنىڭ ونلاين-پەتيتسيالار تۋرالى باستاماسىن ازىرلەۋگە اقپارات جانە قوعامدىق دامۋ مينيسترلىگىمەن بىرگە اتسالىساتىنىن جەتكىزدى. پرەزيدەنت اكىمشىلىگى باسشىسىنىڭ ورىنباسارى مالىك مىرزالين پرەزيدەنتتىك جاستار كادرلىق رەزەرۆىندەگىلەرمەن كەزدەسۋ بارىسىندا جەرگىلىكتى ءماسليحاتتاردىڭ ءرولى مەن قىزمەتى تۋرالى پىكىرىن ءبىلدىردى. ونىڭ ايتۋىنشا, مۇمكىندىگى كوپ ءماسليحاتتاردى دەپۋتاتتار ءتيىمدى پايدالانباۋدا. جولداۋدا ءماسليحاتتىڭ قول جيناي الاتىنى تۋرالى ايتىلعانىن ەسكە سالا كەلە, جەرگىلىكتى بيۋدجەتتىڭ جۇمسالۋىنا ارالاسا الاتىنىن دا تىلگە تيەك ەتتى.
ال مەملەكەتتىك قىزمەت ىستەرى اگەنتتىگىنىڭ توراعاسى انار جايىلعانوۆا مەملەكەت باسشىسىنىڭ تاپسىرماسىنا سايكەس, پرەزيدەنتتىك جاستار كادرلىق رەزەرۆى ەكىنشى رەت وتكىزىلەتىنىن اتاپ ءوتتى. اگەنتتىك باسشىسىنىڭ ايتۋىنشا, رەزەرۆتىڭ كەلەسى لەگى 50 ادامعا عانا نەگىزدەلەدى. وسى ورايدا انار جايىلعانوۆا جولداۋدا ايتىلعان مەملەكەتتىك قىزمەتكەرلەر سانىن قىسقارتۋ ماسەلەسىنە دە توقتالىپ ءوتتى.
«پرەزيدەنتتىڭ جولداۋدا كورسەتكەن تاپسىرماسىن ورىنداۋ ءۇشىن جاقسى ستراتەگيا قاجەت. ياعني, قىزمەتكەرلەر سانىن قىسقارتۋ زاڭ شەڭبەرىنەن شىقپاي, قىزمەتكەرلەردىڭ جاڭا جۇمىسقا ورنالاسۋىن قامتاماسىز ەتۋ ارقىلى ورىندالۋى ءتيىس. بۇل تۇرعىدا اگەنتتىك كەلەسىدەي جۇمىستى جۇزەگە اسىراتىن بولادى. بيىل قىزمەتكەرلەردىڭ 10 پايىزى, 2021 جىلى 15 پايىزى قىسقارادى. قىسقارتۋلار ەڭ الدىمەن بوس ورىندار ەسەبىنەن جۇرگىزىلەدى. بارىنەن بۇرىن, قىزمەتىنەن بوساتىلعان مامانعا باسقا جۇمىس ۇسىنۋدى قولعا الامىز. ماسەلەن, اكىمدىكتەر ۆەدومستۆوعا قاراستى ۇيىمداردان, كۆازيمەملەكەتتىك سەكتوردان ورىن ۇسىنا الادى. قىسقارتۋ بولعانىمەن, ءبىر دە ءبىر قىزمەتكەر جۇمىسسىز قالماۋى كەرەك. ال مەملەكەتتىك قىزمەتكەرلەرگە جاڭا جۇمىس ۇسىنىلىپ, ولار اتالعان قىزمەتكە كەلىسپەگەن جاعدايدا, زاڭ بويىنشا, 4 جالاقى كولەمىندە وتەماقى تولەۋىمىز شارت», دەدى اگەنتتىك باسشىسى.
قازاقستان رەسپۋبليكاسى پرەزيدەنتىنىڭ كومەكشىسى ەرلان قارين كادرلىق رەزەرۆتىڭ مەملەكەت باسشىسى ءۇشىن ماڭىزىنا توقتالدى. «پرەزيدەنتتىك كادرلار رەزەرۆى مەملەكەت باسشىسى ءۇشىن ۇلكەن ماڭىزعا يە. بۇل تەك بايقاۋ عانا ەمەس, ناقتى الەۋمەتتىك ساتى. وسى جىلى رەزەرۆتەگىلەردىڭ جارتىسىن جۇمىسپەن قامتۋ مىندەتتەلدى, ءبىز ونى ورىندادىق. قازىردىڭ وزىندە بىلىكتىلىگىن دالەلدەپ جاتقان جاستارىمىز جەتەرلىك. جوبانىڭ العاشقى ناتيجەلەرى كوڭىل قۋانتادى», دەپ تۇيىندەدى ول ءسوزىن.
