الماتىدا ءوتىپ جاتقان بوكستان XVII الەم چەمپيوناتى ءوزىنىڭ شەشۋشى كەزەڭىنە كەلىپ جەتتى. بۇرناعى كۇنى وينالعان شيرەك فينالدىق جەكپە-جەكتەردىڭ قورىتىندىسىندا جۇلدەگەرلەردىڭ ەسىمدەرى تۇگەل انىقتالدى. ەندىگى ماسەلە كىمنىڭ قانداي ءتۇستى مەدال الاتىنىن ناقتى انىقتاۋعا قاراپ تۇر. بۇگىن شارشى الاڭدى شايقايتىن جارتىلاي فينالدىق شايقاستار سول جولداعى ءبىرىنشى قادام بولماق.
الماتىدا ءوتىپ جاتقان بوكستان XVII الەم چەمپيوناتى ءوزىنىڭ شەشۋشى كەزەڭىنە كەلىپ جەتتى. بۇرناعى كۇنى وينالعان شيرەك فينالدىق جەكپە-جەكتەردىڭ قورىتىندىسىندا جۇلدەگەرلەردىڭ ەسىمدەرى تۇگەل انىقتالدى. ەندىگى ماسەلە كىمنىڭ قانداي ءتۇستى مەدال الاتىنىن ناقتى انىقتاۋعا قاراپ تۇر. بۇگىن شارشى الاڭدى شايقايتىن جارتىلاي فينالدىق شايقاستار سول جولداعى ءبىرىنشى قادام بولماق.
قازاقستان قۇراماسى وسى كۇندەرى ءوزىنىڭ تاريحىندا ەشقاشان بولماعان زور جەتىستىكتەرگە جەتتى. بىلعارى قولعاپ شەبەرلەرىنىڭ جاھاندىق جارىسىندا ءبىزدىڭ ساڭلاقتاردىڭ 8 بىردەي مەدالگە قول جەتكىزگەن كەزى بۇرىن-سوڭدى بولعان ەمەس. ءبىز كۇنى ەرتەڭ بۇلاردىڭ قانشاسىنىڭ التىن مەن كۇمىس بولىپ جىكتەلەتىنىن ءدال بىلمەيمىز, بىراق, بۇگىنگى اسىپ وتىرعان اسۋدىڭ ءوزى تولاعاي تابىس بولىپ تابىلادى. وسى كەزگە دەيىن الەمدىك دودادا 8 جانە ودان دا كوپ مەدالدار سالتاناتىنا كۋبادان باسقا بىردە-ءبىر ەلدىڭ قۇراماسى جەتىپ كورگەن جوق. ال, رەسەيدىڭ جەتكەن جەتىستىگى ەكى رەت 7 مەدالدىڭ اۋقىمىمەن ولشەنەدى.
ەندى وسىنىڭ مىسالىن قازاقستاننىڭ ءوز شەجىرەسىنەن كەلتىرەر بولساق, ءبىزدىڭ رەسپۋبليكامىز تاۋەلسىزدىك العالى بەرگى ارالىقتا ەڭ مىقتاعاندا 5 مەدالعا قول ارتقانىن بايقار ەدىك. ونى 2005 جىلى قىتايدىڭ مينيانگ قالاسىندا وتكەن بىرىنشىلىكتە تىركەدىك. بۇدان دا ءارى كەتسەك, ەلىمىز قۇراماسى ءوزى ءبىرىنشى رەت قاتىسقان, 1993 جىلى فينليانديانىڭ تامپەرە قالاسىندا وتكەن VII جاھان جارىسىنان 1 عانا قولا مەدال الىپ قايتقانىن ايتار ەدىك. سوسىن 1995 جىلى بەرليندە 1 كۇمىس, 1 قولا مەدالدى ولجا سانادىق. 1997 جىلى ۆەنگريانىڭ استاناسى – بۋداپەشت شاھارىندا دا سول كورسەتكىشتى قايتالادىق. 1999 جىلى اقش-تىڭ حيۋستون قالاسىندا ءبىرىنشى رەت التىن مەدالعا قول جەتكىزىپ, ونىڭ جانىنا 1 كۇمىس, 1 قولا مەدالدى قوسا الدىق. 2001 جىلى يرلانديانىڭ بەلفاستىندا جالعىز كۇمىس مەدالدى قاناعات تۇتتىق. 2003 جىلى تايلاند ورتالىعى – بانگكوك قالاسىندا 2 التىن مەدالدى مويىنعا تاقتىق. 2007 جىلى اقش-تىڭ چيكاگو قالاسىندا 1 التىن, 2 قولا مەدالعا شامامىز جەتتى. 2009 جىلى يتاليانىڭ ميلانىندا جالعىز قولا مەدالعا كۇنىمىز قارادى. ال 2011 جىلى باكۋدە 2 كۇمىس, 2 قولا مەدالمەن حازار تەڭىزىنىڭ بەرگى بەتىنە وتتىك.
