ەلوردا • 07 مامىر، 2020

نۇر-سۇلتاندا اسكەرگە شاقىرىلعاندارعا اسكەري اتاقتار بەرىلدى

101 رەت كورسەتىلدى

نۇر-سۇلتاندا كوروناۆيرۋس ىندەتىمەن كۇرەسىپ جاتقان اسكەرگە شاقىرىلعان  اسكەري مىندەتتى ەرىكتىلەرگە اسكەري اتاقتار، گراموتالار مەن ارنايى بەلگىلەر بەرىلدى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.


«بۇگىن ءبىز وتان قورعاۋشىلار كۇنىن اتاپ ءوتىپ جاتىرمىز. 28 جىل بۇرىن ەلىمىزدىڭ تۇڭعىش پرەزيدەنتى نۇرسۇلتان ءابىش ۇلى نازارباەۆ قارۋلى كۇشتەرىن قۇرۋ تۋرالى جارلىققا قول قويدى. قارۋلى كۇشتەردىڭ باستى مىندەتى —  مەملەكەتتى سىرتقى قاۋىپ-قاتەردەن قورعاۋ. بۇرىن اتا-بابالارىمىز اشىق مايداندا قان كەشىپ ەلىمىزدى قورعاسا، بۇگىندە كوزگە كورىنبەيتىن جاۋمەن كۇرەس ءجۇرىپ جاتىر. قاسىم-جومارت كەمەل ۇلى توقاەۆ  ازاماتتاردى ارنايى اسكەري جيىنعا شاقىرعان كەزدە اسكەري مىندەتتى ەرىكتىلەر ىقىلاس تانىتىپ، قاتىسۋعا نيەت ءبىلدىردى. نۇر-سۇلتاندا جۇمىسقا 150 اسكەري مىندەتتى ەرىكتىلەر قاتىستى. كۇن سايىن ماڭىزدى مىندەتتەردى اتقارىپ كەلەسىز: كارانتيندىك شارالاردىڭ ساقتالۋىن باقىلاپ،  وتكىزۋ-باقىلاۋ بەكەتتەرىندە جۇمىس اتقارۋداسىزدار. وسى ۋاقىت ىشىندە وتكىزۋ-باقىلاۋ بەكەتتەرىنەن 7 مىڭنان استام جۇك ماشيناسى وتسە، جەدەل شتاب ارقىلى 180 مىڭنان استام ءوتىنىم وڭدەلدى. ءسىز 6 ملن شارشى مەتردەن استام دەزينفەكتسيا جۇمىستارىن جۇرگىزدىڭىز، باسقا دا جاۋاپتى جۇمىستار اتقاردىڭىز. وسىنىڭ بارلىعى ۆيرۋستىڭ تارالۋىن بولدىرماۋعا، قالا تۇرعىندارىن قاۋىپتى اۋرۋدان قورعاۋعا مۇمكىندىك بەرەدى. سىزدەردى وتان قورعاۋشىلار كۇنىمەن قۇتتىقتايمىن»، - دەدى قالا اكىمى التاي كولگىنوۆ.

قورعانىس ءمينيسترى نۇرلان ەرمەكباەۆ اسكەرگە شاقىرىلعانداردىڭ اتقارىپ جاتقان جۇمىسى ولاردىڭ كاسىپقويلىعىنىڭ كورسەتكىشى ەكەنىن ايتتى.

«كۇن سايىن قالانى كۇزەتىپ،  ءتارتىپتىڭ قاتاڭ ساقتالۋىن قاداعالاپ جۇرسىزدەر. اتقارىپ جاتقان جۇمىسىڭىز ءۇشىن العىسىمدى بىلدىرەمىن. سىزدەردى ماقتان تۇتامىز»، - دەپ اتاپ ءوتتى.

1

سوڭعى جاڭالىقتار

ۇقساس جاڭالىقتار