قازاقستاننىڭ فۋتبولدان پرەمەر-ليگاداعى چەمپيوناتىنىڭ 27-تۋرىن بۇگىن, 22 قىركۇيەك كۇنى كەشكە الماتىدا جەرگىلىكتى «قايرات» پەن قاراعاندىنىڭ «شاحتەر» كوماندالارى اراسىنداعى كەزدەسۋمەن اياقتالدى. بۇل تۋرالى Egemennews.kz ءتىلشىسى حابارلادى.
ماتچتىڭ ءبىرىنشى تايمىندا قوناقتار ەپتەپ باسىمدىق كورسەتكەنىمەن, ناتيجەگە جەتكەن الاڭ يەلەرى بولدى. ولار 32-مينۋتتا گامبيالىق فورۆارد مومەدۋ سيسسەيدىڭ كۇشىمەن ءبىرىنشى گولدى سوقتى. ول قازبەك گەتەريەۆتىڭ پاسىن وتە جاقسى پايدالاندى. ارادا بار-جوعى 4 مينۋت وتكەندە, الماتىلىقتار تاعى ءبىر گول سوعىپ, باسىمدىلىقتارىن ارتىرا ءتۇستى. بۇل جولى ۆيتالي لي ەرلەدى. ونىڭ ايىپ الاڭىنا جاقىن جەردەگى الاڭ ورتاسىنان ۇرعان سوققىسىنا قورعاۋشىلار دا, قاقپاشى دا توسقاۋىل قويا المادى. سونىمەن, قارسىلاستار 2:0 دەگەن ەسەپپەن ۇزىلىسكە شىقتى.
ال ناعىز تارتىس ويىن ەكىنشى تايمدا ورنەكتەلدى. بۇل تاعى دا قايراتتىقتاردىڭ ەسەپتى ۇلعايتا تۇسۋىنەن باستالدى. كەزدەسۋدىڭ 55-مينۋتتا ارتۋر ەديگاريان كەنشىلەر قاقپاشىسى ستاس پوكاتيلوۆتىڭ قاقپاسىنا تاعى ءبىر دوپ جونەلتىپ, ەسەپتى 3:0-گە جەتكىزدى. جۇرتتىڭ ءبارى وسىدان كەيىن قاراعاندىلىقتار جەڭىلىسكە كونەتىن شىعار دەپ ويلاعان. بىراق ولاي بولماي شىقتى. بۇعان, ءسىرا, ۆيكتور كۋمىكوۆتىڭ تايم باسىندا ەكى بىردەي ويىنشىنى الماستىرعانى دا سەبەپ بولعان شىعار.
قاراعاندىلىقتار ءۇشىن ءۇمىت وتىن جاندىرعان كوماندا كاپيتانى اندرەي فينونچەنكو بولدى. ول الدىمەن ءبىرىنشى, سوسىن ەكىنشى گولىن سوعىپ, كوماندالاستارىن جىگەرلەندىرە ءتۇستى. ال قاراعاندىلىقتاردىڭ سوڭعى گولىن ويىنعا قوسىلعان قوسىمشا ۋاقىتتا يگور زەنكوۆيچ سالدى. ءسويتىپ, ەسەپ 3:3 بولىپ اياقتالدى.
ەسكە سالا كەتەيىك, قازاقستان بىرىنشىلىگىندە بۇل كوماندالار بۇعان دەيىن ءوزارا 42 رەت كەزدەسكەن ەكەن. سونىڭ 18-ىندە «شاحتەر», 17-سىندە «قايرات» جەڭىپ, 7 ماتچ تەڭ اياقتالعان. دوپ ايىرىمى: 52-51 - الماتىلىقتاردىڭ پايداسىندا بولعان. ەندى 55-54 بولدى.
تاعى دا ەسكە سالا كەتەيىك, كەشە وسى تۋردىڭ الدىڭعى ويىندارى وينالىپ كەتكەن بولاتىن. ول مىناداي ناتيجەلەر اكەلدى:
«اقتوبە» (اقتوبە) – «استانا» (استانا) 2:0
گولدار: كاپادزە (52), حايرۋللين (90+6)
«ۆوستوك» (وسكەمەن) – «جەتىسۋ» (تالدىقورعان) 0:0
«تاراز» (تاراز) – «اتىراۋ» (اتىراۋ) 1:1
گولدار: وبيورا (36) – الۆيز (66-پەنالتي)
«اقجايىق» (ورال) – «توبىل» (قوستاناي) 1:3
گولدار: چەرنى (78) – كۋرتيشي (7), بۋگاەۆ (20, 74).
«ەرتىس» (پاۆلودار) – «ورداباسى» (شىمكەنت) 3:0
گولدار: باقاەۆ (48-پەنالتي), مۋحۋتدينوۆ (55), چەرنىشوۆ (75).
كەلەسى تۋردىڭ ويىندارى 27 قىركۇيەكتە وتەدى.
دامير قوجامقۇل.