مىنە, وسىلاردىڭ قاي-قايسىسىمەن سالىستىرعاندا دا, كورسەتكىشتىڭ كورنەكتى ەكەنى كوزگە ۇرىپ تۇر. قۇرامانىڭ مىرزاعالي ايتجانوۆ باستاعان جاتتىقتىرۋشىلار القاسى بۇل الىنىپ وتىرعان بيىك بەلەستىڭ تەكتەن-تەك كەلمەگەنىن وسىدان ەكى اي بۇرىن يوردانيانىڭ استاناسى – اممان قالاسىندا وتكەن ازيا بىرىنشىلىگىندە 7 التىن, 1 كۇمىس مەدالدارىمەن-اق تولىق دالەلدەپ قويعان. قازاقستان قۇراماسىنىڭ بۇل چەمپيوناتتا باسقالاردان ايدىنى وزىق, ايبىنى ارتىق ەكەنىن تاعى مىنا ناقتى كورسەتكىشتەردەن بايقاۋعا بولادى. الەمدەگى ەڭ مىقتى بوكس دەرجاۆالارى سانالاتىن ەكى ەل – كۋبا مەن رەسەيدىڭ ءاربىرى جارتىلاي فينالعا, ياعني مەدالدار اۋىلىنا بار-جوعى ءتورت-تورتتەن عانا وكىلدەرىن ەندىرە الدى. وسى ساپتاعى 40 بوكسشىنىڭ سونداي-اق 3-ءۋى ازەربايجان مەن يتاليا ەلدەرىنەن بولىپ وتىر. ال يرلانديا, گەرمانيا, وزبەكستان جانە برازيليا سىندى ەلدەردىڭ ۇلەستەرى 2 بوكسشىدان اسپاي قالدى. بۇلاردان بولەك, كوستا-ريكا, ۋەلس, تايلاند, ۋكراينا, موڭعوليا, ۆەنەسۋەلا, ارمەنيا, انگليا جانە ارگەنتينا سەكىلدى مەملەكەتتەر قۇرامالارىندا ءبىر-ءبىر اتلەتتەن عانا بار.
ءبىز بۇدان بۇرىن چەمپيوناتقا 111 ەلدەن 457 بوكسشى كەلگەنىن ايتقان بولاتىنبىز. سولاردىڭ اراسىندا سوڭعى وليمپيالىق ويىنداردىڭ 1 چەمپيونى, 4 كۇمىس جۇلدەگەرى, 11 قولا جۇلدەگەرى بولدى. بۇعان قوسا, سوڭعى الەم بىرىنشىلىگىنىڭ 5 چەمپيونى, 4 كۇمىس جۇلدەگەرى, 11 قولا جۇلدەگەرى كەلدى. بۇدان بولەك, بيىل عانا ەۋروپانىڭ چەمپيونى اتانعان 7 ساڭلاق پەن ازيادا توپ جارعان 9 تۇيعىن وسى چەمپيوناتتىڭ جالىنىنا جالىن قوسۋعا اتسالىستى.
سونىمەن, بۇگىن – جارتىلاي فينال. اقتىق ايقاسقا كىمدەردىڭ باراتىنىن انىقتايتىن بۇل سايىستىڭ وڭاي بولمايتىنىن قازىردەن شامالاپ وتىرمىز. سەبەبى, كۇنى كەشە وتكەن شيرەك فينالداعى جان الىپ, جان بەرىسكەن ءىس-قيمىلدار الداعى ايقاستىڭ سودان دا قاۋىرت بولاتىنىن بايقاتقانداي. بوكسشىلار وزدەرىنىڭ تاريحىنداعى ءبىرىنشى رەت شلەمسىز ءوتىپ جاتقان ءىرى حالىقارالىق جارىستارىندا شىنىندا بارىن سالىپ جاتىر. بوكستىڭ وزىنە ءتان ادەمىلىگىن تانىتاتىن بۇل ەرەجە ولارعا دا ۇناعانداي.
«ەگەمەن قازاقستاننىڭ» الەم چەمپيوناتىنداعى
كوشپەلى رەداكتسياسى.
